Ptačečanska šulska a domizniska stwa je minjeny kónc tydźenja swoju lětušu sezonu zahajiła. Tam chcedźa lětsa nowy projekt zwoprawdźić, na kotrymž hižo pilnje dźěłaja.
Ptačecy (HH/SN). Za zazběh noweje sezony Ptačečanskeje šulskeje a domizniskeje stwy minjeny kónc tydźenja su někotružkuli rjanu ideju zrodźili. Tak demonstrowachu domjacnostne pokiwy z časa swojich dźědow a wowkow, za čož bě brošurka z 1930tych lět zakład. Před domizniskej stwu žony z jeje towarstwa pod nawodom Martiny Petschick pokazachu, kak hodźi so na ekologiske wašnje drasta płokać a kak mazane blaki z njeje wotstroniš. Při tej składnosći dóstachu wopytowarjo tež tón abo tamny strowotny tip. Darmotnje rozdźělili su sobotu kirbsowe rostlinki. Te měli hosćo doma derje hladać, přetož 25. septembra chcedźa we wobłuku domchowanki Ptačečanskeho kirbsoweho krala zwěsćić.