Krótkopowěsće (31.05.19)
Skawća pućowali
Slepo. Serbske skawtske pućowanje su dźensa při Lěsnym haće pola Slepoho zakónčili. Na dwudnjowskim pućowanju Slepjanskeje ewangelskeje wosady wobdźěli so dźesać skawtow, kotřiž na Slepjanskej zakładnej šuli serbšćinu wuknu. Pod nawodom fararki Malinkoweje běchu zhromadnje po puću, su čołmikowali a stanowali. Při wječornym lěhwowym wohenju su tež serbske pěsnje spěwali.
Wo strukturnej změnje
Budyšin. Strukturna změna we Łužicy bě tema diskusijneho wječora srjedu w Budyskim Dźiwadle na hrodźe. Rozjimane bu prašenje, što přińdźe po brunicy. Wo tym je 25 zajimcow zdźěla chětro emocionalnje diskutowało. Jasne wuprajenje bě, zo jeničce inwesticije a spěchowanske programy za pozitiwnu změnu njedosahaja.
Do partnerskeho wokrjesa
Krótkopowěsće (29.05.19)
Najmjenje bjezdźěłnych po 1990
Budyšin. 17 270 bjezdźěłnych, tak mało kaž hišće ženje po lěće 1990, je w meji we wuchodnej Sakskej. Kaž Budyska wotnožka Agentury za dźěło informuje, je jich 907 (minus pjeć procentow) mjenje hač w aprylu. Kwota bjezdźěłnosće wučinja 6,1 procent. Budyska dźěłowa agentura ma 4 241 socialneho zawěsćenja winowatych městnow za dźěło pytacych registrowane.
Po „Apollu“ nětko „Artemis“
Washington. Swětnišćowa agentura NASA je projekt „Artemis“ předstajiła, kotryž zjima plany, hač do lěta 2024 znowa astronawtow a prěni raz astronawtku na měsačk pósłać. Hinak hač z europskimi partnerami dorěčane chcedźa Američenjo projekt sami zwoprawdźić.
Dóstawaja přemało wolija
Lipsk. Zanjerodźeneho wolijowoda z mjenom Družba dla nimaja wikowarjo na wuchodźe Němskeje hižo dosć wolija. Někotři su samo w eksistency wohroženi, kaž Sakski zwjazk wolijoweho wikowanja wčera w Lipsku zdźěli. Hakle w juniju liča z rozrisanjom problema. Přičina zanjerodźenja je přewjele chlorida we woliju, kotryž z Ruskeje do Němskeje dodawaja.
Zverev koło dale
Krótkopowěsće (28.05.19)
Myto dźiwadłu tež za kubłanje
Choćebuz. Choćebuske Piccolo-dźiwadło dósta wčera w Gerje dźiwadłowe myto Zwjazka. Ze 119 požadarjow su jědnaćoch wuzwolili. Myto je 75 000 eurow hódne. Braniborska ministerka za kulturu Martina Münch (SPD) ma počesćenje Piccolo-dźiwadła za wulkotne připóznaće, dokelž „je institucija wuraz ekscelentneho kulturneho kubłanja“.
Sezona zahajena
Drježdźany. Truskalcowa sezona w Sakskej a Braniborskej je oficialnje zahajena. Tuchwilu drje je wunošk hišće minimalny, ale wot Božeho spěća liči krajny zwjazk Sakski sad z wjace zrawymi płodami. Potom móža sej ludźo swoje truskalcy pola wobhospodarjerjow polow sami šćipać. Lětsa pak budźe po informaciji zwjazka mjenje słódkich płodow, dokelž je so jich plahowanska přestrjeń trochu pomjeńšiła.
Biblioteka wustaja fotografije
Krótkopowěsće (27.05.19)
Wjace pjenjez za poskitki
Drježdźany. Sakske kultusowe ministerstwo chce wjace pjenjez za cyłodnjowske poskitki na šulach nałožić. Za šulske lěto 2019/2020 je to 46 milionow eurow na dobro něhdźe 328 000 šulerjow. „To je nimale 19 milionow eurow wjace hač w aktualnym šulskim lěće“, zdźěli dźensa sakski statny minister za kultus Christian Piwarz (CDU).
Wjetšina za kulturnu stolicu
Žitawa. Paralelnje k europskim a komunalnym wólbam mějachu wobydlerjo wo požadanju města Žitawy jako europska kulturna stolica w lěće 2025 wothłosować. Na wobydlerskim rozsudźe wobdźěli so wjace hač połojca wólbokmanych, a woni su namjet ze 74,2 procentomaj přiwzali. Nětko chcedźa iniciatorojo kampanju zesylnić a nimo toho tež čěskich a pólskich susodow zapřijeć.
Přichod zawoda zaručeny
Krótkopowěsće (24.05.19)
Wo dwurěčnosć šło
Budyšin. Wo dwurěčnosći w busach, ćahach a na zastanišćach w serbskim sydlenskim rumje rozmołwjachu so čłonojo sakskeje Rady za serbske naležnosće z jednaćelom wobchadneho zwiska ZVON Hansom-Jürgenom Pfeifferom wčera w Budyskim Serbskim domje. Jedna tema bě projekt ZVON a VVO, tafle na busowych zastanišćah wobnowić a dwurěčnje popisać.
Zakónča projekt z konferencu
Budyšin. Dorostowa wědomostna skupina z Drježdźanskeje Techniskeje uniwersity a ze Serbskeho instituta předstaji wuslědki zhromadneho projekta „Serbska wěda“ we wobłuku zakónčaceje konferency 14. junija w Budyšinje. To zdźěli dźensa Serbski institut. Sydom wědomostnikow je tři lěta we wobłukomaj serbska kultura a serbske stawizny kaž tež nastupajo prašenja digitalizacije serbšćiny slědźiło.
Zrěčenje podpisali
Krótkopowěsće (23.05.19)
Projekt we Łužicy zahajeny
Choćebuz. Ericha Kästnerowa zakładna šula Choćebuz wobdźěla so wot wčerawšeho na projekće braniborskeho kubłanskeho ministerstwa a Swobodneje uniwersity Berlin „Čiń něšto“. Z nim chcedźa šule, šulske zarjady a uniwersity zhromadnje w šulerjach hižo w prěnich lětach zajim za wažne předmjety kaž matematiku, informatiku, přirodowědu a techniku budźić.
Fotowe modele pytane
Zły Komorow. Turistiski zwjazk Łužiska jězorina pyta fotomodele a wobrazy za dowolowy region. Móža to być swójby z dwěmaj dźěsćomaj w starobje dweju do sydom lět a w starobje dźesać do 14 lět kaž tež aktiwne poriki. Zestajeć chce zwjazk nowe wabjenske poskitki na temje swójbny a aktiwny dowol w jězorinje.
Znowa časopis zestajał
Krótkopowěsće (22.05.19)
Wjelki tema w kabineće
Berlin. Po wjele diskusijach předpołoži zwjazkowe knježerstwo skónčnje naćisk wjelčeho zakonja. Tón je kabinet dźensa w Berlinje schwalił. Přichodnje budźe lóšo problematiske wjelki třěleć směć. Přiwšěm budźe stajnje hišće wotpowědna dowolnosć trěbna. Wowčerjo zakoń jara witaja. Wobswětoškitna organizacija BUND plany kritizuje.
Zhladuja na róčnicy
Podstupim/Choćebuz. Serbski zakoń Braniborskeje wobsteji 25 lět, pjeć lět skutkuje knježerstwowa społnomócnjena za naležnosće Serbow w susodnym zwjazkowym kraju. Přiležnosć to ministerstwu za wědomosć, slědźenje a kulturu wuhotować póndźelu, 27. meje, zarjadowanje z přeprošenymi hosćimi w Choćebuskim Delnjoserbskim gymnaziju, zo bychu na wobě róčnicy zhladowali.
Nihdy njezabyć
Krótkopowěsće (21.05.19)
Bórze nowa terminowa protyka
Budyšin. Załožba za serbski lud je kooperaciske zrěčenje z firmu SAXO’Phon GmbH podpisała. Tak chce serbsku kulturnu protyku dalewuwić, kaž zdźěla. Předewzaće ma nazhonjenja z kalendrom dźenika Sächsische Zeitung a je tuž kompetentny partner za wuwiwanje protyki. Nastać ma nowa trojorěčna homepage za serbske terminy, kotraž ma wot septembra přistupna być.
Poslednja šansa podpisać
Drježdźany. Za podpismowu akciju „Zhromadne šule w Sakskej – dlěje zhromadnje wuknyć“ bu dotal 35 757 wobkrućenych podpismow zezběranych. Posledni dźeń, na kotrymž budźe po cyłej Sakskej składnosć tajke hromadźić, je Mjezynarodny dźeń dźěsća 1. junija. To zdźěli wčera Burkhard Naumann, koordinator mjenowaneje akcije.
Šupiznak město pandy
Krótkopowěsće (20.05.19)
Koncert žněje dobry wothłós
Budyšin. Koncertny rjad Serbskeho ludoweho ansambla „Wobkuzłaca klasika“ žněje dobry wothłós. Wo tym informuje zamołwity za nowinske a zjawnostne dźěło Stefan Cuška. Sobotny druhi koncert rjadu w Hodźijskej cyrkwi je znowa tójšto zajimcow wopytało. Za kónc tydźenje připowědźi SLA specielne wudaće koncerta z hudźbu znatych filmow a musicalow w Bukecach a Budyšinje.
Swobodny stat spěchuje přetwar
Chwaćicy. Sakska spěchuje Chwačanske woltižěrowanske a jěchanske towarstwo z něhdźe 60 000 eurami. Pjenjezy nałoža tam za přetwar wjacefunkciskeho twarjenja, informuje zapósłanc Sakskeho krajneho sejma Marko Šiman (CDU) w nowinskej zdźělence. Chwačanske jěchanske towarstwo wukonja wot załoženja 1985 dobre dźěćace a młodźinske dźěło, Šiman podpěru wopodstatni.
Železniskej čarje wožiwić
Krótkopowěsće (17.05.19)
Próstwa za wutwar A 4 zapodata
Drježdźany. Za šěsćčarowy wutwar awtodróhi A 4 mjez wotbóčkomaj Połčnica a Budyšin-wuchod je sakske wobchadne ministerstwo wčera próstwu Zwjazkej zapodało. Frakcija Zelenych w krajnym sejmje wobchadnemu ministrej Martinej Duligej (SPD) porokuje, zo „před lawinu nakładnych awtow na A 4 kapituluje“, město toho zo wužadanju njewotpowěduje, „klimje přichilenišu železnicu za nakładowy wobchad přichoda wukmanić“.
Wěstotnu centralu předstajili
Choćebuz. Město Choćebuz je wčera hižo dlěje planowany wěstotny centrum předstajiło. Tam stej policija a porjadowy zarjad zhromadnje městnosć za wobydlerjow zarjadowałoj. Wšědnje je tam něchtó k dispoziciji, kotrehož móža ludźo nastupajo wěstotu narěčeć. Rumnosće maja tohorunja jako zasadźenska centrala za wjetše zarjadowanja słužić.
Za lěpše busowe zwiski
