Krótkopowěsće (18.05.15)

póndźela, 18. meje 2015 spisane wot:

Prózdniny kiwaja

Budyšin. Za 16 000 šulerjow sakskich wyšich šulow započinaja so jutře kónčne pruwowanja. 13 600 z nich chce šulu z realnošulskim wuswědčenjom zakónčić. Woni maja štyri pisomnych a jedne ertne pruwowanje wobstać. Loni docpě 97,6 procentow šulerjow realnošulske zakónč­enje.

Za kolesowarjow

Grodk. Nowa wušła je brošurka ke kolesowarskej šćežce „Zhubjene wsy“. W njej prezentuja so nimo noweje 48 kilomet­row dołheje čary tež wjeski, kiž buchu Wjelcejskeje jamy dla, wotba­growane. Čara wobsahuje dźewjeć wjesnych wopomnišćow. Brošurka poskići so mjez druhim w turistiskej informaciji na Grodkowskim torhošću.

Wjace turistow w Čěskej

Praha. Mjeztym zo ličba ruskich turistow w Čěskej republice přirunujo z prěnim kwartalom lońšeho lěta wuraznje spaduje, zajim wopytowarjow z druhich krajow přiběra. Wjace turistow je mjez druhim z Južneje Koreje abo USA. Rozrostła je tež ličba němskich wopytowarjow. Cyłkownje 328 000 z nich je wot januara do měrca přijěło, štož je 22 procentow wšěch hosći.

Kanada swětowy mišter

Krótkopowěsće (15.05.15)

pjatk, 15. meje 2015 spisane wot:

Započnje wutwarjeć

Budyšin. Jako „ebay-wjes“ znaty statok pola Libonja smě so na prózdninski a wja­cegeneraciski statok wutwarić. Gmejna Hodźij je wobsedźerjej wotpowědne twar­ske prawo přizwoliła. Wobsedźer Andreas Reitmann ma tole za wažny měznik planowanja. Nětko chce započeć štyristronski statok energijoawtarknje wutwarjeć.

Próstwa wo zakaz dóšła

Karlsruhe. W dalšim postupowanju wo zakazanje strony NPD su do Zwjazkoweho sudnistwa w Karlsruhe trěbne podłožki krajow w podatym času dóšli. Druhi senat bě kraje w měrcu napominał, hač do 15. meje jasne dopokazy cofnjenja informantow z nawodnych kruhow NPD předpołožić. Prěnju próstwu wo zakazanje NPD w lěće 2003 bě sudnistwo wotpokazało.

Prezentuja němsku literaturu

Praha. W čěskej stolicy su so wčera tradicionalne wulkowiki Swět knihi zahajili. W tutym wobłuku so mjeztym hižo wosme lěto zhromadnje literatura němsce rěčacych krajow pod mjenom „Das Buch“ předstaja. Mjez čitacymi awtorami wusahuje lětsa wosebje Thomas Brussig, kiž swoju nowu knihu „Das gibts in keinem Russenfilm“ předstaji.

Krótkopowěsće (13.05.15)

srjeda, 13. meje 2015 spisane wot:

Kongres FUEN w Grjekskej

Budyšin/Komotini. Z mjeńšinowymi wikami zahaji so dźensa wječor lětuši kongres Federalistiskeje unije narodnych mjeńšin w zapadotrakiskim měsće Komotiniju (Grjekska). Ze stron Domowiny wobdźěla so předsyda Dawid Statnik, William Janhoefer, Ludmila Kowarjec jako zastupjerka Pawka kaž tež jednaćel a wiceprezident FUEN Bjarnat Cyž.

Šesćo chcedźa do radnicy

Budyšin. K wólbam Budyskeho měšćanosty nastupi šěsć kandidatow. Měšćanski wólbny wuběrk je wčera wob­krućił, zo smědźa so Alexander Ahrens, Matthias Knaak, dr. Andreas Haase, Mike Hauschild, Andreas Thronicker a Jörg Urban k wólbam stajić. Za zastojnstwo Budyskeho krajneho rady kandidujetaj tuchwilny krajny rada Michael Harig (CDU) a Jens Bitzka za Zwjazka 90/Zelenych.

Start za busy přesunjeny

Krótkopowěsće (12.05.15)

wutora, 12. meje 2015 spisane wot:

Sekretariat nětko wjacerěčny

Berlin. Na internetnej stronje prezentuje so němski Mjeńšinowy sekretariat wotnětka wjacerěčnje. Wopytowar móže informacije w šěsć mjeńšinowych rěčach čitać. Su to hornjo- a delnjoserbšćina, sa­te­rofrizišćina, sewjerofrizišćina, danšćina a delnjoněmčina. Mjeńšinowy sekretariat zastupuje němskich Sintow a Romow, Danow, Frizow a Serbow.

Sakski wopyt w Koreji

Drježdźany. Delegacija pod nawodom sakskeho hospodarskeho ministra Marti­na Duliga (SPD) je so dźensa do Južneje Koreje podała. Jej přisłušeja tež zastu­pjerjo sakskeho hospodarstwa a turizma. Skrućić chcedźa poćahi mjez Sakskej a Koreju na polu hospodarstwa a slědźenja kaž tež wabić za pućowanje do Sakskeje.

Minister planuje změny

Krótkopowěsće (11.05.15)

póndźela, 11. meje 2015 spisane wot:

Młynkowa naslěduje Kowarja

Choćebuz. Nowa hornjoserbska zastupowaca čłonka rady Załožby za serbski lud je Marlis Młynkowa ze Serbskeho šulskeho towarstwa. Wona naslěduje Marka Kowarja, kotryž je zastojnstwo z wosobinskich přičin złožił, poinformowa předsyda Domowiny Dawid Statnik na posedźenju zwjazkoweho předsydstwa sobotu w Choćebuzu.

Zwjena z noweje twornje

Kodersdorf. Zajutřišim, srjedu, je za­zběh za nowotwar zawoda k zhotowjenju zwjenow z lochkometala firmy Borbet w Kodersdorfje pola Zhorjelca. Zawod nastanje bjezposrědnje při awtodróze A 4. Tam ma nastać 400 nowych dźěłowych městnow. Požadanja k tomu přijimuje dźěłowa agentura w Niskej.

Sakska atraktiwne stejnišćo

Drježdźany. Hospodarske spěchowanje Sakskeje (WFS) zmóžni loni zasydlenje 13 nowych předewzaćow a rozšěrjenje dalšich dźesać. Z tym bu 600 nowych dźěłowych městnow wutworjenych, wuchadźa ze zdźělenki towaršnosće. Cyłkownje je so 182 milionow eurow inwestowało. WFS zregistrowa 37 procentow wjace naprašowanjow za nowozasydlenje hač 2013.

Kanada dale bjez poražki

Krótkopowěsće (08.05.15)

pjatk, 08. meje 2015 spisane wot:

Spěchuja Lessingowy dom

Kamjenc. Zwjazk spěchuje saněrowanje podzemja Kamjenskeho Lessingoweho domu z wjace hač 120 000 eurami z programa „Inwesticije za narodne kulturne zarjadnišća we wuchodnej Němskej“. To wobkrući tele dny zwjazkowa ministerka za kulturu prof. dr. Monika Grütters zapósłanči zwjazkoweho sejma Mari Michałkowej (CDU).

Přijeće k pólskemu swjatkej

Berlin. Wulkopósłanc Pólskeje w Němskej dr. Jerzy Margański je wčera něhdźe sto hosći w Berlinje přijał. Aktualna přičina bě róčnica Konstitucije 3. meje, z kotrejž bě pólski sejm 1791 prěnju modernu wustawu Europy w zmysle rozswětlerstwa schwalił. Za Zwjazk serbskich wuměłcow wobdźělištaj so Alfons Wićaz a prof. dr. Dietrich Šołta na zetkanju.

Chróšćenjo dóstanu premiju

Chrósćicy. Projekt dźěći, młodostnych a staršich ze wsy a z wo­ko­liny „Přirodźe bliska zahroda w Chróšćanskej pěstowarni“ słuša k najlěpšim lětušeje 48hodźinskeje akcije. Za to dóstanu 250 eurow. Premiju zmóžnja Budyska wokrjesna lutowarnja. We wokrjesu Budyšin chce so lětsa dohromady 84 skupin na akciji wobdźělić, kaž zdźělichu.

Krótkopowěsće (07.05.15)

štwórtk, 07. meje 2015 spisane wot:

Nowostka Kita Lorenca wušła

Lipsk. „Windei in der Wasserhose des Eisheiligen – Gedichte und Schmungks“ rěka nowa kniha Kita Lorenca, kotraž je te­le dny w Lipšćanskim nakładnistwje Poetenladen wušła. Na wjace hač sto stronach hromadźi 8. zwjazk rjadu Neue Lyrik nowe němskorěčne basnje wjacekróć wuznamjenjeneho spisowaćela.

Česća tež ameriskich wojakow

Plzeň. Před 70 lětami bě ameriske wójsko­ juhozapadnu Čěsku wot fašizma wuswobodźiło. Składnostnje róčnicy wot­krychu nětko w Plzenje postawu tehdy­ nawjedowaceho generala Georga S. Pattona. W socialistiskej Čěskosłowakskej su jeničce rólu Čerwjeneje armeje při powalenju fašizma wuzběhnyli – ameriski podźěl spytachu zamjelčeć.

Nalada w rjemjesle špatna

Krótkopowěsće (06.05.15)

srjeda, 06. meje 2015 spisane wot:

Nimale tysac přihladowarjow

Budyšin. Hru „Mój wuměrjeny kraj“ Jurja Kocha w režiji intendanta NSLDź Lutza Hillmanna je sej na šěsć předstajenjach 950 přihladowarjow wobhladało. Nazymu předstaji NSLDź kruch znowa němsce w Budyskim dźiwadle kaž tež w Złym Komorowje. W hrě, kotraž jedna wo wotbagrowanju statoka w serbskej ho­li, su prěni raz slepjanšćinu nałožowali.

Za stawk so wuprajili

Berlin. Po Zwjazku zastojnikow je nětko tež posłužbowe dźěłarnistwo ver.di wobzamknyło w pěstowarnjach stawkować. 92,44 procentow čłonow bě so při wothłosowanju za to wuprajiło, kaž dźensa w Berlinje zdźělichu. Wot pjatka chcedźa tuž w komunalnych pěstowarnjach dźěło złožić. Dźěłarnistwa žadaja sej za 240 000 kubłarjow wyšu mzdu.

Rekord: 38 milionow ćěkancow

Krótkopowěsće (05.05.15)

wutora, 05. meje 2015 spisane wot:

Zawod Litarion předaty

Kamjenc. Industrijny koncern Evonik je swoju Kamjensku wotnožku Litarion kanadiskemu předewzaću Electrovaya pře­dał. Po informacijach zawodneje rady su wšitkich 154 sobudźěłaćerjow pře­wza­­li. Nowy mějićel chce w zawodźe Litarion zhotowjeny baterijowy system po wšěm swěće zwičnić, štož činješe dotal sobuwobsedźer Daimler. Tón pak bě so wróćo sćahnył.

Młode ryby wusadźili

Podstupim. Něhdźe 250 młodych jasotrow (Störe) je braniborski wobswětowy minister Jörg Vogelsänger (SPD) w Haboli wusadźił. „Je to wažny krok, drohotnu rybu zaso zadomić“, wón w Podstupimje rjekny. Jasotry pućuja nětko do Sewjerneho morja, zo bychu so za něhdźe 15 lět k njerkanju nawróćili.

Barbu přećiwo demonstrantam

Brno. Při pjatkownych prěnjomejskich demonstracijach radikalnych w Brnje je čěska policija prěni raz wosebite třělwo zasadźiła. Z pomocu z barbu pjelnjenych želejowych kulkow woznamjenichu mjez demonstrantami konkretne wosoby a je pozdźišo zajachu. Třělwo na podobnej bazy wužiwaja hewak za paintball.

Krótkopowěsće (04.05.15)

póndźela, 04. meje 2015 spisane wot:

Film ze Serbowku počesćeny

Wien. Hrajny film „Frau Müller muss weg“ ze serbskej dźiwadźelnicu Gabrielu Šmajdźinej w jednej z hłownych rólow su wčera we Wienje w kategoriji „najlěpši kinofilm“ ze Złotej Romy počesćili, najwyšim wuznamjenjenjom Awstriskeje za filmowe a telewizijne produkcije. Film je hižo milion ludźi widźało.

Namócnosće w Pólskej

Knurów. Po ćežkich namócnosćach wo­koło koparskeje hry z jednym smjertnym woporom w pólskim Knurowje (Delnja Šleska) su hooliganojo wčera wječor­ znowa policajsku staciju nadbě­ho­wali a pjeć policajskich jězdźidłow wobškodźili. Policija 30 z nich zaja. Sobotu bě w Knurowje po hrě k namócnosćam dóšło, při čimž bu 27lětny wot gumijoweje kulki policista smjertnje trjecheny.

Němskej łódźi dojěłoj

nawěšk

SERBSKE NOWINY podpěruja:

Novi Sad – kulturna stolica Europy

nowostki LND