Złoži zastojnstwje w gmejnje

srjeda, 06. apryla 2016
artikl hódnoćić
(0 )

Manfred Hermaš (CDU) złoži swojej funkciji jako gmejnski radźićel Slepjanskeje gmejny a jako zastupowacy wjesnjanosta. Jako přičinu je 66lětny Rownjan strowotne přičiny podał.

Slepo (AK/SN). Wobkrućiła je Slepjanska gmejnska rada na swojim wčerawšim posedźenju, zo jeje čłon Manfred Hermaš swojej zastojnstwje jako gmejnski radźićel a jako zastupowacy wjesnjanosta złoži. Přećiwo tomu hłosował bě Wolfgang Goldstein, Matthias Jainsch so hłosa wzda. Hižo na posedźenju w februaru bě Hermaš swój wotstup po skřiwdźenjach a wosobinskich wumjetowanjach přećiwo jeho wosobje připowědźił. Dokelž wjesnjanosta Reinhard Bork (CDU) dlěši čas wupadny, bě jeho Hermaš přiwšěm zastupował a je nětko wróćo sahajo k 30. měrcej wotstupił.

„Ja tónle rozsud jara wobžaruju“, Reinhard Bork wčera rjekny. Runje tak wón wobžaruje, zo je za čas jeho njepřitomnosće k rozestajenjam a diferencam w gmejnje dóšło. Zdobom pak wuzběhny Hermašowy angažement za Domowinu, za Serbski kulturny centrum Slepo, za šule a towarstwa kaž tež za saněrowanje Slepjanskeje cyrkwje a fary. Dale dźakowaše so Rownjanej za jeho skutkowanje jako zastupowacy wjesnjanosta w minjenych štyrjoch lětach. Wolfgang Goldstein pominaše, so zasadnje wo mjezsobnym fairnym wobchadźenju dorozumić. To ma so w njezjawnym dźělu posedźenja w meji stać.

Wjacore přičiny je Manfred Hermaš za swój krok mjenował. Jónu bě to skóržba třoch radźićelow Lěwicy přećiwo zjawnemu listej „Strukturnu změnu we Łužicy“ 21 komunow. Pječa bě Hermaš z podpismom pod list přećiwo wobzamknjenjam gmejnskeje rady jednał. Dalše přičiny su rozestajenja z personalnej radu, kotraž bě zapowědźiła rozmołwy wo móžnosćach lutowanja při personalnych wudawkach w gmejnskim etaće 2016, diferency w techniskim wuběrku a pobrachowaca dowěra w Slepjanskim zarjadnistwje.

Manfred Hermaš wostanje pak dale župan župy „Jakub Lorenc-Zalěski“, społnomócnjeny za serbske naležnosće Zhorjelskeho wokrjesa a čłon Rady za serbske naležnosće Sakskeje.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND