Hłowna zhromadźizna Europskeje swobodneje aliancy (EFA) je na schadźowanju 17./18. apryla 2015 w Budyšinje slědowacu deklaraciju schwaliła:
Podpěruja Witaj-pěstowarnju
Němcy. We wobłuku akcije „Twój projekt za Łužicu“ podpěruje Choćebuske předewzaće arvato Bertelsmann Witaj-pěstowarnju w Němcach, kotraž je w nošerstwje Serbskeho šulskeho towarstwa, z pjenježnym darom tysac eurow. Za to chcedźa hrajkanišćo znowa wuhotować a 1. junija k Mjezynarodnemu dnjej dźěsća wotewrěć.
Braniborska prěni króć pódla
Drježdźany. Prěni króć pisaja lětsa abiturienća ze sydom zwjazkowych krajow runočasnje abiturne pruwowanja, kotrež so jutře zahaja. Braniborska je so Schleswigsko-Holsteinskej, Mecklenburgsko-Předpomorskej, Bayerskej, Hamburgej, Delnjej Sakskej a Sakskej při pisanju identiskich nadawkow w němčinje, matematice a jendźelšćinje přidružiła.
Stawk so lědma wuskutkował
Budyšin. Stawk lokomotiwnikow Němskeje železnicy je Hornju Łužicu lědma potrjechił. Předewzaće jězdźi jenož mjez Wojerecami a Drježdźanami resp. Lipskom. Wšitke druhe čary zastaruja priwatne firmy kaž ODEG a Trilex. Tam njejsu stawkowali a móžachu jězbne plany dodźeržeć, ODEG a Trilex zdźělatej.
W Budyskim Serbskim muzeju koncertowaše chór Serbskeho ludoweho ansambla njedawno pod hesłom „hudźba romantiki a pózdnjeje romantiki“. Zarjadowanje, kotrehož hudźbny nawod měješe chórowy direktor SLA Gabriele Donà – na klawěrje přewodźeše spěwarjow Liana Bertók –, běše poměrnje derje wopytane.
Serbski podźěl něhdźe 50mjeńšinskeho koncerta wučinješe při tym runje 15 minutow. Tajki koncert, takrjec gala-disciplina kóždeho chóra, je bjezdwěla wužadanje. Zo zamóža ansamblowcy spěwać, njeje prašenje. Swój program zahajichu z wurězkom Antonína Dvořákoweho cyklusa morawskich spěwow, wobdźěłanych wot Leoša Janáčeka za chór z přewodom klawěra. Bohužel nałožowachu mało romantiskeho charaktera w interpretaciji: lědma ritardandow a fermatow, akcentow, dynamiki atd., město toho skoro stajnje jenake (spěšne) tempo w stajnje samsnej sylnosći zwuka. To wšak so w dalšim tež njepolěpši.
Wokomiknite njejasnosće a nowe tukanja wokoło přichoda łužiskeje brunicy wjedu k najwšelakorišim reakcijam. Wažne je, zo potrjechene komuny při tym na dobro wobydlerjow hladaja.
Socialne poradźowanje
Budyšin. Wokrjesny radźićel Lěwicy a prawiznik Hajko Kozel přewjedźe jutře, 23. apryla, dalše socialne poradźowanje w Budyskim wobydlerskim běrowje Lěwicy na Šulerskej. Zhromadnje z Gregorom Janikom, w socialnym prawje wosebje wobhonjenym prawiznikom, pomha wón problemy rozrisać, kotrež so často w zwisku ze socialnymi prašenjemi jewja. To nastupa wosebje prawniske naležnosće wokoło Hartza IV. Poradźowanje započnje so w 14 hodź. a hodźi so tež serbsce přewjesć, jeli sej to ludźo přeja. Zajimcy njech přizjewja so pod telefonowym čisłom 0171/282 54 94.
Podhlad pospytaneho morjenja
Běła Woda. Na próstwu Zhorjelskeho statneho rěčnistwa je tamniše sudnistwo wčera 47lětnu žonu z Běłeje Wody do psychiatriskeje kliniki zapokazało. Wumjetuja jej, zo je w nocy na minjenu póndźelu, po tym zo bě z 63lětnym mužom mócnje alkoholej přirěčowała, jemu nadobo z nožom wjacekróć do chribjeta a do ruki kłóła. Byrnjež wón wjele kreje zhubił, móžeše žonje nóž wutorhnyć a wuchowansku słužbu zawołać. Jeno z nuzowej operaciju móžachu mužej žiwjenje wuchować. Kriminalna policija je pad přewzała. Mjez druhim dyrbja winykmanosć žony přepytować. Wona bě we wulkej měrje alkoholizowana, na tamnym boku pak bu hižo raz psychiatrisce lěkowana. Na přičinu swojeho njeskutka njemóže so pječa dopominać. Dokelž njehodźi so wuzamknyć, zo je 47lětna bjez winy resp. z pomjeńšenej winu jednała, a dokelž móhł z njeje bjez medicinskeho zastaranja strach za zjawnosć wuchadźeć, njetyknychu ju do přepytowanskeje jatby, ale do psychiatrije. Tuchwilu wuchadźeja z toho, zo jedna so wo pospytane morjenje.