Statny dokument frizisce

póndźela, 21. januara 2019
artikl hódnoćić
(0 )

Nordfriisk Instituut a Schleswigsko-Holsteinska zrěčenje podpisałoj

Kiel/Bredstedt (SN). Prěni króć we wjace hač tysaclětnych stawiznach Sewjernych Frizow su statny dokument w frizišćinje sformulowali. Statny sekretar Dirk Schrödter, nawoda schleswigsko-holsteinskeje statneje kenclije, a Inken Völpel-Krohn, předsydka nošerskeho towarstwa Nordfriisk Instituuta w Bredstedće, staj 11. januara w Kielu friziske wudaće zaměroweho a wukonoweho dojednanja instituta ze Schleswigsko-Holsteinskej pod mjenom „Oufmåågede müülje ån lååstinge 2018-2021“ podpisałoj. Zrěčenje zaruča Nordfriisk Instituutej financnu planowansku wěstotu hač do lěta 2021 a předleži w němskim wudaću hižo wot lěta 2018. Zwjazkowy kraj Schleswigsko-Holsteinska je jedyn z najwjetšich spěchowarjow mjenowaneje slědźenskeje institucije. Dalše připokazanki dóstanje Nordfriisk Instituut wot sewjerofri­ziskeho wokrjesa, města Bredstedta (sewjerofrizisce: Bräist), ze stron třěšneho zwjazka Sydslesvigsk Forening a z přinoškow wjace hač 700 čłonow nošerskeho towarstwa instituta.

wozjewjene w: Kraj a swět
Prošu přizjewće so, chceće-li komentar podać

Serbska debata

nowostki LND