1. apryla 1991 su we Wojerecach ambulantnu hladansku słužbu diakonije załožili. Jeje kolebka steješe tehdy na Měšćanskej promenadźe, wot lěta 1998 je socialna stacija w Domje Alberta Schweitzera na Lipjecskim naměsće 1 zaměstnjena.
Wojerecy (UH/SN). Składnostnje 25lětneho wobstaća hladanskeje słužby je Johannes Johne z předsydstwa diakonije sobudźěłaćerkam gratulował. Připołdniša přestawka za nawodnicu hladanskeje słužby Angeliku Hattula a jeje team bě tuž tón dźeń skerje swjedźenskeho razu. Tak njebě žonam jenož w běhu lět nastata chronika zajimawa, ale tež dopomnjenki sotry Sonje Schwarzer, kotraž je jako najstarša w skupinje wšitke 25 lět sobu dožiwiła. Mjeztym 70lětna sotra Irene Hoffmann bě dźewjeć lět zastupowaca nawodnica ambulantneje hladanskeje słužby. Wona rozprawješe, kak bě tehdy nastawacy model bydlenja z wobstajnym hladanjom přewzała a koncept we Wojerowskej bydlenjotwarskej towaršnosći předstajiła, hdźež jón přećiwo dalšim zajimcam přesadźi.