Trenuja zaso za olympiju

wutora, 16. januara 2024 spisane wot:

Wolejbulisća 10. a 11. lětnika Serbskeho gymnazija Budyšin (SGB) su sej w regionalnym finalu wubědźowanja „Młodźina trenuje za olympiju“ w starobnej skupinje II w Žitawje bronzu zawěsćeli. Dalše serbske zastupnistwo SWŠ Worklecy wudoby sej slěbro mjez štyrjomi startowacymi mustwami.

Z wulkim optimizmom dojědźa sej sydom wolejbulistow 10. a 11. lětnika SGB minjeny tydźeń do Žitawy, zo bychu mjez štyrjomi najlěpšimi šulemi wuchodneje Sakskeje sobu wo złoto wojowali. Na pjatkownišich treningowych jednotkach šulskeje AG so na prěni wjeršk tutoho lěta derje přihotowachu. Po šěsć hodźinach intensiwneho wojowanja wudobychu sej hrajerjo wokoło kapitana Karla Krječmarja bronzu.

Karl Krječmar z nowym šulskim rekordom

Serbski gymnazij Budyšin –

Joliota Curiejowy gymnazij Zhorjelc 2:0 (25:3, 25:6)

Wuspěšny prěni test za Sokołow

wutora, 16. januara 2024 spisane wot:

Zeleno-běli Bukecy –

Sokoł Ralbicy/Hórki 0:5 (0:3)

Zestawa hosći: Chr. Gloxyn – Šewc, Schultz, Heidorn, Woko, Mjechela, Rawš, Šiman, D. Gloxyn, Kunze, Al. Wałda, Žur, Rachel, P. Šołta

Sokoljo přihotuja so hižo wot 9. januara na druhu połseriju we wokrjesnej wyšej lize. Kruteho zymskeho wjedra dla pak njeběše koparski trening na twjerdym hrajnišću móžny, ale wotmě so dotal stajnje w Ralbičanskej ćěłozwučowarni. Njedźelu bě so nětko prěnja přećelska hra přećiwo Bukecam přewjedła. Hraješe so na kumštnym trawniku w Kumwałdźe, kotryž běše ze sněhom pokryty. Při­wšěm běše móžno hrać, byrnjež so hrajerjo chětro suwali.

2. juniorowy cup we Worklecach

wutora, 16. januara 2024 spisane wot:

Sobotu wotměwaše so we Worklecach 2. halowy juniorowy cup za dorostowe mustwa starobneje klasy młodźiny E. Wot dopołdnja w dźesaćich do popołdnja w třoch třělachu koparki a koparjo w cyłkownje 28 hrach dohromady 104 wrotow.

Sportowa jednotka Njebjelčicy z hłownym organizatorom Robertom Lejnartom přeprosy serbske towarstwa z Radworja, Ralbic, Njebjelčic a Chrósćic. Kóžde z nich nastupi z dwěmaj cyłkomaj.

Mustwa hrajachu přeco dźewjeć mjeńšinow. Po modusu kóždy přećiwo kóždemu zahaji so turněr z duelom mjez hosćićelskimi mustwami Njebjelčanskeje SJ. Tu so Njebjelčanski druhi cyłk snadnje z 1:0 přesadźi. Nastachu spěšne akcije, napjate dwuboje a jedna šansa po druhej. Wšitko to tež wučinja halowu kopańcu. Su to wažne nazhonjenja, kotrež podpěruja pozitiwne wuwiće młodeje koparki a młodeho koparja.

Wosebje wuzběhnyć ma so wukon sudnikow. Běchu to Danko Hicka a Max Trobitz z Noweje Wjeski a Milan Jurk z Hórkow. Mjez dźěćimi knježeše fairny wobchad a sudnicy njetrjebachu tuž docyła wulce do jednotliwych hrow zapřimnyć.

Sylny wukon Sokołow na piwowym cupje w Kulowje

póndźela, 15. januara 2024 spisane wot:

Kulowska stara koparska garda přeprosy sydom cyłkow na swój tradicionalny piwowy cup.

Konkurenca je na woblubowanym turněrje stajnje sylna. Nimo Kulowčanow hrajachu tam zakitowar pokala SG Weixdorf, Natwar Němske Pazlicy a nowačk z Horow (wšitcy stafla I). W stafli II běchu to koparjo z Delan, Großröhrsdorfa, Wojerec a Budyšina. Hraješe so w dwěmaj staflomaj, a to stajnje dwanaće mjeńšinow. Prěnjej dwě mustwje kwalifikowaštej so za połfinale. Wrotar drje smě w Kulowje sobu hrać, wrota třělić a srjedźnu liniju překročić pak njesmě.

Widźał,słyšał, napisał (15.01.24)

póndźela, 15. januara 2024 spisane wot:

Awtor dźensa

André Strelow

Na delnich koparskich runinach tuchwilu kopańca wotpočuje. Jednotliwe přihotowanske hry so wotměwaja respektiwnje mustwa su w treningowym lěhwje. Zajimawa budźe na kóncu sezony konstelacija w krajnej klasy. Dokelž so ličba staflow wot štyri na tři redukuje, změjemy definitiwnje wjace zestupnikow hač zwučene. W tutym nastupanju móhło to tež cyłki z Chrósćic, Rakec a Wojerec potrjechić. Lěpšina při zestupje by była, zo bychmy wjace derbyjow na wo­krjesnej runinje měli.

W zwjazkowej lize su zaso započinali za bulom honić. Nic Bayerojo, Dortmund abo Lipsk kiwaja cyle horjeka, ně, Leverkusen zawěsći sej přez pózdnje dobyće titula nazymskeho mišterstwa. Takrjec z wothwizdanjom docpěchu hišće dobyćerske wrota. Wotliči pak so stajnje zaso na kóncu sezony. Zwjeselaca je wobstejnosć, zo hraja hišće tři mustwa z Němskeje w champions league. Najćešeho přećiwnika maja cyle wěsće Lipšćenjo. Přećiwo Realej Madridej dyrbi so hižo mały dźiw stać, zo štwórćfinale docpěju.

Sport (12.01.24)

pjatk, 12. januara 2024 spisane wot:

Futsal-turněry w Kamjencu

Sportowe towarstwo Natwar Němske Pazlicy přewjedźe jutře a zajutřišim štyri tak mjenowane koparske Futsal-turněry w ramiku halowych koparskich turněrow Sakskeho koparskeho zwjazka. Startowe prawo za hosćićela dóstanu we wšitkich štyrjoch dorostowych starobnych klasach mustwa JFV ONFA. Za nowozałožene spěchowanske towarstwo je to šansa, so z mustwami na krajnej runinje přirunować. Hrać budźe so w sportowej hali při Kamjenskim lětanišću.

13.01.  9:30  młodźinje D a A

14.01.  9:30  młodźinje C a B

Junior-cup we Worklecach

Sportowa jednotka Njebjelčicy budźe jutře we Worklečanskej ćěłozwučowarni zarjadowar a wuhotowar 2. koparskeho turněra z mjenom junior-cup. Hrać budu tam wot 10 hodź. štyri koparske mustwa starobneje klasy młodźina E z Ralbic, Radworja, Njebjelčic a Chrósćic.

Piwowy-cup w Kulowje

Přepozdźe wotućili

štwórtk, 11. januara 2024 spisane wot:

Łužiske lodohokejowe liški –

Lodowe mjedwjedźe Regensburg 2:4 (0:1, 0:1, 2:2)

Wot třećeje mjeńšiny bu hra napjata. W běhu jedneje mjeńšiny rozdźěli sudnik dwě chłostani přećiwo hosćom a tuž agěrowachu domjacy krótkodobnje z dwěmaj hrajerjomaj wjac na lodźe. Regensburg pak jara klewernje zakitowaše a žane wrota njedopušći. Na to dóstachu hosćo hišće wjace móžnosćow, zwrěšćichu pak na wrotarju Liškow, štož běše tónraz zaso Nikita Quapp. Hru z hrajerjom mjenje na lodźe we 18. min. přetrachu Łužičenjo hišće zbožowni, ale pjeć sekundow pozdźišo docpě potom Abbott Girdukis prěnje wrota. Šěsć sekundow do kónca třećiny by Michael Bartuli přez penalty wurunać móhł, zwrěšći pak na Thomasu Mc. Collumej we wrotach hosći.

W srjedźnym wotrězku tłóčachu Liški na wurunanje. Najwjetšu móžnosć měješe při tym Roope Mäkitalo, jako dósta puk swobodnje přihraty, ale na wrotarju zwrěšći. Ke kóncej druheje třećiny běchu Łužiske liški zaso w podličbje a hosćo na 2:0 zwyšichu (38.). Třělc wrotow bě Jakob Weber.

Interny koparski turněr Sokołow

srjeda, 10. januara 2024 spisane wot:

Kóžde lěto mjez hodami a nowym lětom zetkawaja so koparjo Sokoła Ralbicy/Hórki w swójskej ćěłozwučowarni, zo bychu interny koparski turněr ­přewjedli. Tónraz zetkachu so wječor po druhim hodownym swjatym dnju.

Nowolětne běhi we Wojerecach

srjeda, 10. januara 2024 spisane wot:
95lětny Wojerowčan Karl-Heinz Nowak bě njedźelu při 45. nowolětnym běhu w sportowym forumje Wojerecy najstarši aktiwny wobdźělnik. Wojerowčan nóžkowaše jedne koło wokoło stadiona. Na hłownej distancy 6,6 kilometrow startowaše tež molerski mišter Jakub Čórlich (naprawo) z Němcow. Za dobyćerjom Patrickom Königom a druhim Romanom Měrćinkom doběža Němčan jako třeći do cila. Tež Čórlichec synaj Lukaš (druhi wotprawa) a Daniel běštaj so na hłownu distancu z nanom Jakubom zwažiłoj a do cila doběžałoj. Foto: Mia-Katarina Hrjehorjec

Koparski dorost w Ralbicach za bulom honił

wutora, 09. januara 2024 spisane wot:

Čłonojo Sokoła Ralbicy/Hórki organizowachu mjez hodami a nowy lětom zaso tři koparske turněry juniorow. Sportowa hala w Delanach běše tuž wot ranja hač do wječora derje pjelnjena, wšako honješe tam wjac hač 150 dźěći nimale 10 hodźinow dołho za bulom. Přeprošene běchu zaso cyłki z wokolnych gmejnow.

Turněr młodźiny F

Serbska debata

nowostki LND