Wokrjes Dubja-Błóta chce serbske projekty ze 14 000 eurami podpěrać

Lubin (SN/at). Wokrjes Dubja-Błóta (LDS) wotpohladuje w nowym dwójnym etaće 2017/2018 spěchowanje za serbske projekty wot dotal 7 000 na 14 000 eurow podwojić. Zakład za to tworješe wokrjesny sejmik na posedźenju 20. julija, hdyž wobzamkny nowelěrowanu Směrnicu wo spěchowanju serbskeho ludu we wokrjesu Dubja-Błóta. Z tymle krokom nałožuje na Berlin mjezowacy komunalny cyłk postajenja noweho braniborskeho Serbskeho zakonja z lěta 2014.

Wudospołnjacy namjet frakcije Zhromadna njewotwisna wobydlerska lisćina LDS/My za Königs Wusterhausen, zo měli so jeničce přede­wzaća a projekty w připóznatym serbskim sydlenskim rumje spěchować, su do noweje směrnicy za­při­jeli. Porno dotal płaćiwemu dokumentej z lěta 2006 je nětko dokładnišo definowane, kotre projekty smědźa so spěchować. Su to tajke, kotrež „komunalne korporacije w připóznatym serbskim sydlenskim rumje wokrjesneho teritorija, towarstwa, wuznawace so w swojich wustawkach k serbskim nałožkam, a wu­znawacy Serbja organizuja“.