Přetwarjeja pěstowarnju po planje

pjatk, 10. apryla 2015
artikl hódnoćić
(0 )

Dźěwinska gmejnska rada pozitiwnu bilancu sćahnyła

Dźěwin (AK/SN). Wutwar pěstowarnje „Baćonjace hnězdo“ w Brězowce (Halbendorf) cyle derje běži. Twarscy dźěłaćerjo twarjenje tuchwilu nutřka dale wutwarjeja. „Terminowje ležimy w planje“, podšmórny Annett Dreißig, sobudźěłaćerka zarjada za planowanje, twar a hórnistwo zarjadniskeho zhromadźenstwa Slepo na wčerawšim posedźenju Dźěwinskeje gmejnskeje rady. „W přitwarje su tapecěrowanske dźěła nětko zakónčene. Tež špundowanje je zrunane.“ Kónc apryla su schody na rjedźe a po planje běža dźěła instalowanja tepjenja, sanitarnych připrawow a elektriki w přitwarje kubłanišća. W starym twarjenju budu wot přichodneho tydźenja molerjo zasadźeni. Brězowske dźěći su kónc januara přechodnje ze swojeje pěstowarnje wućahnyli. Wot 1. februara chodźa wone do dnjowych přebywanišćow w Trjebinje, Dźěwinje a Slepom. Hač do 30. junija chcedźa cyłu twarsku naprawu pěstowarnje „Baćonjace hnězdo“ zakónčene měć. Tak móhli so hólcy a holcy hišće do hłowneje dowoloweje sezony do Brězowki nawróćić.

wozjewjene w: Lokalka
Prošu přizjewće so, chceće-li komentar podać

nawěšk

nowostki LND