Budyšin (SN). Byrnjež lětsa 23 křižerjow mjenje – cyłkownje bě jich 1 598 – jutrowne poselstwo wozjewjało, bě mjez nimi wjele ze zelenym wěnčkom. We Wotrowje a Pančicach-Kukowje jěchaštaj nanaj prěni króć ze synomaj. Wosebje dźakowano policiji su procesiony bjez wjetšich problemow susodne wsy a wosady docpěli a so zaso nawróćili. Wšako jim tež lětsa zaso tysacy domjacych a pućowacych na nawsach, při puću abo w klóštrje přihladowachu.
Wjacore čestne wrota
Kulow (aha/SN). 418 křižerjow, 233 dźewjaty raz pod kantorstwom Michała Krječmarja w serbskim a 185 z kantorom Steffenom Kobalzom w němskim dźělu, bě so 475. raz do Ralbic nastajiło. Na jubilej pokazowachu dwoje čestne wrota w Kulowje kaž tež tajke w Koćinje a Sulšecach. Na čole serbskeho dźěla njeseše kantor Michał Krječmar swjaty křiž. Zhorjelski biskop Wolfgang Ipolt bě křižerjow wužohnował, kotřiž su w Ralbicach zhromadnje z Drježdźansko-Mišnjanskim biskopom Heinerom Kochom a fararjom Michałom Nawku nyšpor swjećili. Składnostnje jubileja spěwachu z nowych serbskich „Křižerskich“.