Krótkopowěsće (26.06.15)

pjatk, 26. junija 2015 spisane wot:

Parlamentariska přirada so zešła

Budyšin. Parlamentariska přirada Załožby za serbski lud je so dźensa skonstituowała. Na posedźenju wuzwolichu nowe předsydstwo. Předsyda wostanje dale Marko Šiman (CDU, Sakski krajny sejm). Jeho zastupjerce stej Marja Michałkowa (CDU, zwjazkowy sejm) a Kerstin Kircheis (SPD, Braniborski krajny sejm). Parlamen­tariska přirada wobsteji wot lěta 1991.

Próstwa wotpokazana

Wodowe Hendrichecy. Něhdyši „šulscy rebelojo“ Wodowych Hendrichec njesmě­dźa so do swojeje bywšeje šule wró­ćić. To je sakske kultusowe ministerstwo rozsud­źiło a tak próstwu města wo dalewjedźenje 8. lětnika na kubłanišću wotpokazało. Wuměnjenje za to je, zo maja znajmjeńša 20 šulerjow. Wosom dźěći te­hdyšeho rebelowaceho 5. lětnika cho­dźi nětko w Rěčicach do šule.

Čech na čole NATO

Krótkopowěsće (25.06.15)

štwórtk, 25. junija 2015 spisane wot:

Žane dojednanje tarifow dla

Offenbach. W tarifowym konflikće wo mzdy pěstowarkow a socialnych dźěła­ćerjow njemóžachu so komunalni dźěło­dawarjo a dźěłarnistwo ver.di dojednać, wujednawanski rozsud přewzać, kaž dźensa w Offenbachu zdźělichu. Ver.di chce so nětko swojich čłonow prašeć a 13. awgusta znowa jednać započeć. Hač do toho nochcedźa stawkować.

Centrum nowinarskeje swobody

Lipsk. Žurnalisća, zwjazki a medijowe domy chcedźa přichodnje zhromadnje ranjenja nowinarskeje swobody zjawnje narěčeć. Něhdźe 20 organizacijow je za to dźensa w Lipsku Europski centrum za swobodu nowin a medijow załožiło. Wón ma ranjenja nowinarskeje swobody w Europje dokumentować a potrjechenym žurnalistam pomhać. Srědki přinošuja EU, wonkowne ministerstwo a Sakska.

Gabriel Merkel gratulował

Krótkopowěsće (24.06.15)

srjeda, 24. junija 2015 spisane wot:

Předpředanski rekord NSLDź

Budyšin. Dźeń do premjery lětušeho krucha Budyskeho lětnjeho dźiwadła „My Fair Lady“ jutře na Hrodźe je hižo wjace hač 20 000 zastupnych lisćikow pře­date, 60 procentow wšěch lisćikow. Kaž NSLDź zdźěli, su pak hišće za kóžde předstajenje kartki k dispoziciji. Dohromady 34 króć chcedźa woblubowany musical pokazać.

Rěčny poskitk w interneće

Zhorjelc. Nowy internetny portal je wot dźensnišeho přistupny. Składnostnje konferency „Po puću k rěči susoda“ jón dźensa wotewrěchu. Pod www.nach­barsprachen-sachsen.eu móža so nětko starši kaž tež pěstowarki wo móžnosćach nawuknjenja čěšćiny a pólšćiny w pomjeznej kónčinje kaž tež wo lěpšinach dwurěčneho kubłanja dźěći wobhonić.

Termin dotwara postajeny

Krótkopowěsće (23.06.15)

wutora, 23. junija 2015 spisane wot:

Witaj móže přikład być

Wostrowc. Projekt Witaj móže jako přikład za zažne susodnorěčne kubłanje w pomjeznym rumje słužić. To podšmórny dr. Regina Gellrich, nawodnica sakskeho zarjadnišća za zažne kubłanje w su­sod­­nej rěči, dźensa na konferency „Po puću k rěči susoda wot wšeho spočatka w pomjeznych kónčinach Sakskeje“ w mjezynarodnym zetkawanišću Marijiny doł.

Zapodaća pruwowane

Freiberg. W jednanju k zawodnemu wobłu­kowemu planej wuhloweje jamy Wochozy II je Freibergski wyši hórniski zarjad 310 zapodatych znapřećiwjenjow pruwował. Nětko přepoda je koncernej Vattenfall, kotryž ma so k nim wuprajić. Njejsu-li žane wjetše planowe změny trěbne, přewjedu jako přichodny krok tak mjenowane rozjasnjenje.

Budissa z 5. nowopřichadom

Krótkopowěsće (22.06.15)

póndźela, 22. junija 2015 spisane wot:

Znamjo protesta

Prožym. W přihotach na 5. łužiski klimowy camp je so sobotu w Prožymje něhdźe 300 ludźi zhromadźiło, zo bychu wulke žołte X jako wuraz protesta pře­ćiwo wotbagrowanju dalšich wsow rozšěrjenja wuhlowych jamow dla zestajeli. Kaž wobdźělnicy akcije jednohłósnje zwuraznichu, su šansy, wsy wuchować, tak dobre kaž hišće ženje.

Atomowe wotpadki składować

Wětrow. Na Wětrowskej deponiji chcedźa zaso twarske wotpadki atomowych milinarnjow składować. Tole je sakski wobswětowy minister Thomas Schmidt (CDU) na naprašowanje frakcije Zelenych w krajnym sejmje zdźělił. Cyłkownje 4 000 tonow chcedźa na deponije we Wětrowje, Cröbernje pola Lipska a w rudnohorinskim Grumbachu rozdźělić.

Dźěłarniski dom nadpadnjeny

Budyšin. Stawkowy lokal póstowych přistajenych w Budyskim dźěłarniskim domje bě kónc tydźenja cil nadpada. Wjacore wokna buchu rozbite, kaž DGB zdźěli. Hižo pjatk dósta dźěłarnistwo ver.di mailku, w kotrejž hrožachu z „wotpalenjom“. Regionalny jednaćel DGB Bern­hard Sonntag zapoda policiji dźensa wozjewjenje přećiwo njeznatym.

Krótkopowěsće (19.06.15)

pjatk, 19. junija 2015 spisane wot:

Hladanje dźěći budźe dróše

Drježdźany. W sakskej stolicy zwyša popłatki za hladanje dźěći wo 3,3 procenty. To je Drježdźanska měšćanska rada wčera wobzamknyła. Pozadk su stupace kóšty wobhospodarjenja. Wot 1. septembra změja starši tuž za městno w žłobiku 6,40 eurow a w pěstowarni 4,70 eurow wjace na měsac płaćić. Potrjecheni su tež starši, kotřiž swoje dźěći do serbskeje skupiny na Geisingskej sćelu.

„Kluby“ město hosćencow?

Praha. Čěske knježerstwo je zakoń wobzamknyło, kotryž wot 1. januara 2016 kurjenje w hosćencach a barach zaka­zuje. Wjacori hosćencarjo nětko rozmysluja, swoje předewzaća formalnje na „priwatne kluby“ přetworić. Čěska repu­blika je jedyn z poslednich krajow Europy, w kotrymž je kurjenje w hosćencach dotal lědma wobmjezowane.

Třećina w zarjadnistwach

Budyšin. Nimale třećina Budyskich dźěławych je w zarjadnistwach přistajena. W kubłanju, strowotnistwje a na socialnym polu dźěła 8 600 žonow a muži. We wobłuku wikowanja, wobchada a gastronomije dźěła 4 800 ludźi, w produ­kowacym přemysle 3 100. To wuchadźa z rozprawy „Budyšin w ličbach 2015“.

Rjelka/Lipič dale bjez poražki

Krótkopowěsće (18.06.15)

štwórtk, 18. junija 2015 spisane wot:

Ličby nad přerězkom

Budyšin. Najnowše łopjeno „Budyšin w ličbach“ z měšćanskeho zarjadnistwa podawa aktualne ličby wo sprjewinym měsće. Mjez druhim informuje wo hospodarskich wukonach Budyskich přede­wzaćow. 1 463 firmow nadźěłuje lětnje wobrot połdra miliardy eurow. Přerězny lětny wobrot 800 000 eurow na zawod leži­ jasnje nad sakskim přerězkom.

Wjesčičku bórze zaso wožiwja

Liboń. Energetiske saněrowanje prěnjeho domu w Libonje je zakónčene. Mějićel Andreas Reitmann rjekny, zo budu prěnje bydlenja za dźewjeć měsacow hoto­we. Štyri z cyłkownje sydom bydlenjow su hižo přenajate. Zajimcy pochadźeja mjez druhim z Drježdźan. Planowanja za prózdninski dwór we wjesčičce hišće wotzamknjene njejsu.

Wo serbskich stawiznach

Choćebuz. Dr. Pětš Šurman a Alfred Roggan staj wčera knihu wo serbskich kulturnych stawiznach Choćebuza a wokoliny w tamnišim Serbskim muzeju předstajiłoj. Jako 9. zwjazk rjadu Choćebuskeho Serbskeho muzeja a Serbskeho instituta „Serbske drogotki“ ma kniha nazymu wuńć. W srjedźišću steja serbske kulturne pomniki.

Krótkopowěsće (17.06.15)

srjeda, 17. junija 2015 spisane wot:

Nowy předsyda

Budyšin. Prawiznik Hagen Döhl z Wojerec je nowy předsyda dohladowarskeje rady Budyskeje Ludoweje banki. Na posedźenju dohladowarskeje rady wuzwolichu jeho za naslědnika Reinharda Schleinitza, kiž bě staroby dla nawod gremija złožił. 52lětny Döhl je fachowy prawiznik za dźěłowe prawo a bě wot lěta 2002 městopředsyda dohladowarskeje rady.

Wito Sćapan nětko kanonik

Drježdźany. Biskop Drježdźansko-Mišnjanskeho biskopstwa dr. Heiner Koch je wčera w Drježdźanskej katedrali Budyskeho tachantskeho fararja Wita Sćapana za kanonika powołał. Powołany bu tež nawoda personalneho wotrjada ordinariata, farar Benno Schäffel. Dotalny ka­nonik farar Šćěpan Delan z Radworja je nětko čestny kanonik.

Josep Topol zemrěł

Krótkopowěsće (16.06.15)

wutora, 16. junija 2015 spisane wot:

Za wjetšu politisku wahu

Wjelcej/Wětošow. Wolerski zwjazk Ze­le­ny přichod Wjelcej je Łužiskej ali­ancy (ŁA) přistupił. To zdźěli wčera předsyda serbskeje strony Hanzo Wylem-Kell. Zwjazk skutkuje samostatnje jako wjesna skupina pod třěchu ŁA. Z přistupa na­dźijeja so jeho čłonojo wjetšeje politiskeje wahi w boju přećiwo ničenju wobswěta wudobywanja miliny z brunicy dla.

Nowa tepjernja

Budyšin. Zakładny kamjeń su wčera za nowu tepjernju na Budyskej Thomasa Müntzerowej połožili. Tepjernja w blo­kowym systemje ma po principje ko­plowanja mocy a ćopłoty dźěłać. Budyski zastaranski zawod za energiju a wodu inwestuje jědnaće milionow eurow do projekta, kotryž budźe wot lěta 2017 tež milinu produkować.

Němske koparki dobyli

Winnipeg. Němske hrajerki su na swětowych koparskich mišterstwach w Ka­na­dźe jako skupinske dobyćerki do wosmifinala zaćahnyli. Mustwo trenarki Silvije­­ Neid je wčera we Winnipegu Thailand­sku ze 4:0 porazyło. Wrota třělili běchu Melanie Leupolz, w druhim poł­času hrajaca Lena Petermann (dwoje) a Sara Däbritz.

Małe finale přěhrali

Krótkopowěsće (15.06.15)

póndźela, 15. junija 2015 spisane wot:

Štyri króć z přerězkom 1,0

Budyšin. Maturantam Serbskeho gymnazija wozjewichu minjeny pjatk pruwowanske wuslědki a predikaty. Kaž kubłanišćo zdźěli, je lětsa 56 šulerjow maturu złožiło. Wšitcy su pruwowanja wobstali. Štyrjo najlěpši docpěchu kónčny přerězk 1,0. Maturitna swjatočnosć z přepo­da­ćom wuswědčenjow budźe 3. julija w Kamjenskim hotelu „Město Drježdźany“.

Chcedźa zwiski zesylnić

Dešno/Choćebuz. Hornjo- a delnjoserbska młodźina chce swoje zwiski zaso zesylnić. W prěnjej kročeli zetkachu so kónc tydźenja zastupnicy Pawka ze zastupnikami delnjoserbskeho młodźinskeho towarstwa Zapalaki. Mjez druhim wobhladachu sej domizniski muzej w Dešnje, Serbski muzej w Choćebuzu a wužiwachu čołmikowanje, sej mysle wuměnjeć.

Za sylnišu župu

nawěšk

SERBSKE NOWINY podpěruja:

Novi Sad – kulturna stolica Europy

nowostki LND