Zlutniwosć je kaznja časa

srjeda, 20. apryla 2016
artikl hódnoćić
(0 )

Delanscy radźićeljo so z hospodarskim planom 2016 zaběrali

Róžant (JK/SN). Gmejna Ralbicy-Róžant njebudźe a njemóže trěbne powjetšenje abo rozšěrjenje Ralbičanskeje pěstowarnje w přichodnych lětach zwoprawdźić. Swójski podźěl něhdźe 1,5 milionow eurow njemóhła gmejna ani při spěchowanju cyłeho předewzaća zwjesć. To praji wjesnjanosta Hubertus Ryćer (CDU) na wčerawšim posedźenju gmejnskeje rady na naprašowanje ze stron staršiskeje rady pěstowarnje. Přiwšěm zaruča gmejna funkcionalitu a porjad w přebywanišću w Ralbicach kaž tež w Smjerdźacej. Takle zdźěli to gmejna nošerjej Serbskemu šulskemu towarstwu a staršiskej radźe.

Wulki dźěl hospodarskich srědkow nałožuje gmejna lětsa za to, ponowić a reparować gmejnske bydlenja a tepjenje w Ralbičanskej šuli. Energetisce saněrować budu gmejnski zarjad w Róžeńće a w nim zaměstnjene bydlenje. Najwjetša inwesticija z 260 000 eurami budźe lětsa nowe jězdźidło za Ralbičanskich wohnjowych wobornikow. Wšo to je wobstatk lětušeho hospodarskeho plana, kotrehož prěni naćisk radźićeljo wčera jara wěcownje diskutowachu. W planje wobkedźbuja tež srědki, kotrež gmejna po zakonju wo zesylnjenju inwesticiskeje mocy wot Zwjazka a Sakskeje dóstanje. Srědki Zwjazka we wysokosći 35 600 eurow a k tomu podźěl gmejny chcedźa nałožować za ponowjenje gmejnskich pućow a energetiske saněrowanje. Sakske srědki zasadźa za šulu a tohorunja za dróho­twar. Tak chcedźa puć Při Klóšterskej wodźe we Łazku ponowić dalokož srědki dosahaja. Gmejnje dźe w prěnim rjedźe wo to, měć wurunany hospodarski plan, štož je naročne předewzaće hladajo­ na dźeń a mjenje dochodow.

Na kóncu wčerawšeho zeńdźenja społnomócni gmejnska rada zastupjerjej gmejny, sej na přichodnej zhromadźiznje zaměroweho zwjazka za wopłóčki Při klóšterskej wodźe dać rozjasnić zestawu popłatkow kaž tež zakładneho přinoška za wopłóčki. W tutym nastupanju knježa w gmejnje Ralbicy-Róžant kaž tež w druhich komunach zwjazka njejasnosće a njedorozumjenja.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND