Budyšin (SN/bn). „Studijo hraje“ rěka rjad Němsko-Serbskeho ludoweho dźiwadła, z kotrymž so elewojo domu wot lěta 1994 publikumej na kóncu hrajneje doby ze swójskej inscenaciju předstajeja. Tele dny hotuja so w tym zwisku Aquina Žurec, Bernadet Šnajdrec a Ole Schmidt na premjeru. Štwórtk, 25. apryla, chcedźa kruch „Zhub so, baby, zhub so“ prěni raz w Budyskim Dźiwadle na hrodźe pokazać. Originalnu předłohu Cariny Lacroix běštej elewce samej do hornjoserbšćiny přełožiłoj, režiju wukonja Torsten Schlosser, zastupujcy schorjeneho nawodu činohrajneho studija při NSLDź Ralpha Hensela.

Krótko do wothwizdanja winowatostneje koparskeje hry w krajnej klasy mjez Chróšćanami a Rakečanami přizemi na trawniku w Chrósćicach helikopter. Nimo hrajerja hosći bě so tež dźěćo zraniło, tak zo dyrbještaj dwaj nuzowej lěkarjej, dwě chorobnej awće a helikopter do Chrósćic chwatać. Hra bu po přetorhnjenskej přestawce 40 mjeńšinow potom tola hišće dohrata. Hosćo ze 4:1 (0:1) dobychu. Foto: Weronika Zahrodnikowa

Sylny sněh je wčera rano na zapadźe Němskeje nadróžny wobchad haćił a tójšto wobchadnych njezbožow zawinował, kaž tule w Taunusu w Frankfurtskej kónčinje. Nawal njewšědnje chłódneho powětra ze skandinawiskeje wobradźa wosebje ratarjam wulke starosće. Tež we Łužicy dyrbimy dale z chłódnymi temperaturami a nócnymi zmjerzkami ličić. Foto: pa/Jan Eifert

Runje před pjeć lětami běchu započeli, bywšu brunicowu jamu na sewjerowuchodźe Choćebuza z wodu napjelnić. Mjeztym je hórniske předewzaće LEAG něhdźe 140 milionow kubiknych metrow sprjewineje wody do nastawaceho Liškowskeho jězora pušćiło. Po prěnich suchich lětach su spomóžne spadki minjeneje zymy zamołwitym zaso optimizm spožčili, zo zaměr tola hišće docpěja, jězor hač do nalěća 2025 po planje z wodu napjelnić. Přiwšěm wostanje kónčina dale zawrjena: Zesuwanja zemje ­žadaja sej wobšěrne saněrowanje, wšako steji wěstota na prěnim městnje. Na jězorje natwarja tuchwilu 16 hektarow wulku solarnu připrawu. Foto: Michael Helbig

Na lětušim 20. čitanskim wubědźowanju Rěčneho centruma WITAJ je Edith Mrózec prěni króć w jury sobu skutkowała. Milenka Rječcyna je so z wučerku za němčinu, wěcnu wučbu a nabožinu na Kulowskej Krabatowej zakładnej šuli rozmołwjała.Kak je tomu dóšło, zo sće nadawk přewzała, w jury sobu skutkować?E. Mrózec: Sobudźěłaćerka Rěčneho centruma WITAJ je so pola mnje naprašowała, hač chcyła čłonka jury na lětušim čitanskim wubědźowanju być. Sym tež hnydom k tomu zwólniła była a připrajiła. Do wubědźowanja mějachmy zetkanje koordinatorow za serbsku rěč na šulach we Wojerecach. Tam je so mje tež nawodnica Smolerjec kniharnje Annett Šołćic za tym prašała. Tež jej sym rady připrajiła.Sće Wy zašłe lěta tute wubědźowanje na wědomje brała a snadź hižo na někajke wašnje přewodźała?

Najnowše, mjeztym 29. wudaće Łužiskeho magacina wěnuje so mjez mnohimi na Łužicu so poćahowacymi temami wusahowacemu podawkej: 1. Choćebuskej Welcome Party „Klěb a sol“, kotraž ma so 28. meje w nutřkownym měsće Choćebuza wotměć. Čitarjo zhonja w tym zwisku, zo je hesło „Klěb a sol“ serbskeho, respektiwnje słowjanskeho pochada. Tekle witaja hišće dźensa swojich hosći z wjacorych krajow. Event zahaja w 16 hodź. na Starych wikach z koparskimi mišterstwami w kickerowanju. Na nich wobdźěla so wjacore mustwa Choćebuskich zawodow. Ze swojimi stejnišćemi prezentuja so Agentura za dźěło a hórniske předewzaće LEAG hnydom w susodstwje. Tam informuja wo wukubłanskich a powołanskich perspektiwach. Njedaloko toho zahaja runočasnje pisanu milu demokratije wosrjedź bulwara pěškow. Hosći chcedźa tam z chlěbom a selu witać. Z toho nastać ma zhromadny piknik, wšako móže kóždy něšto sobu přinjesć. Měšćanske iniciatiwy postaraja so ze swojimi aktiwitami wo pisany ­wobraz. ...

Spěchowanske towarstwo doma Zejlerja a Smolerja prócuje so dale wo to, kulturne herbstwo serbskeho fararja, basnika, ratarja, šulskeho inspektora, publicista a redaktora Handrija Zejlerja pěstować.Łaz (AK/SN). Čłon předsydstwa towarstwa Zejlerja a Smolerja we Łazu Reinhardt Schneider skedźbni zańdźeny pjatk w rozprawje na lětnej hłownej zhromadźiznje na wuznam a prócowanja spěchowanskeho towarstwa Zejlerja a Smolerja. „Tak loni šěsć wodźenjow po wustajeńcy Zejlerjowe slědy přewjedźechmy“, wón wujasni. Mjez druhim su čłonojo Kulowskeho chóra Bratrowstwo, studenća sorabistiki z Lipska, čłonojo załožby Ewangelska Šleska, přećeljo Wojerowskeho wuměłstwoweho towarstwa, Serbski žónski ansambl pod nawodom Walburgi Wałdźic a přećeljo domizny z Łaza přichwatali. Spočatk februara su čłonojo towarstwa basnika Handrija Zejlerja k jeho 220. narodninam počesćili a połožichu před pomnikom kwětki. Nimo toho při Domje Zejlerja a Smolerja wopomnjensku taflu za Łazowskeho chronista a čestneho wobydlerja ...