Start wupadnył

štwórtk, 28. meje 2020 spisane wot:
Cape Canaveral (dpa/SN). Špatne wjedro je prěnjemu lětej ameriskeje swětnišćoweje kapsle po dźewjeć lětach zadźěwało. Štwórć hodźiny do wotlěta su start wotprajili. Na to dyrbještaj astronawtaj Robert Behnken a Douglas Hurley zaso wulězć. By to prěni raz po lěće 2011 było, zo móža USA ze swójskej raketu k swětnišćowej staciji ISS lećeć. Dotal su stajnje z ruskimi raketami sobu byli. Zajutřišim, sobotu, chcedźa znowa wotlećeć spytać.

Pomocnicy nuznje trěbni

štwórtk, 28. meje 2020 spisane wot:

Lubin (dpa/SN). Plahowarjo a předźěłarjo Błótowskich kórkow pytaja nuznje sobudźěłaćerjow. „Mnohe zawody su na pomocnikow z wukraja pokazane“, rjekny Melanie Kosacojc, jednaćelka Błó­towskeho towarstwa powěsćerni dpa. W aprylu wobzamknjene dojednanje, sezonowych dźěłaćerjow za žně sadu a zeleniny do kraja dać, płaći drje dźak podlěšenju přez zwjazkowe knježerstwo hač dosrjedź junija, přiwšěm wone njedo­saha. „Žně kórkow zahajimy prawdźepodobnje hakle w druhej połojcy junija“, praji Kosacojc.

Dojednanje ze Zwjazkom pak njepłaći za předźěłanske zawody. Dyrbjeli-li mjezy dale zawrjene wostać a njebychu-li dojednanje sezonowych dźěłaćerjow dla znowa podlěšili, by branša před wulkim problemom stała. „Trjebamy za plahowanje a předźěłanje kórkow něhdźe 3 200 wukrajnych dźěłowych mocow“, Kosacojc rozłoži.

Kórki předźěłace zawody słušeja k najwjetšim dźěłodawarjam w Błótach. Pomocnikow trjebaja we wšitkich wobłukach produkcije. Wjetšina z nich je poprawom ze susodneje Pólskeje.

Staršim w krizy bóle pomhać

štwórtk, 28. meje 2020 spisane wot:

Berlin (dpa/SN). Zwjazkowy sejm je dźensa rozsudźił, powołansce dźěłacych staršich a gastronomiju koronawirusa dla sylnišo podpěrać. Maćerje a nanojo, kotřiž njemóža wobmjezowaneho dźěła pěstowarnjow a šulow dla sami na dźěło hić, dóstanu dlěje pjenjezy wot stata. Narunanje mzdy njepłaća přichodnje jeno šěsć, ale hač do 20 tydźenjow.

W samsnym zakonju su wobzamknyli, nadhódnotowy dawk za jědźe w hosćencach wot 19 na sydom procentow znižić. Płaćić ma to wot julija na jedne lěto. Tak chcedźa mějićelam hosćencow a kofejownjow pomhać, přisadźene wobroty po skónčenju pandemije znajmjeńša zdźěla zaso narunać.

Na spočatku posedźenja je zwjazkowy sejm nowu społnomócnjenu parlamenta za Zwjazkowu woboru spřisahał. Eva Högl (SPD) bě připowědźiła, so dokładnišo z prawicarskim ekstremizmom we wójsku rozestajeć. Najnowši nastork su wjacore pady ekstremizma w specialnej jednotce KSK. Pola jednoho z wojakow běchu samo skład bróni a municije namakali.

„Nowe instrumenty“ za Łužicu

štwórtk, 28. meje 2020 spisane wot:

Studija namjetuje wurjadne hospodarske pasmo za čas po brunicy

Berlin/Drježdźany (dpa/SN). Łužica měła so po měnjenju strony liberalnych z wurjadnym hospodarskim pasmom stać, zo móhł so kónc zmilinjenja brunicy radźić. Rozmach we wobłuku strukturneje změny je móžny, hdyž zamołwići skutkowne naprawy nastorča, rjekny Drježdźanski zapósłanc FDP w zwjazkowym sejmje Torsten Herbst w Drježdźanach. Tam bě wón do toho zhromadnje z městopředsydu frakcije Michaelom Theurerom najnowšu studiju Instituta němskeho hospodarstwa w Kölnje předstajił a rozłožił.

Miliony eurow hudźbnikam

štwórtk, 28. meje 2020 spisane wot:

Mnichow (dpa/SN). Towaršnosć za zachowanje prawow hudźbnikow Gema je loni wot zarjadowarjow koncertow, diskotekarjow, rozhłosowych sćelakow a internetnych słužbow 1,07 miliardow eurow nazběrała. Nětko chce wona na wšě 906 milionow eurow na dobro dweju milionow komponistow, tekstowych awtorow a hudźbnych nakładnikow wudać. „Hladajo na aktualne wuwiće skutkuje jara dobre wobchodniske lěto 2019 za našich čłonow kaž krizowy airbag“, rjekny šef předsydstwa Harald Heker wčera w Mnichowje. „Mnohim wuměłcam wupłaćenje pjenjez pomha dale wobstać.“

Najwjetši podźěl dochodow pochadźa znowa z hudźbnych zarjadowanjow, kotrež su loni „přewšo dobreho koncertneho lěta dla“ na 407 milionow eurow přiběrali. Dochody z rozhłosa a telewizy porno tomu woteběraceho wabjenja dla snadnje na 295 mio. eurow spadnychu. Třeći najwjetši blok płaćerjow su mjeztym internetne posłužby: Dochody přiběrachu wo 72 procentow na 182 mio. eurow. Gema zastupuje awtorske prawa 78 000 komponistow, awtorow a nakładnikow po cyłym swěće.

To a tamne (28.05.20)

štwórtk, 28. meje 2020 spisane wot:

Po zahrodźe kralowskeho palasta joggować smě wot najnowšeho britiski premierminister Boris Johnson. Kralowna Elizabeth II. bě jemu to wosobinsce dowoliła. Johnson chce po přetratej chorosći na koronawirus swoje ćěło zaso sylnić. Z wěstotnych přičin pak je 55lětnemu zakazane w zjawnosći běhać. Premiera běchu něšto dnjow na intensiwnej staciji Londonskeje chorownje lěkowali.

Róžojty hołb jako pozdatny spion je konflikt mjez Indiskej a Pakistanom nachwilnje přiwótřił. Indiscy wojacy běchu hołbja popadnyli, kotryž bě ze znjepřećeleneho Pakistana přilećał. Na nóžce měješe rynku z čisłom. Krótko na to přizjewi so muž z pakistanskeje wsy a rjekny, zo hołb jemu słuša a zo jeho za wulke wubědźowanje trenuje. Kode na rynce bě telefonowe čisło plahowarja.

Wubědźowanje přesunjene

srjeda, 27. meje 2020 spisane wot:

Drježdźany (SN/BŠe). Cyłozwjazkowe wubědźowanje „Naša wjes ma přichod“ přesunu koronapandemije dla na lěto 2023. Zašłe wurisanje bě delnjołužiska wjes Dešno dobyła. Zwjazkowa ministerka za ratarstwo a zežiwjenje Julia Klöckner (CDU) je zastupnikam wsy w januaru wopismo, medalju a mytowy pjenjez přepodała. Za přichodne wubědźowanje smědźa so zajimcy dale přizjewić, wšako su organizatorojo přizjewjenski čas wotpowědnje podlěšili.

Tež 11. sakske krajne wubědźowanje „Naša wjes ma přichod“, kotrež stajnje do zwjazkoweho přewjeduja, budźe hakle w lěće 2022. Přizjewić smědźa so za nje sydlišća, kotrež maja wjace hač 3 000 wobydlerjow. Přewjesć smědźa hižo wjesne dźěłarnički, wěstotne naprawy infekciskeho škita maja pak so dodźeržeć. Dźěłarnički zmóžnjeja lěpšu komunikaciju a su bytostne za wuwiće zhromadneho projekta, zdźěli wčera sakski statny minister za regionalne wuwiće Thomas Schmidt (CDU). „Runje nětko sej ludźo we wjesnych kónčinach wuwědomjeja, kak wažna zhromadnosć je“, minister Schmidt wuzběhny.

Policija racije nachwatała

srjeda, 27. meje 2020 spisane wot:

Lipsk (dpa/SN). Zwjazkowa policija je dźensa rano w sydom zwjazkowych krajach wjace hač dźesać racijow nachwatała, kotrež dyrbjachu minjene tydźenje koronawirusa dla přestorčić. Policisća přepytachu tež tři bydlenja w Sakskej. Při tym dźěše wo podhlad pašowanja ludźi, wo organizowane fiktiwne mandźelstwa, wo falšowane wupokazy a wo internetne wobšudnistwo.

USA hroža ze sankcijemi

Berlin (dpa/SN). USA wojuja dale přećiwo dotwarej němsko-ruskeho płunowoda w Baltiskim morju Nord Stream 2. Rozžohnowacy so wulkopósłanc USA w Němskej Richard Grenell připowědźa w dźensnišim wudaću nowiny Handelsblatt dalše sankcije přećiwo Němskej. Zdobom wón zwjazkowe knježerstwo namołwja, politiku napřećo Ruskej zasadnje změnić. Němska dyrbi přestać „bestiju dale picować“, město toho zo dosć za NATO njepłaći. Nord Stream 2 AG hro­ženja jako „njezakonsku diskriminaciju europskich předewzaćow“ wotpokazuje.

Z awtom do hosćenca zrazył

Čestnohamtscy wuchowarjo sornjatkow maja tele dny wjele dźěła. Tele štyri do pjeć dnjow stare hojo běchu pomocnicy minjenu nóc njedaloko delnjosakskeho Seesena z pomocu truty namakali a móžachu je rano wuchować. Po trochowanju fachowcow kóžde lěto dźesaćitysacy tajkich młodźatow syčawow dla zahinu. Foto: dpa/Swen Pförtner

Politikarjo: Mjezu spěšnje wotewrěć

srjeda, 27. meje 2020 spisane wot:

Rosow/Rosówek (RD/SN). Politikarjo z Braniborskeje, Mecklenburgsko-Předpomorskeje a Pólskeje sej zhromadnje žadaja, wotewrěć němsko-pólsku mjezu za tak mjenowany mały přezmjezny wobchad hišće do 12. junija. Za to su so społnomócnjena Braniborskeje pola Zwjazka, Jutta Jahns-Böhm, jeje Schwerinski kolega Patrick Dahlemann kaž tež maršal Zapadopomorskeho wojewódstwa Olgierd Geblewicz póndźelu na zawrjenym namjeznym přechodźe Rosow/Rosówek na sewjerozapadźe Braniborskeje zetkali. W krótkich narěčach na woběmaj stronomaj přechoda žadachu sej woni wotewrjenje mjezy. Nimo toho wobroćichu so z listom na knježerstwo we Waršawje.

Pólska, kiž bě mjezu w měrcu jednostronsce zawrěła, chce dalše wolóženje wobmjezowanjow koronawirusa dla najzašo po 12. juniju zmóžnić.

Serbska debata

nowostki LND