Widźał, słyšał, napisał (13.03.18)
„Hdyž sej mysliš, zo mysliš, potom sej jenož mysliš, zo mysliš ...“ – Chróšćanske druhe koparske mustwo ma nowu „kmótru“. Juliane Werding je jemu minjenu sobotu tři wažne dypki přećiwo kontrahentej z Lubuša zawěsćiła. Haj, tak to je. W kabinach Sokoła spěwa Měrćin Štrawba, za Horjansku rezerwu su to němske šlagry. Nastało bě wšitko při jědnatce, přeradźi mi nadběhowar Chróšćanow a zamołwity za hudźbu w kabinje. Wo kotru jědnatku so tu jedna, jědnatku při kopańcy abo znatu sobotnu zabawu, wšak nochcyše mi rjec. Ćim rjeńšo, zo stej kónc tydźenja wobě zastupnistwje koparjow SJC z dobyćom do druheje połserije startowałoj. Štó by sej to myslił?
Wonkowne dobyće wohrožene njebyło
Viktoria Worklecy 92 – Módro-běli Wojerecy II 0:3 (22:25, 18:25, 22:25)
Za Worklecy hrajachu: Jan Bětnar, Ludwig Eckert, Stefan Gedik, Jurij Lipič, Marcel Rjelka, Daniel Wałda a Stephan Wjeńka. Poradźowar: Mato Eckert
Partiju hišće zwjertnyli
FC Energija Choćebuz – Berlinski AK 07 2:1 (0:1)
Za FCE hrajachu: Spahić – Starcew (59. Graudenz/80. Gehrmann), Stein, Matuwila, Schlüter, Kruse (59. Scheidhauer), Weidlich, Viteritti, Marcelo, Zimmer, Mamba
Do duela bě trenar FC Energije Choćebuz Claus-Dieter Wollitz swojim chowancam hišće raz sylnosće štwórteho tabulki rozłožił. Do hry so woni přiwšěm ćežko namakachu. Ataki Berlinskich koparjow njedowolichu jim žadyn porjadny hrajny natwar. Do wobraza hodźeše so tež wólny kop Deniza Tunayja, kiž ze zdalenosće 18 metrow w 15. min. k 0:1 trjechi. Na to je so wěstota FC Energije dospołnje pominyła.
W přestawce Choćebuski trenar swojich chowancow namołwi: „Dźiće won, třělće dwoje wrota, zo bychmy sej dźensa tři dypki zachowali a w meji z podobnej hru do 3. ligi zaćahnyli.“ A domjacy to, pozbudźeni wot frenetisce wyskaceho publikuma, činjachu. Najprjedy trjechi Streli Mamba z padom dozady (15. wrota sezony w 15. hrě) k 1:1 (69.), štyri mjeńšiny pozdźišo přetwori kapitan Mark Stein wotskočeny bul k nawjedowanju 2:1. (73.). Nětko FCE předskok wušiknje zakitowaše a mocy hosći dale a bóle popu- šćachu. Georg Zielonkowski
Tři dypki bohužel z rukow dali
FSV Łuty – SJ Njebjelčicy 3:3 (1:2)
Zestawa hosći: Hahn – Hoelzel, Hrjehor, Pawlik, Hanuza, Haška, Kral (90. Domš), Lejnart, Šołta, Ričel, Korjeńk (82. Zeller)
Hižo zahe nawjedowachu koparjo Njebjelčanskeje SJ we Łutach z 0:1 (5.) přez wrota Handrija Korjeńka. Domjacy w 23. min. wurunachu. Wosom mjeńšin pozdźišo pak postara so Robert Lejnart wo druhe wrota za swój cyłk.
W 70. min. trjechi Florian Ričel po super přihrawce Stefana Krala k 1:3. Wěsty předskok a tři móžne dypki pak su hosćo lochkomyslnje z rukow dali. Łutowčenjo přeprěčichu ze spěšnymi a direktnymi přihrawkami často srjedźne polo a docpěchu w 75. min. wrota k 2:3. A pjeć minutow do kónca samo wurunachu.
W tabulce wokrjesneje ligi-stafla 2 steji SJ Njebjelčicy dale na šestym městnje. Přichodnu njedźelu hraje wona zaso doma, a to wot 15 hodź. přećiwo SV Haselbachtalej. Bjarnat Deleńk
Ze zymskeho spara wotućili
Zo pola serbskich kehelerjow Sokoła Ralbicy/Hórki w aktualnej hrajnej dobje jara derje njeběži, pokazuja wuslědki dypkowych hrow. Wosebje w předposlednjej a předpředposlednjej partiji sy sej myslić móhł, zo njejsu hišće ze zymskeho spara wotućili. W duelu pola druheho tabulki ST wozydłownistwo Kamjenc II pak pokazachu nětko sensacionelny wukon.
Jako prěnjej dyrbještaj Achim Kral a Gisbert Šiman na čarje. Kral z 369 drjewami njebě ze sobu cyle spokojom, Šiman ze 432 pak połnje přeswědči. Šimanowy kontrahent a Kralowy přećiwnik běštaj hišće lěpšej a spowaleštaj 25 kehelow wjace. Handrij Hejduška kuleše kaž w starych časach a spowala 435 kehelow. Hans-Joachim Šěn, hewak nic najsylniši, kuleše nad swojimi móžnosćemi a spowala 420 kehelow. Znowa běštaj Sokołaj wo 30 drjewow špatnišej. Tak dyrbještaj Tobias Mikławšk a Jurij Šiman zastatk 55 kehelow nachwatać. Kamjenskaj hrajerjej přesłapištaj na cyłej liniji. Mikławšk ze 434 a Šiman ze 413 drjewami wotewzaštaj jimaj 103 dypki. Sokoljo radowachu so nad njewočakowanym dobyćom 2503:2455 drjewow. Franc Nowak
Partija přerězna była, wjac pak tež nic
ST Marijina hwězda – LSV Nowe Město II 3:0 (1:0)
Zestawa domjacych: Matik – Wróbl, Škoda, Rab, R. Hawš (46. Lipič), Jurš, Kuring, O. Hawš, Schmidt, Eldor (75. Čornak), Pakoßnick (78. Prasse)
W skerje srěnjej partiji wokrjesneje koparskeje ligi přesadźi so faworizowana ST Marijina hwězda přećiwo słabym hosćom z Noweho Města z 3:0. Při nalětnich temperaturach běchu domjacy hru postajacy. Hižo po 120 sekundach poskići so jim dobra móžnosć, jako steješe Richard Hawš po róžku Paula Schmidta nadobo dospołnje swobodny. Hawšowa třělwa ze zdalenosće dweju metrow pak prasny do Jakoba Pakoßnicka na wrotowej liniji. Dalši Schmidtowy róžk wjedźeše k 1:0 (8.) přez Alija Eldora, kiž bul ze zdalenosće pjeć metrow do wrotow zhłójčkowa. Prawa hrajna kultura pak bě w rjadach Pančičanow hakle po něhdźe poł hodźinje spóznajomna. Hosćo čakachu w tej fazy hry na kontery. We 38. min. dóstachu woni wólny kop w zdalenosći 25 metrow. Z wulkotnej paradu pak wrotar Dawid Matik wurunanju zadźěwa.
Wuslědki (13.03.18)
Kopańca, regionalna liga muži
Budissa Budyšin – BFC Dynamo 1:2 (0:0)
Neustrelitz – Hertha BSC II 1:1 (1:0)
Energija Choćebuz – Berlinski AK 2:1 (0:1)
Chemija Lipsk – Meuselwitz 2:0 (1:0)
Nordhausen – Luckenwalde 6:1 (2:1)
1. Energija Choćebuz 23 55 : 8 61
2. BFC Dynamo 20 50 : 22 40
3. Hertha BSC II 23 37 : 29 35
4. Nordhausen 20 29 : 13 34
5. Berlinski AK 23 34 : 35 32
6. Lok Lipsk 19 24 : 16 31
7. FC Viktoria 22 35 : 31 30
8. Fürstenwalde 21 36 : 34 30
9. Meuselwitz 21 27 : 24 28
10. Babelsberg 03 20 27 : 23 27
11. Halberstadt 20 33 : 33 26
12. Budissa Budyšin 21 18 : 26 25
13. Neugersdorf 21 28 : 38 24
14. Altglienicke 21 16 : 23 23
15. Chemija Lipsk 24 15 : 40 23
16. Auerbach 20 24 : 31 20
17. Neustrelitz 19 19 : 38 14
18. Luckenwalde 20 16 : 59 5
Bratrowstwo Róžant wurunane wurisanje dobyło
36. wolejbulowy turněr Serbskeho Sokoła wo pokal Domowiny
Zaso raz w serbskich rukach běše sobotu wulka sportowa hala na Budyskim Třělnišću. 15 wolejbulowych mustwow bě přichwatało, dokelž chcychu wo pokal Domowiny wojować. Hladajo na ličbu přizjewjenjow bě drje to w minjenym lětdźesatku najmjenje, za to pak bě turněr jedyn z najwurunanišich scyła. Faworita wubědźowanje tuž žanoho njeměješe, a hač do poslednjeje sekundy bě napjatosć wulka, komu drje předsyda Domowiny lětuši pokal přepoda. Hižo při zahajenju pak dósta Měrko Šmit z Worklec wot předsydstwa Serbskeho Sokoła wopismo, dokelž je so mjeztym 35. raz jako hrajer na najwjetšim serbskim wolejbulowym turněrje wobdźělił.
W třoch staflach wojowachu wobdźělnicy po pjeć mustwach najprjedy wo prěnjej městnje w tabulkach. Po dlěšim času njejsu sobotu na čas hrali, ale wo stajnje dwě dobyćerskej sadźbje hač do 15 dypkow. Serbski Sokoł bě modus na próstwu někotrych hrajerjow změnił. Hry běchu tuž měrniše, mustwa njemějachu časowy ćišć a móžachu so bóle na swójsku hru koncentrować.
Wšitko derje wotběžało
Tež 36. wolejbulowy turněr Serbskeho Sokoła wo pokal Domowiny je ze wšěch stron pozitiwny wothłós žnjał. Někotre prašenja pak přiwšěm zbychu. Po turněrje je so Jurij Bjeńš za sportowu redakciju SN ze starostu Serbskeho Sokoła Milanom Funku rozmołwjał.
Knježe Funka, Wy sće srjedź turněra w chorowni był, čehodla?
M. Funka: John Petrik z mustwa Serbski dom je so w skupinskej hrě zranił a dyrbješe so w chorowni přepytować dać. Je pak ju mjeztym hižo wopušćił. Dohromady mějachmy tónkróć wjac zranjenjow hač hewak, loni mi so zda žane, lětsa samo štyri.
Na dypki a nic na čas hrać je fungowało?
M. Funka: Z nazhonjenjow minjenych lět a z druhich turněrow wěmy, zo trajetej dwě sadźbje do 15 dypkow něhdźe 20 mjeńšin. Časowy plan pak su cyłki w swójskej režiji dodźerželi, wšako dyrbjachu so na hrajnišćach same starać. Při polach A, B, C a D wisachu hrajne plany, a kóžde mustwo měješe w mapje hišće cyłkowny přehlad hrow. Klětu zawěsće zaso bjez časoweho ćišća hrajemy.
Sym do turněra rozmołwu-diskusiju mjez hrajerku SGB-Miks a turněrowym nawodu Janom Hrjehorjom wobkedźbował. Što je tam było?
Sport (09.03.18)
Wo pokal Domowiny
15 volleyballowych cyłkow přewjedźe jutře wot 8.30 hodź. w sportowni na Budyskim Třělnišću 36. sokołski volleyballowy turněr wo pokal Domowiny. Mustwa zetkaja so we wosmich, štwórć hodźiny pozdźišo potom nastupja. Lětsa njebudu jednotliwe sadźby na čas wuhrate.
Kónctydźenska kopańca
10.03. 14:00 Budissa Budyšin –
BFC Dynamo
10.03. 14:00 Jednota Kamjenc –
TV Askania Bernburg
10.03. 15:00 ST Lubuš –
SJ Chrósćicy II
10.03. 15:00 FSV Oderwitz II –
SJ Chrósćicy
10.03. 15:00 Zeleno-běli Bukecy –
Rakečanske ST
10.03. 15:00 Módro-běli Kulow –
Wojerowski FC
11.03. 15:00 ST Wjelećin –
ST Radwor
11.03. 15:00 Sokoł Ralbicy/Hórki –
ST Budyšin
11.03. 13:00 FSV Łuty –
SJ Njebjelčicy
11.03. 13:00 ST Marijina hwězda –
Nowe Město II
Blidotenisowe duele
09.03. 19:00 DJK Konjecy –
MB Njeswačidło
09.03. 19:30 TTV 90 Biskopicy III –
ST 1922 Radwor
10.03. 16:00 Wóspork/Hrodźišćo –
Viktoria Worklecy
15.03. 19:00 SZ 1953 Čerwj. Noslicy –
ST 1922 Radwor
Volleyballowe dypkowe hry
Volleyballistki Viktorije Worklecy, Dźiwje micki, hraja jutře wot 14 hodź. w Budyšinje přećiwo rezerwje MSV Budyšina 04. Druhi tabulki, kiž je hižo pjeć hrow dobył, wočakuje předposlednjeho.
10.03. 14:00 MSV Budyšin 04 II –
Dźiwje micki (Worklecy)
17.03. 14:00 TSV Kundraćicy –
Marijine hwězdźički
