Sympatiski hłós Moniki Gerdesoweje drje wjele wjac ludźi Hornjeje a Delnjeje Łužicy znaje hač Chróšćanku wosobinsce. Hižo 26 lět dźě moderěruje rozhłosownica sćelaka MDR hornjoserbske rańše wusyłanje.
Chrósćicy (aha/SN). Wosobinsce zeznało pak je Moniku Gerdesowu w minjenych sydom lětach wjac hač 1 300 putnikow z nimale wšěch europskich krajow, samo z USA, Brazilskeje, Awstralskeje a Nowoseelandskeje. Jeje mandźelski Christoph Gerdes bě wot lěta 2007 na swójsku iniciatiwu priwatne bydlenje bjez kóždehožkuli spěchowanja na putnisku hospodu přetwarił. Zhromadnje z mandźelskej je tam něhdźe 3 000 hodźin dźěłał. Hižo w prěnim lěće wužiwaše 91 ludźi přijomne wuměnjenja Chróšćanskeje putniskeje hospody.
