Chodojtypalenje je jedyn z najwjetšich spektaklow tohole razu wokoło Hodźija. Za jubilejne 50. zarjadowanje je sej tamniši młodźinski klub znowa kłobuk na hłowu stajił.

Hodźij (CK/SN). 50. raz přewjedu jutře w Hodźiju chodojtypalenje ze sudnistwom, organizowane wot młodźinskeho kluba při spjatym jězoru. W nim drje je starša młodźina ze wsy w starobje 20 do 40 lět zjednoćena, na spočatki chodojtypalenja pak so nichtó z nich dopominać njemóže – tež Christian Adler nic. 24lětny powěda, zo bě hižo jako dźěćo pódla. „Hodźij bjez chodojtypalenja, to scyła njeńdźe“, wón rjekny.