Berlin (dpa/SN). Prezident Berlinskeho domu zapósłancow Ralf Wieland chce, zo so na twar Berlinskeje murje 13. awgusta 1961 njezabudźe. „Čas murje njesměli nihdy zabyć, wona dźě słuša kruće do stawiznow našeho města“, Wieland wčera zdźěli. Před 59 lětami bě tehdyša NDR započała Berlinsku murju twarić a tak dźělenje Němskeje doskónčnje zwoprawdźić, štož so hakle z wotewrjenjom murje 9. nowembra 1989 skónči.

Miliony ludźi dyrbjachu dlěje hač 28 lět z murju žiwe być. Swójby buchu roztorhane, přećeljo a lubowacy dźěleni, Wieland rjekny. Ći, kotřiž so na puć do swobody zwažichu, su to častodosć ze swojim žiwjenjom zapłaćili. „Berlin wostanje město swobody. Na mortwych při muri njesměmy nihdy zabyć!“

Dźensa je Wieland zhromadnje z Berlinskim knježacym měšćanostu Michaelom Müllerom (SPD) a kulturnej statnej sekretarku Moniku Grütters (CDU) wopory murje wopominał. Po studiji fachowcow je při Berlinskej muri znajmjeńša 140 ludźi žiwjenje přisadźiło.

Přirodoškitnej zwjazkaj namołwjatej, přirodźe wodu zaso wróćić

Drježdźany (SN). Hladajo na tuchwilnu suchotu stej Zelena liga Sakskeje a přirodoškitny zwjazk Sakskeje (NaSa) zamołwitych namołwjałoj, zmylki zašłosće skorigować a přirodźe nuznje trěbnu wodu zaso wróćić, město toho zo dalšemu wusušenju polěkuja. „Sucha póda, pobrachowacy dešć, strach lěsnych wohenjow – aktualne połoženje wjedra dla fachowcow aktiwizuje warnować před sćěhami klimoweje změny dla. Wodźacy zastupnicy ratarstwa a lěsnistwa so žałosćenju přizamkuja“, rěka w nowinskej zdźělence mjenowaneju organizacijow.

Zo bychu wužiwanje pódy optiměrowali, su so w ratarstwje a zdźěla tež w lěsach z hrjebjemi a podzemskimi rołami wo to postarali, zo woda tak spěšnje kaž móžno wotběži, přirodoškitarjo kritizuja. Přirodne žórlišća a małe rěčki buchu tak zničene, włóžne kónčiny so zhubichu. W Sakskej njewobsteji w ratarstwje hižo žane přirodne žórlišćo. Na płoninach, kotrež běchu něhdy włóžne a bohate na družiny rostlin, steja dźensa monokultury šmrěkow, přirodoškitarjo zwěsćeja.

Mały njetopyr je so do policajskeho ­rewěra w badensko-württembergskim Ludwigsburgu zabłudźił a so tam na zapinak swěcy powěsnył, zo by sej swój spar popřał. Kolegina měješe to spočatnje za žort, bórze pak zwěsći, zo jedna so woprawdźe wo žiwe zwěrjatko. „Dokelž pak njeje na policajskim rewěrje měrny spar móžny, pušćichu kolegojo njetopyrja z woknom běrowa do swobody“, pisaja zastojnicy w interneće.

Bjez chwatka je so 32lětny zadobywar po wili w Berlinje-Wilmersdorfje rozhladował a w nocy k tomu hišće swěcu zapinył. Wón běhaše w kupanskich toflach wobsedźerja – kiž njebě doma – po chěži. Kedźbliwy susod pak informowaše policiju, wuhladawši swěcu w domje. Nětko chcedźa pruwować, hdy je so podhladny do wile zadobył a hač tam scyła něšto pobrachuje.

Beirut/Berlin (dpa/SN). Dobry tydźeń po zahubnym rozbuchnjenju amonijoweho nitrata w Beirutskim přistawje je zwjazkowy wonkowny minister Heiko Maas (SPD) městno katastrofy wopytał. Na dźeń trajacym wopyće w stolicy Libanona chcyše wón ze zamołwitymi wo hospodarskej pomocy rěčeć a so zdobom za hłuboko sahace reformy w kraju za­sadźeć. Němska je dotal 20 milionow ­eurow pomocy přilubiła. Hoberska detonacija wčera tydźenja bě sej 165 mortwych a 6 000 zranjenych žadała.

Ličby korony přiběrace

Berlin (dpa/SN). Ličba wšědnje wozjewjenych nowych natyknjenjow z koronawirusom w Němskej je najwjetša wot spočatka meje docpěła. Strowotniske zarjadnistwa su Roberta Kochowemu institutej wčera 1 226 padow w běhu dnja zdźělili. Wjetša bě ličba naposledk jeno 9. meje z 1 251 nowoinfekcijemi. Ličba je strowotniskemu ministrej Jensej Spahnej (CDU) „přičina so starosćić“. Jemu je to dopokaz, zo su ludźo we wobchadźenju z wirusom dale a lochkomyslniši.

Do šule z nahubnikom