Krótkopowěsće (03.05.17)

srjeda, 03. meje 2017
artikl hódnoćić
(0 )

Twarja nowu wobjězdku

Wojerecy. Ze symboliskim prěnim zarywom su dźensa wuchodnje Wojerec nowu wobjězdku wokoło města twarić započeli. Nimale sydom kilometrow dołha čara, kotraž powjedźe wot B 96 pola Mučowa hač k B 97 sewjerowuchodnje Wojerec, ma Ćisk, Němcy a Wojerecy wot wobchada wolóžić. Wobjězdka płaći 20 milionow eurow a ma w lěću 2019 hotowa być.

Lětopis lyriki 2017 z Chěžku

Frankfurt am Main. W nowej knize „Jahrbuch der Lyrik 2017“ je tež baseń „Zelene zet“ Jurja Chěžki zapřijata. Róža Domašcyna bě ju do němčiny přenjesła. Jeje poezija jewi so tež w 31. wudaću lětopisa z načasnej lyriku Němskeje, Awstriskeje a Šwicarskeje, kotryž wuńdźe lětsa prěni raz w Frankfurtskim nakładnistwje Schöffling & Co.

Nowy młodźinski dušepastyr

Drježdźany. Kapłan Martin Kochalski budźe nowy młodźinski dušepastyr Drježdźansko-Mišnjanskeho biskopstwa. 36lětny, kotrehož je biskop Heinrich Timmerevers do zastojnstwa powołał, nastupi 1. awgusta swoju słužbu, kaž biskopski ordinariat w Drježdźanach zdźěla. Kochalski pochadźa z Lipska a bě po swjećiznje 2012 kapłan w Šěrachowje.

wozjewjene w: Krótkopowěsće
Prošu přizjewće so, chceće-li komentar podać

nawěšk

  • Katolscy wěriwi swjeća dźensa wysoki swjedźeń Božeho ćěła. W nimale wšitkich serbskich wosadach, kročachu procesiony, zwjetša přewodźane wot dujerjow, k wonkownym wołtarkam. Sobu na čole procesionow dźěše wjele serbskich družkow. Tójšto dalšich holco

nowostki LND