Ptak lěta, pokazka rjemjeslnikow a serbski nałožk na wikach přirody
Stróža (CK/SN). Z rekordom 6 100 wopytowarjow skónčichu so sobotu popołdnju 14. nalětnje přirodowe wiki na terenje zarjadnistwa biosferoweho rezerwata Hornjołužiska hola a haty w Stróži. Stajnje wjele přihladowarjow měješe Peter Nitsch. 72lětny zastupowacy předsyda wuchodosakskeho zwjazka sokołarjow měješe wjacore sokoły, pašturlicu kaž tež sowu sobu, a wězo škraholca, ptaka lěta. Kamjenčan chodźi po starym wašnju ze swojimi rubježnymi ptakami tež na hońtwu. Runje tak pak stara so wo chore zwěrjata, hoji a wusadźa je zaso w přirodźe. Něhdźe 30 sokołarjow w Hornjej Łužicy skutkuje. Peter Nitsch měješe sobotu na wjele prašenjow wotmołwić. Při stejnišću zarjadnistwa biosferoweho rezerwata móžachu so wopytowrjo wobhonić, hdźe maja wšelake družiny pazorakow w našim regionje swój domicil a kak su wone žiwe. Dźěći pak móžachu z čłonami spěchowanskeho towarstwa Přiroda hornjołužiskeje hole a hatow małe pazoraki paslić.
