Přesnadny angažement za woprawdźitu bikulturnosć w měsće porokowali
Budyšin (CK/SN). Za spěchowanje němsko-serbskeje bikulturnosće w měsće so w Budyšinje „cyłkownje přemało čini“. Tole wuchadźa z rozprawy dźěłoweho kruha za serbske naležnosće, kotruž su na wčerawšim posedźenju měšćanskeje rady předstajili. Jutry drje so serbski element jasnišo hač hewak na wědomje bjerje. Z tym pak njemóže naležnosć wotbyta być. „Wuzběhujemy drje rjane tradicije tule bydlaceje mjeńšiny, ale aktiwnje jich rěč wuknyć abo ju znajmjeńša při kóždej skićacej so móžnosći zjawnje prezentować, to nam prócy hódne njeje“, rjekny dr. Susanne Hozyna (CDU), rěčnica dźěłoweho kruha.