Kulow (JoS/SN). 500. róčnica wozjewjenja kaznje čistoty steješe w srjedźišću dnja piwa, kotryž su minjenu sobotu tež w Kulowskej piwarni swjećili. Zo so tam po tejle kazni maja, móžeš wot časa po přewróće tež na blešowych etiketach čitać. „Tehdy móžachmy trěbne surowizny zaso kupić“, rozłoži Johannes Glaab, zamołwity za marketing w piwarni. Wona ma tuchwilu 19 přistajenych, kotřiž warja wob lěto 15 000 hektolitrow piwa w dwanaće družinach. Wšitke dwanaće sy sobotu po wodźenjach woptać móhł. K tomu hudźeše Hórnikečanski dujerski orchester. Syn Johannesa Glaaba, kiž runje w Zhorjelskej piwarni powołanje piwarca wuknje, je wopytowarjam z jednorymi słowami proces warjenja piwa rozłožował.