Pančicy (SN/mwe). Klóšterskich kři­žerjow w Pančicach-Kukowje je lětsa na přewšo dostojne wašnje farar Tomasz Dawidowski w serbskej, němskej a łaćonskej rěči wužohnował. Mjez 107 jěcharjemi, štož bě jedyn mjenje hač loni, bě sydom nowačkow. Slěborny wěnčk měješe Handrij Bulank z Pančic přityknjeny. Zo klóšterscy jěcharjo tež lětsa zaso derje spěwachu, je w prěnim rjedźe zasłužba młodeho kantora Joachima Jurenca. Wosebje na klóšterskim dworje je za wšěch, tež za konje ćežko, mjez tysacami hosći w procesionje měr wobchować. Na to pak běchu křižerjo přihotowani.
Njebjelčicy (SN/MiR). 116 křižerjow, štyri mjenje hač loni, je so jutrońčku dopoł­dnja na puć do Wotrowa nastajiło a so strowych zaso domoj nawróćiło. W lětušim Njebjelčanskim procesionje wuhladachu wěriwi wobeju wosadow a mnozy hosćo třoch nowačkow, Tristana Mjechelu ze Serbskich Pazlic kaž tež Jonasa Lehmanna a Floriana Hähnela z Njebjelčic. Blidarski mišter Tobias Cyž, kiž je prěni króć Božu matru njesł, a Bosćij Kokla z Njebjelčic jěchaštaj ze slěbornym wěnčkom.