Brüssel (dpa/SN). Zwjazkowa kanclerka Angela Merkel je dźensa ze swojimi kolegami z Europskeje unije prěni króć wo planowanym konjunkturnym pakeće EU za hospodarski nowonatwar po koronakrizy wuradźowała. Powšitkownje wšak z tym njeličachu, zo so hižo dźensa dojednaja. To chcedźa na wjerškowym zetkanju w juliju docpěć.

Koronapandemija je zjednoćenstwo statow EU do hłubokeje hospodarskeje krizy storčiła. Za to, zo bychu krizu přewinyli, a za nowy hospodarski rozmach je prezidentka komisije EU Ursula von der Leyen přez kredity financowany program 750 miliardow eurow namjetowała. Pjenjezy chcedźa wosebje potrjechenym krajam, kaž Italskej a Španiskej, jako přiražki ­přewostajić, kotrež njetrjebaja wróćić. ­Tomu pak so Awstriska, Šwedska, Danska a Nižozemska spjećuja. Tam nochcedźa dowidźeć, zo dyrbja potom wšitke kraje Europskeje unije přez lět­dźesatki kredity zhromadnje wotpłaćić.

„Krabat“ je so dalši raz jako publikumowy magnet wopokazał. 10 000 króć bu kompjuterowy dyrdomdej, w kotrymž ma hrajer na slědach serbskeho kuzłarja někotryžkuli twjerdy worjech tłusnyć, mjeztym ze syće sćehnjeny. To rěka, zo je „Krabat­ a potajnstwo sakskeho krala“ formaty překročejo zawěsće najwuspěšniša serbska publikacija tutoho lětstotka. Mjezynarodny wuspěch – wšako je w „scenje“ tak mjenowany point-and-click-adventure zajimcow na Dalokim wuchodźe runje tak kaž w „nowym swěće“ našoł – je bjezdwěla tež wuslědk poprawom jednoreho, přiwšěm často zanjechaneho koncepta: Wjacerěčnosć so naposledk potajkim tola hdys a hdys wudani (a, w padźe serbšćiny, hrajerjej samo wěstu lěpšinu zmóžnja)! RAPAKam móžeš tuž jenož gratulować – a Załožba za serbski lud njeměła předołho na swojich – zasłuženych – ławrjencach wotpočnyć. Maćizny za dalši digitalny dyrdomdej dźě je dosć! Bosćan Nawka

W starobje 101 lěta jako měšćanska radźićelka wotstupiła je Lisel Heise w pfalcskim Kirchheimbolandenje. „Nima žadyn zmysł, hdyž su woči a wuši dotrjebane. Woboje pak tule trjebaš“, rjekny bywša wučerka. Žona sedźeše wot junija 2019 w měšćanskej radźe swojeho ródneho města na juhowuchodźe Porynsko-Pfalcy. Powěsć wo jeje wuzwolenju je so tehdy po cyłym swěće rozšěrjała.

Swojeho ćežko choreho bratra wopytał je emeritowany bamž Benedikt XVI. w Regensburgu. Bě to prěni króć, zo je mjeztym 93lětny Benedikt po spušćenju zastojnstwa w lěće 2013 Vatikan wopušćił, wotwidźane wot wulěta na lětnju rezidencu Castelgandolfo pola Roma. Bratr Benedikta, 96lětny Georg Ratzinger, je ćežko chory. Benedikt bě bamža Franciskusa prosył, hač směł swojeho bratra „hišće raz w tutym žiwjenju“ widźeć.

Berlin (dpa/SN). Po tydźenje trajacej zwadźe su so Zwjazk a zwjazkowe kraje zaso na zhromadne postupowanje w boju přećiwo rozšěrjenju koronawirusa dojednali. Wobzamknjeny kompromis sadźa na po wšej Němskej płaćiwy minimalny wotstawk 1,5 metrow, na zesylnjene naprawy hygieny a na wužiwanje nahubnika we wěstych wobłukach. W šulach měła so po prózdninach zaso normalna wučba wotměć. Nastupajo zakaz wulkozarjadowanjow chcedźa wuwzaća postajić.

Energijowe plany schwalene

Kiel (dpa/SN). Zwjazkowe kraje su planam wulkeje koalicije nastupajo energijowu změnu w dalokej měrje přihłosowali. W kónčnym dokumenće po rozmołwach mjez zwjazkowej kanclerku Angelu Merkel (CDU) a ministerskimi prezidentami zwjazkowych krajow rěka, zo je „spěšny wutwar wobnowjomnych energijow a wotpowědnych syćow nu­znje trěbny“. Mjez druhim chcedźa wjace wětrnikow w morju nastajeć a popłatk za ekomilinu pomjeńšić.

Bolton Trumpa nadběhuje