Wčerawša wólbna njedźela za wolerjow Rakečanskeje gmejny je z hladanišća předsydki gmejnskeho wólbneho wuběr­ka Franziski Pfeiffer a čestnohamtskich pomocnikow we wólbnych lokalach derje wotběžała.

Rakecy (aha/SN). Cyłkownje 2 947 wólbokmanych měješe rozsudźić, kotry ze štyrjoch nominowanych kandidatow ma přichodne sydom lět jako wjesnjanosta na čole gmejny z 3 607 wobydlerjemi stać. Wólbne wobdźělenje z 63 procentami, z cyłkownje 1 846 wotedatych hłosow bě 26 njepłaćiwe, swědči wo zajimje ludnosće wo dobre rozrisanje palacych načasnych problemow w gmejnje. Wužiwać móžachu ludźo wólbne lokale w Rakečanskej radnicy a sydarni Treffpunkt kaž tež w Komorowje.

Doskónčny wuslědk wotedatych hłosow přeswědča. Komorowčan Swen Holger Nowotny – nominowany wot CDU – nažnja 1 048 hłosow, štož wotpowěduje 58 procentam. Sven Barthel na lisćinje Swobodneho wolerskeho zjednoćenstwa dósta 354 a Peter Klemmer na lisćinje Njestronskich wolerjow 269 hłosow. Za njestronjana Svena Helma rozsudźi so 149 wolerjow.