33. volleyballowy turněr wo pokal Domowiny wuhódnoćili
Čłonojo předsydstwa Serbskeho Sokoła su hišće do jutrow 33. sokołski volleyballowy turněr wo pokal Domowiny wuhódnoćili. Nimo starosty Achima Kowarja a nawody turněra Józefa Šwona bě mjez wjacorymi přitomnymi tež nowinski rěčnik Serbskeho Sokoła Jan Hrjehor. Jurij Bjeńš je so z nim zetkał a jako prěnje hnydom prašenje k dobyćerskemu mustwu stajił.
Jano! Dobyće volleyballistow z pólskeje Tokarnje njebě překwapjenka, prašenje za přisłušnosću pólskich hrajerjow w tamnišich ligach tež nic. Sće na swojej wuhódnoćenskej zhromadźiznje na to hišće raz reagowali?
J. Hrjehor: Ně, to njebě trjeba. Hižo do a tež na turněrje sym so lětsa raz intensiwnišo ze zestawu pólskeho mustwa zaběrał. Je to wólnočasny cyłk, kotryž prawidłownje hraje. Nawoda Domu biskopa Bena w Smochćicach dr. Peter-Paul Straube je mi to wobkrućił. Jemu połnje dowěrjamy. Wón je za cyłk tež zamołwity. Nimo toho smy njedawno w Serbskich Nowinach list čitali, kotryž mam za jara dobru wotmołwu na přeco zaso samsne prašenje.