Budyšin (CS/SN). W rjedźe Budyskich rozmołwow dźěše zawčerawšim w Kamjentnym domje wo to, zhonić kak so ćěkancy w sprjewinym měsće čuja, što su dožiwili a što sej přeja. Kaž moderator Christian Schramm rjekny, chcedźa so woni rady z Budyšanami rozmołwjeć. Jenož při mjezsobnym zetkanju, hdyž so jako čłowjek a susod zbližiš, móže jedyn wot druheho něšto zhonić.
Zo bychu tajke rozmołwy zmóžnili, wutworichu cyłkownje dźesać rozmołwnych kołow, w kotrychž tu bydlacy wukrajnicy domoródnych zetkaja. Do toho rozprawještaj před wšitkimi něhdźe sto wopytowarjemi zarjadowanja Khalid Butt a Samira Doudak wo swojich nazhonjenjach. Khalid Butt je mnohim Budyšanam znaty jako mějićel indiskopakistanskeho hosćenca Shalimar. Pakistančan bydli hižo 27 lět w Němskej, z toho 17 lět w Budyšinje. W tym času je wón tolerancu a zhromadne žiwjenje z tu bydlacymi ludźimi nawuknył. Jeho nazhonjenje je, zo je jenož čłowjek wažny, nic pak nabožina a pochad.