Pjenjezy mudrje zasadźeć

wutora, 05. apryla 2016
artikl hódnoćić
(0 )

Chróšćanscy gmejnscy radźićeljo dyrbjachu so na swojim minjenym posedźenju rozsudźić, kak chcedźa přizwolene spěchowanske srědki za dróho­twar wužiwać. To pak je zawěrno jenož kapka na horcy kamjeń.

Chrósćicy (SN/MWj). Zo je so minjene posedźenje Chróšćanskeje gmejnskeje rady runje w Nuknicy wotměło, bě snano připad, dokelž nochcedźa so radźićeljo přichodnje jenož w Chrósćicach zetkawać. Hladajo na jednu z wobjednanych temow pak so městnosć derje hodźeše. Runja druhim gmejnam dóstanu mjenujcy tež Chrósćicy wosebitu přiražku Swobodneho stata Sakskeje za komunalny dróhotwar, a to 31 800 eurow. Hromadźe z dźesaćprocentowskim swójskim podźělom móža potajkim něhdźe 35 000 eurow za dróhotwar nałožić.

Štož za lajka snano wjele klinči, je poprawom kapka na horcy kamjeń, dokelž móžeš z tejle sumu jenož małe projekty zwoprawdźić a njemóžeš w poprawnym zmysle žane dróhi twarić. Zašłe lěta su puć z Chrósćic do Hórkow na někotrych městnach zwuporjedźeli. Logiske by tuž było tam dale inwestować, zo by projekt „spomóžny kónc našoł“, kaž to wjesnjanosta Marko Kliman (CDU) rjekny. Ale wobhladujo sej komunalne puće w gmejnje dyrbjachu zwěsćić, zo maja hišće cyle hinaše njedostatki. Sobu najšpatniši puć wjedźe mjenujcy z Nuknicy do směra na Lejno. Tam je spěšnje raz móžno, zo sej awto wotspody skóncuješ, hdyž so jednej dźěrje spěšnje dosć wuwinył njejsy. Tak chcedźa nětko tam swoje skromne srědki zasadźić. Puć porjedźeć započnu z kromy k Pančičansko-Kukowskej gmejnje do směra na móst.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND