Policija (24.03.21)
W awće dwělować započała
Wóslink. Najskerje w poslednim wokomiku je žona z Wóslinka minjene dny spóznała, zo su ju z tak mjenowanym wnučkowym trikom wobšudźić chcyli. Kaž policija předwčerawšim zhoni, bě Wóslinčanku minjeny štwórtk cuza žona zazwoniła, wudawajo so jako pólska wobchadna policistka. Wona powědaše, zo bě dźowka 79lětneje při wobchadnym njezbožu pólskeho staćana strašnje zraniła a zo dyrbi nětko do jastwa, jeli rentnarka za nju kawciju 70 000 eurow njezapłaći. Wona tuž wšo swoje zamóženje hromadźe pytaše, sydny so do cuzeho čakaceho awta, zo by sobu do Wrócławja jěła. W běhu jězby pak započa wona dwělować. Mjez druhim ju zadźiwa, zo šofer napadnje husto telefonuje. Jako Wóslinčanka słowo „wnučkowy trik“ naspomni, da jej šofer telefon, na kotrehož tamnym kóncu bě wona „policistka“, kotraž wša rozhorjena na nju swarješe. Na to šofer zwonka Wrócławja zasta a 79lětnu z awta pušći. Tam pak so žana pozdatna policistka njezjewi. Wóslinčanka na to ze swojim zamóženjom zaso domoj jědźeše a bě dźakowna, zo swoje pjenjezy zhubiła njeje.
Policija (23.03.21)
Drogi namakali
Radwor. W dwěmaj bydlenjomaj w Radworju je policija předwčerawšim popołdnju dohromady wjace hač 50 gramow drogow namakała. Jako prěnje wobhladachu sej popołdnju po pokiwje swědka bydlenje 36lětneho. Tam namakachu 32 gramow konopje, wšelake utensilije za jeje wužiwanje kaž tež tak mjenowany butterfly-nóž. Wječor wołachu zastojnikow wospjet do samsneho bydlenja. Nětko bě tam dalši 34lětny muž, kiž uniformowanym snadne mnóstwo marihuany přepoda. Na sudniski přikaz sej tež jeho bydlenje bliže wobhladachu a z pomocu psa dalše 22 gramow konopje namakachu. Policisća wšitko sćazachu a wupisachu chłostanske přizjewjenje. Kriminalna słužba Budyskeho rewěra so z padom dale zaběra.
Policija (22.03.21)
Kolesowarka ćežko zranjena
Narć. Na zwjazkowej dróze B 96 w Narću sta so sobotu dopołdnja ćežke wobchadne njezbožo, při kotrymž je so 79lětna kolesowarka strašnje zraniła. Wona bě po wokrjesnej dróze ze směra Noweje Łuki přijěła a chcyše zwjazkowu dróhu přeprěčić, zo by so na kolesowansku šćežku na tamnym boku puća dóstała. Wona pak přewidźa z Wojerowskeho směra přijěduce wosobowe awto typa Suzuki, kotrehož 62lětny wodźer zražce hižo zadźěwać njemóžeše. Při tym njeje so jenož rentnarka ćežko zraniła, tež šofer Suzukija snadne zranjenja poćerpje. Wěcna škoda wučinja po informacijach Zhorjelskeje policajskeje direkcije tysac eurow. Njezbožowa słužba dokładnu přičinu njezboža přepytuje.
Policija (19.03.21)
Drogi připadnje namakali
Běła Woda. Při zasadźenju předwčerawšim krótko do połnocy w Běłej Wodźe namakachu zastojnicy w jednym bydlenju mału konopjowu plantažu. Poprawom běchu policistow do bydlenja 34lětneho strowotniskich problemow dla wołali. Tam pak napadny jim blachowa tyza ze 40 gramami marihuany. Statny rěčnik na to přikaza, zo maja zastojnicy stwu wobydlerja dokładnje přepytać. W kamorje namakachu woni skónčnje připrawu za plahowanje konopje, w kotrejž steješe połnje kćějaca rostlina. Ju kaž tež plahowansku připrawu nablaku sćazachu, 34lětneho wobydlerja dowjezechu k dalšemu zastaranju do chorownje.
Policija (18.03.21)
Blisko hrodu granatu namakali
Radwor. Hdyž dźěći abo młodostni wonka w přirodźe přebywaja, je to najprjedy raz chwalobne. Lědma štó na to mysli, zo móhło to snano strašne być, na přikład, hdyž namakaja woni strašnu powostanku z Druheje swětoweje wójny. Stało je so to předwčerawšim blisko Radworskeho hrodu. Při tamnišich hatach wuhladaštaj młodostnaj 30 centimetrow dołhi zerzawy nastroj. Wona zazwoništaj swojeju staršeju a informowaštaj tohorunja policiju. A to bě prawje tak, přetož namakanka bě ruska granata z přeměrom wosom centimetrow. Specialisća policije ju wotwjezechu.
Policija (17.03.21)
Paduch so sam přeradźił
Budyšin. Dokelž njeje lěpje na swoju móšeń kedźbował, je drje so 24lětny muž předwčerawšim po padustwje sam přeradźił. Wón bě dopołdnja w kupnicy na Budyskej Kamjentnej hasy wšelake twory spakosćił a na to ćeknył. Sobudźěłaćer drje spyta jeho zadźeržeć, cuzy pak so jemu wutorhny. Při tym zhubi swoju móšeń, w kotrejž bě mjez druhim personalny wupokaz. Tak je paduch policiji tójšto dźěła zalutował.
Policija (16.03.21)
Žona njemdrje zachadźała
Hermanecy. Po wšěm zdaću měšeńca alkohola a drogow je předwčerawšim zasadźenje policije w Hermanecach we Łazowskej gmejnje wuskutkowała. 37lětna žona w swojim bydlenju hewrjekaše, ćisny piwowu blešu do dalšeje žony a randalěrowaše w bydlenju. Jako policisća zakročichu, so njemdra tež do nich da, tak zo dyrbjachu ju z domu wjesć. W bydlenju namakachu marihuanu, pola žony naměrichu 2,6 promilow alkohola.
Policija (15.03.21)
Policija (12.03.21)
Po njezbožu dale jěła
Wojerecy. 19lětna kolesowarka je so při wobchadnym njezbožu předwčerawšim rano we Wojerecach snadnje zraniła. Na křižowanišću njebě 52lětna wodźerka Caddyja po wšěm zdaću předjězbu młodostneje wobkedźbowała a zajědźe do njeje. Wuchowanske awto dowjeze zranjenu do chorownju, kotruž móžeše 19lětna bórze na to zaso wopušćić. Pozdatna zawinowarka njezboža bě po informacijach policije prosće dale na dźěło jěła. Swoje personalije pak wona njezawostaji a tež na policiju čakała njeje. Přiwšěm móžachu ju identifikować, dokelž sej kedźbliwy swědk čisło jeje awta spomjatkowaše a policiji posrědkowaše. Žona změje so nětko lochkomyslneho zranjenja ćěła a ćeknjenja z městna njezboža dla zamołwić.
Policija (11.03.21)
Třělby kradnyli
Mikow. Njewšědnu rubiznu wupytali běchu sej njeznaći minjene dny w Mikowje (Mücka). W času wot pjatka popołdnja hač do wutory ranja zadobychu so tam do bydlenskeho domu. Přepytawši wšitke rumnosće pak njejsu pjenjezy abo debjenki sobu wzali, ale tři třělby w cyłkownej hódnoće něhdźe 3 000 eurow. Jako wotpowědny kamor namócnje wočinichu, načinichu nimo toho něhdźe 2 000 eurow wěcneje škody.
Drogi namakali
Kamjenc. Podhladneho kolesowarja chcychu policisća předwčerawšim wječor na Wojerowskej dróze w Kamjencu kontrolować. Tón drje najprjedy ćekny, dźakowano pokiwam wobydlerjow pak jeho pozdźišo w bydlenju znateho hromadźe z dalšimaj mužomaj lepichu. Tam wuhladachu zastojnicy na blidźe wjacore titki marihuany. Tak hišće dalšej bydleni w Lessingowym měsće přepytachu, hdźež su tohorunja drogi, zapakowanski material a za to trěbne utensilije zwěsćili. Wšitko to kaž tež mobilny telefon a kontowe wućahi policisća sćazachu. Wšitcy třo změja so nětko přeńdźenja přećiwo zakonjej wo wopojnych srědkach sudnisce zamołwić.
