Krótkopowěsće (24.04.15)

pjatk, 24. apryla 2015
artikl hódnoćić
(0 )

Sakske myto pčołarjej spožčił

Lipsk. Sakski ratarski minister Thomas Schmidt (CDU) je Połčničanskemu pčo­łarjej Rolfej Wunderlichej na ratarskej přehladce Agra w Lipsku spožčił Sakske myto za plahowanje zwěrjatow 2015. Tak hódnoćeše jeho dźěło jako pčołar, kiž je ja­ko prěni swobodneho stata přewjedł kumštne wopłodźenje matki.

Perspektiwy za sylne město

Budyšin. Hospodarski forum z něhdyšim sakskim ministerskim prezidentom prof. dr. Georgom Milbradtom wotmě so wčera w přihotach na wólby Budyskeho wyšeho měšćanosty. Přeprosył bě kandidat CDU Matthias Knaak. Prof. Milbradt wěnowaše so w swojim přednošku hospodarskim šansam srjedźostawskich zawodow w Budyšinje a wokolinje.

Přihotuja festiwal

Chrósćicy. Přihoty Mjezynarodneho folklorneho festiwala „Łužica 2015“ běchu jedna z temow wčerawšeho pose­dźenja Chróšćanskeje gmejnskeje rady. Na sydom statokach – jednym wjace hač před­ lětomaj – su wobydlerjo nětko w horcej fazy přihotow, zo bychu tam folklorne skupiny festiwalnu sobotu swoje programy předstajić móhli. Tež gmejna po swojich móžnosćach pomha.

Kónc za Sednjewa

Salzburg. Kaž Mjezynarodny biatlo­nowy zwjazk zdźěla, je ukrainskemu biatletej Sergejej Sednjewej zakazał, so dwě lěće na wubědźowanjach wobdźělić. W januarje 2013 běchu Sednjewa w Antholzu zwonka wubědźowanja kontrolowali a pozitiwnje na doping testowali. Mjeztym pak je Ukrainjan karjeru zakónčił. Čas zakaza wuběži lětsa w decembrje.

Bayerojo přećiwo Barcelonje

Nyon. Europski koparski zwjazk je dźensa połfinalnej partiji za champions league wulosował. Němski rekordny mišter FC Bayern Mni­chow­ nastupi 5. meje w Špani­skej pola FC Bar­celony w tam­nišim stadionje Camp Nou. Wróćohra budźe 13. meje w Mnichowje. Dalša połfinalna partija rěka Juventus Turin – Real Madrid. Domjacu lěpšinu změje najprjedy Juventus.

wozjewjene w: Krótkopowěsće
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND