Hižo před dźesać lětami twarscy fachowcy trěbnosć projekta spóznali
Delni Wujězd (AK/SN). Sprjewine spušćadło w Delnim Wujězdźe je tuchwilu hoberske twarnišćo. Do jeho generalneho saněrowanja inwestuje Swobodny stat Sakska 2,3 miliony eurow. „Hižo před dźesać lětami běchmy spóznali, zo je trjeba spušćadło ponowić“, rjekny Sebastian Haufe, nawodny sobudźěłaćer krajneho zarjadnistwa rěčnych zawěrow Sakskeje (LTV). Brunicy dla je so zemja na wšelakich městnach sadźiła. Nimo toho tłóčeše stupaca dnowna woda wotspody na 18 króć 27 metrow wulki bazenk, kotryž je trěbny za dobywanje miliny. „Tule dyrbješe so nuznje něšto stać“, praji Mechthild Lehmann z LTV, nawodnica twarskeho projekta.
Wot lěta 1982 sprjewine spušćadło dźěła. Za tuchwilne saněrowanje wjedu wodu rěki po Młynskej hrjebi. Za to běchu ju hižo loni za něhdźe 180 000 eurow přihotowali, zo móhło něhdźe 4,5 kubiknych metrow wody na sekundu po njej ćec. Dale su za 290 000 eurow spušćadło při točenskim młynje sporjedźeli.