Krótkopowěsće (12.09.19)

štwórtk, 12. septembera 2019 spisane wot:

Za towarstwo Krabata hłosować

Njebjelčicy. Krabatowe towarstwo je za Myto publikuma Němskeho angažementoweho myta namjetowane. Online-wothłosowanje je so dźensa w interneće pod https://www.deutscher-engagementpreis.de/publikumspreis/ zahajił. Sakske towarstwo kandiduje we wosom z 19 temowych wobłukow. Po cyłej republice, rozrjadowane po zwjazkowych krajach, wabi 617 cyłkow wo podpěranske hłosy.

Wojerowska šula pódla

Drježdźany/Wojerecy. Wyša šula „Při planetariju“ we Wojerecach je jedne z pjeć sakskich kubłanišćow, hdźež zwoprawdźeja projekt „šula a digitalna demokratija“. Jedne lěto wukmanjeja pro­fijo šulerjow, wučerjow a staršich. We workshopach posrědkuja hódnoty we wobłuku socialnych medijow, zo bychu online-diskriminaciji w formje cyber-mobbinga abo hatespeechow zadźěwali.

Kóncowku „-ová“ zachować

Krótkopowěsće (11.09.19)

srjeda, 11. septembera 2019 spisane wot:

Šula a digitalna demokratija

Drježdźany. Mjez třomi sakskimi wyšimi šulemi a dwěmaj gymnazijomaj chce Wojerowska Wyša šula „Při planetariju“ zwoprawdźić projekt za wjace medijoweje kompetency „Šula a digitalna demokratija“. Z 33 šulow, kotrež běchu so požadali, je tež Wyša šula Arthura Kieslinga w Kinsporku, kotraž so cyłe lěto z tematiku zaběra. Zaměr projekta je, šule za digitalnu změnu sylnić a je při spěchowanju digitalneje šulskeje kultury podpěrać.

Třěcha před kupnicu so paliła

Rakecy. Před kupnicu w Rakecach je so minjenu nóc třěcha paliła, pod kotrejž stejachu nakupowanske wozyčki. Prawdźepodobnje běchu ju njeznaći zapalili, kaž rěčnik policije zdźěli. Wohnjowi wobornicy woheń zhašachu. Nichtó so njezrani. Policija pad nětko přepytuje.

Uniwersity woblubowane

Krótkopowěsće (10.09.19)

wutora, 10. septembera 2019 spisane wot:

Wjace wody za Sprjewju a Šepc

Kwětanecy. Z Kwětanečanskeje rěčneje zawěry běži nětko wjace wody do Sprjewje a Čorneho Šepca, a to dokelž wěšća wjedrarjo za přichodne tydźenje njedosahace spadki. Přidatnje 1,8 milionow kubiknych metrow wody chcedźa wotpušćić, zdźěli krajny zarjad rěčnych zawěrow. Staw wody w Kwětanečanskej rěčnej zawěrje so tak wo něhdźe poł metra zniži.

Přesadźuja stadło wowcow

Budyšin. Krajnoradny zarjad přesadźuje jutře w 10 hodź. w domje 2, stwa 007 na Budyskej Dwórnišćowej 9 stadło 151 Suffolk-wowcow wšěch starobnych skupin a boranow w jednym losu. Skoćata su w poměrnje dobrym stawje zežiwjenja a ćerpja zdźěla pod chromosću. Zajimcy maja płaćiwe čisło skótneho wobchadneho porjada (VVVO.-Nr.) a wobkrućacy spis skótneho lěkarja wo družinje wotpowědnym plahowanju předpołožić.

Z tramwajku na Ještěd

Krótkopowěsće (09.09.19)

póndźela, 09. septembera 2019 spisane wot:

NSLDź a SLA durje wotewrěłoj

Budyšin. Němsko-Serbske ludowe dźiwadło je z dnjom wotewrjenych duri nowu­ hrajnu dobu zahajiło. Wjace hač 2 000 zajimcow wuži wčera składnosć, hrajnišća kaž tež wurězki přichodnych insce­nacijow sej wobhladać. Tež Serbski ludowy ansambl je swój dom zjawnosći spřistupnił a bě z wothłosom kaž tež ličbu­ wopytowarjow přewšo spokojom.

Z pomnikowym mytom počesćeni

Lubij. Z projektom „Lubijska cyrkej Swjateho Ducha w změnje časa“ zawěsći sej Lubijski ewangelski šulski centrum Sakske dźěćace a młodźinske pomnikowe myto. Počesćenje přijachu wčera na dnju wotewrjeneho pomnika w Lubiju. Wuknjenska skupina dwanaće zakładnych, wosom spěchowanskich a dwanaće powołanskich šulerjow je wo Božim domje w zwisku z měšćanskimi a nabožinskimi stawiznami slědźiła.

Přewjedźe prěnju rěčnu hodźinu

Krótkopowěsće (06.09.19)

pjatk, 06. septembera 2019 spisane wot:

K wuspěchej zatamane

Berlin/Drježdźany. Po měnjenju by­wšeho sakskeho ministerskeho prezidenta Kurta Biedenkopfa (CDU) su unija, SPD a Zeleni k wuspěchej zatamane knježerstwo wutworić. „Nětko dyrbi so poradźić, zo so tři strony tak zwjazaja, zo změja w parlamenće stabilnu wjetšinu“, rjekny wón w interviewje z redakciskej syću Němska. „Sakska to trjeba – tež zo by stronje AfD hranicy sadźała.“

Wo analfabetizmje njerěča

Plauen. Něhdźe 300 000 Saksow prawje čitać a pisać njemóže, kaž ze zwjazkoweho přepytowanja Leo 2018 wuchadźa. Po słowach Ingrid Ficker z Plauenskeho koordinowanišća alfabetizm – skrótka „Koalpha“ – je dwanaće procentow 18- do 65lětnych w ludnosći potrjechenych. Tući wo tym njerěča, skerje so za móžnosćemi w Sakskej wobhonjeja słabosće přewinyć. Njedźelu je swětowy dźeń alfabetizacije.

Robert Mugabe njeboh

Krótkopowěsće (05.09.19)

štwórtk, 05. septembera 2019 spisane wot:

Społnomócnjeny powołany

Budyšin. Załožba za serbski lud je Měrka Šenka za społnomócnjeneho za digitalizaciju powołała. To zdźěli dźensa sobudźěłaćerka załožby Marija Šimanowa. 41lětny poradźowar za IT-procesy a digitalne projekty z Drježdźan je dźensa hač do kónca lěta 2020 płaćiwe zrěčenje podpisał. K jeho prěnim nadawkam słuša přihot digitalneje konferency dnja 29. nowembra 2019 w Budyšinje.

Pytaja noweho přirjadnika

Wojerecy. Město Wojerecy pyta noweho přirjadnika wyšeho měšćanosty. Zastojnstwo chcedźa spočatk februara znowa wobsadźić, zdźěla město na swojej internetnej stronje. Dotalny přirjadnik-měšćanosta Thomas Delling poda so na wuměnk. 67lětny diplomowy matematikar bu 2001 do zastojnstwa powołany. Přirjadnika powołuje měšćanska rada na dobu sydom lět.

Skórnik kontra klawěry

Krótkopowěsće (04.09.19)

srjeda, 04. septembera 2019 spisane wot:

Dale mało wody w rěkach

Drježdźany. Hišće přeco ma wjele rěkow w Sakskej přemało wody. Kaž rěčnica Drježdźanskeho ministerstwa za wobswět wčera zdźěli, potrjechi to něhdźe 70 procentow rěkow, tak tež Nysy we Łužicy a Plesny (Pleiße) pola Lipska. Połoženje so mało spadkow dla lědma polěpša. Staw 75 centimetrow wody tež łódźnistwo na Łobju wobmjezuje.

Bliskowobchad darmotnje

Lubnjow. Turistiske města w Błótach, kaž Lubnjow, Lubin a Bórkowy, chcedźa turistow z wosebitym poskitkom do Łužicy wabić. Wšitcy, kotřiž w Błótach přenocuja, měli wosobowy bliskowobchad darmotnje wužiwać směć, informuje Lubnjowske měšćanske zarjadnistwo. Kóšty za to chcedźa ze zwyšenjom kuroweho popłatka wo něhdźe 60 centow zarunać, a to wot lěta 2021.

Dźensa posledni ćopły dźeń

Krótkopowěsće (03.09.19)

wutora, 03. septembera 2019 spisane wot:

Pomoc suchoty dla wupłaćili

Budyšin. Cyłkownje 95 ratarskich zawodow Hornjeje Łužicy je loni próstwu wo pomoc suchoty dla sakskemu ratarskemu ministerstwu zapodało. Škody wučinjachu dohromady něhdźe 20 milionow eurow. W Budyskim wokrjesu je ministerstwo 39 próstwam wotpowědowało a 2,4 miliony eurow wupłaćiło.

Pruwuja skóržbu

Choćebuz. Po tym zo w Janšojskej brunicowej jamje wot njedźele žane wuhlo njewudobywaja, koncern Łužiska ener­gija a milinarnje (LEAG) pruwuje, hač skóržbu zapoda. Po trochowanju předewzaća móže přetorhnjenje dźěła we wuhlowej jamje hač do štwórć lěta trać. Nětko so LEAG nadźija, zo krajny zarjad za hórnistwo, geologiju a surowizny postaji, kak ma dale hić. Hakle potom móža swojich sobudźěłaćerjow wo dalšim postupowanju informować.

Třěcha twarjenja so paliła

Krótkopowěsće (02.09.19)

póndźela, 02. septembera 2019 spisane wot:

Stawizny a podawki 3

Budyšin. Rěčny centrum WITAJ Budyšin je wudał nowu serbsku wučbnicu „Stawizny a podawki 3“. Koncipowany bě material za šulerjow 7. lětnika Serbskeho gymnazija Budyšin. Přełožk je licencne wudaće nakładnistwa Klett. Wučerka na wuměnku Sonja Krječmarjowa je mjenowanu knihu kaž dalšej wučbnicy z toho rjadu zeserbšćiła.

Tkajernja ma přećahnyć

Drjowk. Serbska tkajernja w Drjowku ma po planach města do domu při hrodźe přećahnyć. Tón pak so za muzej njehodźi, rjekny regionalna rěčnica Domowiny Karin Tšukowa, dokelž je tam přemało městna a tež koncept za přetworjenje njepředleži. Jutře chce Drjowkowska měšćanska rada naležnosć rozjimać. Domowina­ chce wo tym we wuběrku za serbske naležnosće wokrjesa rěčeć.

Ličba wučomnikow stabilna

Krótkopowěsće (30.08.19)

pjatk, 30. awgusta 2019 spisane wot:

Swjedźeń na hrodźe Bellevue

Berlin. Zwjazkowy prezident Frank-Walter Steinmeier je so dźensa na woby­dlerskim swjedźenju na Berlinskim hrodźe Bellevue 4 000 čestnohamtsce skutkowacym z cyłeho kraja dźakował, ko­třiž so za druhich zasadźuja. Přeprošeni běchu znowa zastupjerjo štyrjoch awtochtonych mjeńšin. Mjez nimi bě Zala Cy­žowa, županka župy „Michał Hórnik“ a bywša městopředsydka Domowiny.

Serbska etaža su stawizny

Drježdźany. „Serbska studentska etaža“ w Drježdźanach su stawizny. Něhdźe sto hosći je so wčera z „finalnej party“ z domicilom na Zellskim puću rozžohnowało. Kaž Serbski rozhłós wozjewi, dyrbjachu posledni wobydlerjo dom wopušćić, dokelž běchu předpisany studijny čas překročili. Nowych zajimcow žanych njebě. Serbscy studenća běchu do toho na Hórskej hasy, pozdźišo na Wundtowej a Pětrohródskej bydlili.

Do nutrin wulkana pohladali

Serbska debata

nowostki LND