Suche hałzy a čorne wowcy

pjatk, 29. apryla 2016
artikl hódnoćić
(0 )
Při Lejnjanskej hromadźe chodojtypalenja wuhladaštaj Měrko Domaška a Markus Kreuz (wotprawa) módru titu ze styroporowymi wotpadkami.  Foto: Marian Wjeńka Při Lejnjanskej hromadźe chodojtypalenja wuhladaštaj Měrko Domaška a Markus Kreuz (wotprawa) módru titu ze styroporowymi wotpadkami. Foto: Marian Wjeńka

W nimale kóždej wsy jutře zaso na wulkich­ hromadach stareho drjewa chodojty pala. Poprawom z toho wuchadźeš, zo su to wšitko suche hałzy, zbytki korjenjow a kerkow. Pančičanski wjesnjanosta Markus Kreuz (CDU) chcyše to dokładnišo wědźeć a je sej­ hromady bliže wobhladał.

Po wjacorych njelubych nazhonjenjach zašłych lět je wjesnjanosta Pančic-Kukowa Markus Kreuz wóndano připowědźił, zo chce hromady za chodojtypalenje kontrolować. Hromadźe z předsydu zarjadniskeho zwjazka Při Klóšterskej wodźe Měrkom Domašku, kiž je w tej funkciji zdobom za porjad a wěstotu zamołwity, bě wón wčera w gmejnje po puću a je so z městnami chětro stróžił.

Prěnja stacija bě Kanečanska hromada do směra na Nowy Dwór. Tam bě samo na sebi wšitko w porjadku. Jeno čwak folije napadny, kiž pak hodźi so jednorje wućahnyć. W Časecach lětsa žanu oficialnje přizjewjenu hromadu nimaja. Móžno, zo reaguja tak na lońše chodojtypalenje, jako běchu tam ludźo samo cyłe křesła spalić chcyli. Při wobrazach, kotrež ma Markus Kreuz na swojim handyju składowane, móžeš jeno z hłowu wić.

To sy wčera tež při Lejnjanskej hromadźe činić móhł. Hižo wotdaloka bě módra tita widźeć, w kotrejž sy trochu bliže styroporowe wotpadki spóznał, kusk dale někajke plastikowe dźěle. Na małej ekstra-hromadźe ležeštej „rjenje wobarbjenej“ dźělej balkona, do kotrejuž běchu něhdy najskerje kwětkowe kašćiki stajili. Pod nimaj wuhladaštaj kontroleraj wjacore dźěle křesła, kotrež drje su pola někoho wusłužili. Markus Kreuz swět hižo njerozumi. Dawno do chodojtypalenja je wón napominał, tajke wotpadki na hromady njewozyć. Pomhało to najskerje wjele njeje.

Mjeztym zo je we Hłupońcy wšo w porjadku, je w Žuricach přichodny problem. Wothladajo wot to, zo běchu minjene dny wočiwidnje hižo někotre matracy spalili, bě tam wčera widźeć dźěl plastikoweje tafle, kotraž pochadźa po wšěm zdaću z pomnika Cyrila a Metoda pola Stróžišća. Na njej móžeš hišće „ms­denkmal“ (Milleniumsdenkmal) wučitać a k tomu wujimk z ewangelija po Mateju. Najskerje jedna so wo dźěl tafle, kotraž bu před časom pola Stróžišća wobškodźena. We Wotrowje Markus Kreuz ničo porokować njetrjeba. Ale w Kukowje wuhlada wón z Měrkom Domašku stare matracy, jeansowe cholowy a druhi njerjad, kotryž tam ničo pytać nima.

Facit: Wjesnjanosta je přesłapjeny, zo jeho napominanja na wjacorych městnach ničo wunjesli njejsu. Ludźo maja dosć móžnosćow, swoje wotpadki wotbyć, bjez přidatnych wudawkow. Z tym zo je na chodojtypalenje woža, woni druhim wjeselo na nałožku skepsaja. Tak dyrbja zamołwići w Lejnje, Žuricach a Kukowje hač do jutřišeho njerjad z hromady zwućahać. Měrko Domaška chce to sobotu kontrolować. Njeje-li so to stało, njezměje wón žadyn problem chodojtypalenje na tym městnje zakazać. Hižo nětko pak je wěste, zo Domaška mjenowane pady wobswětowemu hamtej krajnoradneho zarjada přizjewi. A kohož wuslědźa, tomu hrozy selena pokuta.

Měrko Domaška sej na to tež hišće hromady w tamnych gmejnach wobhlada. Wottam wšak smě skerje chwalobnje rozprawjeć. W Serbskich Pazlicach tak a tak wotpadki jednorje wotbyć njemóžeš, dokelž je tam hromada na terenje bywšeje deponije ze zamknjenym płotom wobdata. W Konjecach je čwak folije widźeć, kotruž dyrbja wućahnyć. W Pěskecach, Nowoslicach a w Nuknicy je wšitko bjezporočne. A we Worklecach, zwotkelž dóstachu pokiw, zo bě tam pječa něchtó křesła dowjezł, žane tajke widźeć nje­bě­chu. Marian Wjeńka

wozjewjene w: Lokalka

Galerija

dalši wobraz (1) Tale tafla ležeše wčera na Žuričanskej hromadźe. Po wšěm zdaću pochadźa wona z pomnika Cyrila a Metoda.
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND