Budyšin (CS/SN). Mjeztym hižo 21. raz je so sobotu dźeń Budyskeho měšćanskeho lěsa wotměł. Minjene lěta wobdźěli so stajnje 70 do 80 zajimcow, tónraz zličichu něhdźe 150. Přičina bě, zo su na kóncu wulěta znowawotewrjenje restawrowaneje bawdy na Čornoboze swjećili.
Prjedy hač tak daloko bě, zhonichu wobdźělnicy něštožkuli zajimaweho wo noworjadowanju ležownosćow a móžachu so nad ponowjenym pućom na wjeršk hory zwjeselić. Wutwarili pak njejsu dróhu prěnjorjadnje dla turistow. Hłownje słuži wona tomu, zo bychu pušćene štomy z měšćanskeho lěsa wottransportować móhli. Přiwšěm pak puć tež nowemu wobhospodarjerjej hórskeje bawdy Elmarej Ladušej z Wuježka pomha. Wón móže swoje twory nětko lěpje do hórskeho hosćenca wozyć a hosćo maja přijomniši puć k bawdźe.
