Wjeselo při jězdźenju zwjazuje

póndźela, 04. apryla 2016
artikl hódnoćić
(0 )
Dwacety raz je towarstwo Kulowskich bikerow sobotu před swojim sydłom w Dubrjenku do noweje sezony startowało. Foto: Andreas Kirschke Dwacety raz je towarstwo Kulowskich bikerow sobotu před swojim sydłom w Dubrjenku do noweje sezony startowało. Foto: Andreas Kirschke

Kulowscy bikerojo do swojeje dwaceteje sezony startowali

Dubrjenk (AK/SN). Na wšěch 143 motorskich je so sobotu w Dubrjenku zhromadźiło, hdźež jich a jich mašiny farar Johannes Magiera požohnowa. „Tele požohnowanje je nam jara wažne, dokelž wuprošamy sej tak lěto bjez njezbožow“, podšmórny předsyda towarstwa Kulowskich bikerow Manfred Notzke k 20. sezonowemu startej tohole razu. Z Dubrjenka wjedźeše 146 kilometrow dołha čara přez Njedźichow, Kinspork, Wikow (Elsterwerda) a Rólany wróćo do Dubrjenka. Wjele spřećelenych bikerow Kulowskich jězdźerjow přewodźeše. „Tale jězba je naš zazběh do sezony“, rjekny Manfred Notzke. Kóžde lěto wuzwoleja sej hinaši cil. Nawróćiwši so přewjedźechu motorscy popoł­dnju wšelake hry a dožiwichu wječor live-hudźbu.

„Při tajkich jězbach móžeš nowe zwiski nawjazać“, měnješe Stefan Grahl. Z 32 lětami je wón najmłódši čłon towarstwa Kulowskich bikerow, kotremuž přisłuša jědnaće ludźi z Kulowa, delnich Sulšec, Konjec a Pěskec. Z Kulowčanom Křesćanom Brücknerom a Konječanom Renéjom Šołtu staj tež křižerjej mjez nimi. Sydom­ z jědnaće čłonow je wot wšeho spočatka pódla. Nowačcy dyrbja dwulětny pruwowanski čas zmištrować, „dokelž dyrbi so zhromadnosć w towarstwje tež čłowjesce hromadźe hodźeć“, rozłoži sobuzałožer Enrico Feigl. Mjezsobna pomoc w techniskich prašenjach je runje tak wažna kaž zhromadne wjeselo při jězdźenju po krajinje. Mandźelske motorskich pomhaja bikeram při tym w pozadku. Za nje­ organizuja woni jako dźak kóžde lěto wosebitu jězbu.

Wot lěta 2004 ma towarstwo swoje sy­dło w bywšim Dubrjenskim Konsumje, přewostajenym wot města Kulowa. Lětsa chcedźa tam nowe wokna zatwarić. Porno tamnym Kulowskim towarstwam su motorscy małe zjednoćenstwo. Rozsudna pak je za nich kwalita. Słowo a ruka stej zawjazowacej a swědčitej wo mjezsobnym respekće, prai Manfred Notzke.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND