Policija (20.08.20)
Rentnarjow zjebali
Mužakow. Z tak mjenowanym šokowym telefonatom staj njeznataj minjene dny w Mužakowje wot dweju rentnarjow pjećcyfrowu sumu pjenjez wulišćiłoj. Při telefonje wudaštaj so jako policistaj a powědaštaj, zo trjeba přiwuzna staršeju ludźi nuznje pomoc, hewak dyrbi hnydom do jastwa. Rentnarjej staj to bohužel wěriłoj a pjenjezy přepodaštaj.
Policija (19.08.20)
Pytanje za zhubjenym přetorhnyli
Stróža. Dokelž bě pytanje za zhubjenym 44lětnym w Olbje pola Stróže tež wčera bjez wuspěcha, za nim najprjedy raz dale nurić njebudu, zdźěli policija. Specielnje wukubłane psy su póndźelu na bliskimaj městnomaj reagowali. Na njej su so wčera při nurjenju koncentrowali, bohužel bjez wuspěcha. Olba je tam něhdźe 20 metrow hłuboka, tak zo je nurjenje jara wobćežne. Nimo toho nurjacy pod wodu lědma pjeć metrow daloko widźa. Nětko policija a wuchowanske mocy wo nowej strategiji rozmysluja. Přiwšěm tež přichodne dny čołmiki policije po Olbje dale pojědu.
Policija (18.08.20)
W Olbje dale pytaja
Stróža. Minjeny kónc tydźenja přetorhnjene pytanje za zhubjenym mužom w Olbje pola Stróže su wčera pokročowali. Tak zasadźichu specielnje wukubłane psy z Durinskeje. Wone zamóža ćěła zemrětych namakać a čuja, hdyž bychu płuny z ćěła na powjerch wody přišli. Na te wašnje so nadźijeja, zo móža městnosć, hdźež móhł zhubjeny 44lětny być, lěpje lokalizować a tam potom nurjakow zasadźić. Tež dźensa su wot dopołdnja w jězoru dale pytali.
Policija (17.08.20)
Smjertnej woporaj
Hamor. Na lěsnym puću na terenje LEAG pola Hamora je so sobotu wječor smjertne wobchadne njezbožo stało. 55lětny wodźer Nissana zajědźe w prawej křiwicy na lěwy bok jězdnje a zrazy do wjacorych błudźenkow. Při tym jězdźidło zwróći a 43lětny sobujěducy bu z awta ćisnjeny. Wón hišće na městnje njezboža zemrě. Hižo pjatk wječor bě na zwjazkowej dróze B 156 pola Hamora 50lětny sobujěducy žiwjenje přisadźił, jako do jeho VWja frontalnje Opel zrazy.
Policija (14.08.20)
Znowa so paliło
Šešow. Lěsny woheń hašeć dyrbjachu wohnjowi wobornicy wčera připołdnju wokoło Rakec. Njedaloko zwjazkoweje dróhi B 96 pola Šešowa je so w lěsu wospjet paliło. Płomjenja rozpřestrěchu so po płoninje něhdźe dweju hektarow. Dokelž nihdźe žanu wodu klumpać njemóžachu, dyrbjachu dalše tankowe jězdźidła alarmować. Hakle 26. julija bě so na samsnym městnje paliło.
Policija (13.08.20)
Wjetšej škodźe zadźěwali
Prawoćicy. Dźakowano kedźbliwemu wobydlerjej su w nocy na srjedu w Prawoćicach wjetšej škodźe přez wulki woheń zadźěwali. Tam běchu so wjacore jědle a konifery zapalili. Po prěnich dopóznaćach wuchadźachu płomjenja z tam składowaneje wotsyčeneje trawy. Pódla stejacy bencinowy trawusyčak woheń hišće powjetši. Wohnjowi wobornicy wšitko zhašachu, tak zo njemóžachu płomjenja na bydlenski dom přeskočić.
Policija (12.08.20)
Šofer Opela zemrěł
Kulow. Wobchadne njezbožo ze smjertnym wukóncom je so předwčerawšim dopołdnja na statnej dróze S 285 mjez Kulowom a Brěžkami stało. Bjeztoho zo by dalše jězdźidło wobdźělene było, zajědźe 84lětny wodźer Opela z puća, přejědźe wobchadnu kupu a zrazy do płotu ležownosće. Dowjezši jeho do chorownje móžachu jenož hišće smjerć muža zwěsćić. Najskerje měješe wón hižo do njezboža medicinski problem.
Policija (11.08.20)
Na křižowanišću njekedźbował
Liboń. Na statnej dróze S 100 pola Libonja je so wčera wječor ćežke wobchadne njezbožo stało. VW bě z Budyšina do Kamjenca po puću. Z Łusča přijěducy Peugeot pak awto na hłownej dróze přewidźa a zrazy do njeho. Šofer VWja zhubi kontrolu nad awtom a zwróći. Ćežko zranjeneho dowjezechu jeho do chorownje. Pola wodźerja Peugeota naměrichu 0,38 promilow alkohola w kreji.
Policija (10.08.20)
Elektrokolesy pokradnyli
Zahor. Dokelž bě runje něchtó dwě elektrokolesy z jeho ležownosće w Zahorju (Sagar) pola Krušwicy (Krauschwitz) blisko Běłeje Wody pokradnył, je so sobotu dopołdnja muž na Běłowodźanskim policajskim rewěrje přizjewił. Wokoło 9 hodź. bě wón hakle swoje elektrisce podpěrane dwukoleso do kólnje stajił, hdźež tež te jeho mandźelskeje steješe. Jako wón dobru hodźinu nimo wočinjeneje kólnje dźěše, dyrbješe wustróžany zwěsćić, zo wobě kolesy tam hižo njeběštej. Kaž policija zdźěli, stej wonej hromadźe něhdźe 3 400 eurow hódnej.
Policija (07.08.20)
Kontrola wuspěšna była
Wojerecy. Dobry čuch mějachu policajscy zastojnicy, jako su předwčerawšim wječor na Wojerowskim Lipjecskim naměsće dwě wosobje kontrolowali. Pola 24lětneho muža a 20lětneje žony namakachu kristaline wopojne srědki. Nimo toho měješe młoda žona nastroje za konsum drogow, tak mjenowany jednoručny nóž a koleso z pobrachowacym ramikowym čisłom při sebi. Uniformowani wšitko sćazachu. Nimo toho přizjewichu tři delikty, z kotrymiž so nětko kriminalna policija bliže zaběra, mjenujcy podhlad na njedowolene wobsydstwo wopojnych srědkow, přeńdźenje přećiwo zakonjej wo brónjach a podhlad potajerstwa (Hehlerei).
