Krótkopowěsće (28.04.21)
Po 30. juniju w praksach šćěpja
Budyšin. Šćěpjenskej centrumaj w Kamjencu a Lubiju runja dalšim we wokrjesach dźěłatej jenož hač do 30. junija. Potom maja praksy domjacych lěkarjow šćěpjenje pře koronawirus zaručić, kaž sakske socialne ministerstwo zdźěli. W Budyskim wokrjesu zwěsćichu wčera 72 natyknjenjow z koronu a dwaj smjertnej padaj. Incidenca po RKI je dźensa 227,9. We wokrjesu Zhorjelc mějachu 130 infekcijow a dwaj smjertnej padaj. Incidenca je tam dźensa po RKI 195,1.
Spěchuje socialne bydlenja
Drježdźany. Sakska wudawa wjace pjenjez za socialne bydlenja. Po wčera wot kabineta wobzamknjenej spěchowanskej směrnicy přewostaja lětsa a klětu po 74,3 milionach eurow, zo bychu tajke bydlenja twarili a saněrowali. Mějićeljo bydlenjow, kotřiž njemóža žanu modernizaciju financować, dóstanu spěchowanje, zo móhli nisku podruž dale zaručić.
Markus Pieper nowy jednaćel
Krótkopowěsće (27.04.21)
Mjeńšinowe myto Angeli Merkel
Heidelberg. Zwjazkowa kanclerka Angela Merkel (CDU) je lawreatka lětušeho Europskeho myta za wobydlerske prawa Sintow a Romow, kotrež Manfreda Lautenschlägerowa załožba a Centralna rada němskich Sintow a Romow jutře spožčitej. Kaž centralna rada zdźěli, kanclerku počesća, dokelž je so wona po nastupje zastojnstwa w lěće 2005 wosebje za to zasadźała, zo ludźo w Němskej a Europje po holocausće na Sintach a Romach prawa mjeńšiny a jeje wjace hač 600lětne stawizny wědomišo zaznawaja.
Pjaty najbóle potrjecheny wokrjes
Budyšin. Z incidencu 317,6 je Budyski wokrjes po RKI dźensa pjaty najbóle potrjecheny w Němskej. Wčera wozjewi wokrjes 14 natyknjenjow z koronu a 13 smjertnych padow, z nich bě šěsć w měrcu. Zhorjelski wokrjes měješe tři dalše infekcije. Štyri podate smjertne pady su z časa wot 15. do 18. apryla. Incidenca tam je po RKI dźensa 196,3.
W šulach 721 pozitiwnych testow
Krótkopowěsće (26.04.21)
Incidenca 300 jasnje překročena
Budyšin. Zwjazkowe nuzowe borzdźidło koronapandemije dla płaći wot předwčerawšeho tež w Hornjej Łužicy. W Budyskim wokrjesu zwěsćichu wot pjatka hač do njedźele 340 nowonatyknjenjow a tři smjertne pady. Tydźenska incidenca po RKI je dźensa 327,6. Tež w Zhorjelskim wokrjesu, hdźež rozprawjachu wčera wo 36 infekcijach, je incidenca wot pjatka přiběrała a je dźensa po RKI 248,9.
Ze žonomaj na čole
Drježdźany/Lipsk. Katja Kipping je kaž wočakowane načolna kandidatka sakskeje Lěwicy za wólby zwjazkoweho sejma 26. septembra. Wona dósta na sobotnym zjězdźe w Drježdźanach 75 procentow hłosow. Na třeće městno krajneje lisćiny wuzwolichu Budysku zapósłanču sejma Caren Lay. Tež sakscy Zeleni su z lěkarku Paulu Piechotta sobotu na zhromadźiznje w Lipsku žonje načolne městno krajneje lisćiny dowěrili.
Dalšej kamerje planowanej
Krótkopowěsće (23.04.21)
108 ludźi w chorownjach
Budyšin. Wo 165 dalšich natyknjenych z koronu informowaše wčera Budyski wokrjes. Incidenca je dźensa po RKI 238,5. Chorownje we wokrjesu lěkuja tuchwilu 108 koronapacientow, z nich 29 na intensiwnej staciji. Wokrjes Zhorjelc přizjewi wčera 111 nowoinfekcijow a dalše wosom smjertnych padow wot 7. do 14. apryla. Po RKI je tam incidenca dźensa 224,4.
Přihoty na „hłownu“ běža
Budyšin. Referent za hospodarstwo a infrastrukturu Domowiny Pětr Brězan budźe třěšny zwjazk w regionalnym wuběrku za přewod strukturneje změny w Sakskej zastupować. To je prezidij Zwjazkoweho předsydstwa Domowiny wčera na swojim onlinowym wuradźowanju wobzamknył. Dale přihotowali su čłonojo gremija mjez druhim tež Hłownu zhromadźiznu Domowiny w juniju w Slepom a přichodne posedźenje zwjazkoweho předsydstwa 7. meje.
Ležownosć sej wróćo žadaja
Krótkopowěsće (22.04.21)
Hotline dlěje docpějomna
Budyšin. W Budyskim wokrjesu zwěsćichu wčera 276 dalšich natyknjenjow z koronawirusom a šěsć smjertnych padow, z kotrychž su štyri hakle nětko do statistiki přiwzali. Wokrjes wot jutřišeho docpějomnosć korona-hotline wot póndźele do soboty časowje podlěša. Dźensniša incidenca je po RKI 211,5. W Zhorjelskim wokrjesu mjenowachu wčera 149 nowoinfekcijow. Incidenca wučinja tam dźensa po RKI 220,8.
Přihotuja zhromadny spis
Choćebuz/Podstupim. Zastupjerjo Rady za naležnosće Serbow su wčera z braniborskej kubłanskej ministerku Brittu Ernst (SPD) we widejokonferency njejasnosće z protokola wo januarskej zhromadnej rozmołwje rozjimali. Rada a fachowcy ministerstwa wopodstatnjeja nětko ze spisom trěbne rozrisanje Serbam wažnych temow, kotrež njejsu wobstatk noweho šulskeho postajenja.
Z chlěbom překwapjeni
Krótkopowěsće (21.04.21)
Incidenca woteběrała
Budyšin. W Budyskim wokrjesu informowachu wčera wo 15 dalšich natyknjenych z koronu. Wot tuchwilu 1 567 schorjenych lěkuja 88 w chorowni. Tudyša sydomdnjowska incidenca na 100 000 wobydlerjow je po RKI dźensa 171,5. Wo 136 infekcijach rozprawješe wokrjes Zhorjelc. Tam zwěsćichu wčera dźewjeć dalšich padow z britiskej mutantu wirusa. Po RKI je incidenca dźensa 216,4.
Muzejowe myto wuwołane
Drježdźany. Muzeje swobodneho stata móža so wotnětka wo Sakske muzejowe myto powabić. Ministerstwo za wědomosć, kulturu a turizm w Drježdźanach spožči wuznamjenjenje lětsa wosmy raz. Nimo hłowneho myta w hódnoće 20 000 eurow přizwoli wosebitej po 5 000 eurach. Myto dóstałoj stej dotal mjez druhim Muzej zapadneje Łužicy w Kamjencu a Muzej Budyšin.
Dóstanu dalše pjenjezy
Rakecy. Leaderowy region Hornjołužiska hola a haty dóstanje hač do klětušeho dalše 3,6 milionow eurow za spěchowanje projektow w kónčinje. Prěnju namołwu, srědki požadać, su zamołwići wčera wozjewili. Rakečanski regionalny management tuchwilu spěchowansku dobu 2014–2020 wuhódnoća a přihotuje strategiju za lěta 2023 do 2027.
Krótkopowěsće (20.04.21)
Změna nastupajo karantenu
Budyšin. We wokrjesu Budyšin płaći nowe rjadowanje karanteny za kontaktne wosoby. Štóž je dwójce přećiwo koronje šćěpjeny a štóž je so z někajkeje warianty wirusa wustrowił a bu jónu šćěpjeny, njetrjeba do karanteny, hdyž je bjez symptomow a imunje strowy. W Budyskim wokrjesu zwěsćichu wčera 30 nowonatyknjenjow, dźensniša incidenca po RKI je tu 258,2. Wokrjes Zhorjelc měješe wčera šěsć koronainfekcijow, incidenca po RKI wučinja dźensa 195,9.
Nowy intendant jasny
Zły Komorow. Daniel Ris naslěduje wot 1. septembra 2022 tuchwilneho intendanta Złokomorowskeho Noweho jewišća Manuela Soubeyranda. Komisija je 56lětneho z dohromady 31 požadarjow z tu- a wukraja wuzwoliła. Ris je wot lěta 2016 intendant Hrodowych swjedźenskich hrow w porynsko-pfalcskim Mayenje.
Rozšěrjeja digitalny poskitk
Krótkopowěsće (19.04.21)
Ličba natyknjenjow dale přiběra
Budyšin. W Budyskim wokrjesu informowachu wot pjatka hač do wčerawšeho wo 323 dalšich natyknjenjach z koronawirusom. Ličba smjertnych padow powjetši so wo tři na 823. Kaž sobotu rěkaše, su dotal we 80 testowanskich centrumach 40 000 spěšnotestow přewjedli. Incidenca wučinja po RKI dźensa 256,5. We wokrjesu Zhorjelc rozprawjachu wčera wo 28 dalšich koronainfekcijach. Tamniša incidenca je po RKI dźensa 248,1.
Testowanski centrum w NSLDź
Budyšin. 23. apryla wočinja w Budyskim NSLDź testowanski centruma. Słužić ma wón jako zakład za modelowy projekt w měsće. W socieće na Burskej hasy móža so wšitcy darmotnje na koronawirus testować dać, trěbna za to je chipowa kartka chorobneje kasy. Terminy su móžne na internetnej stronje . App „Schnelltest.click“ wo wuslědku testa informuje.
„Łužiskohórski spěšnik“ po puću
Krótkopowěsće (16.04.21)
Testować bjez přizjewjenja
Budyšin. Terminy za mobilne testowanske teamy w Budyskim wokrjesu online knihować njeje so wudaniło. Kaž krajnoradny zdźěli, móžeš so tam nětko bjez přizjewjenja testować dać. We wokrjesu rozprawjachu wčera wo 200 natyknjenjach z koronu. RKI mjenowaše dźensa incidencu 262,5. Zhorjelski wokrjes měješe wčera 123 infekcijow a štyri smjertne pady. Incidenca po RKI je 216,8.
Podpěra domizniskim muzejam
Budyšin. Předsydstwo župy „Jan Arnošt Smoler“ Budyšin ma za trěbne, zo ma so zamołwity wo serbske domizniske muzeje nastupajo koncept, nošerstwo a financy starać. Potrjechene su na přikład muzej Ćišinskeho w Pančicach, šulski muzej w Stróži a dom Měrćina Nowaka w Njechornju. Za to měli snadź nowe dźěłowe městno wutworić. Župa Budyšin wobroći so w naležnosći na radźićelow Załožby za serbski lud.
Biden–Putin w čěskej stolicy?
Krótkopowěsće (15.04.21)
Incidenca dale přiběra
Budyšin. Gmejna Chrósćicy je po informaciji sakskeho socialneho ministerstwa jenička komuna w Budyskim wokrjesu, hdźež njebě w minjenych sydom dnjach žane nowe natyknjenje z koronu. We wokrjesu registrowachu wčera 271 infekcijow a dwaj smjertnej padaj. Dźensniša incidenca po RKI je 255,2. Wokrjes Zhorjelc wozjewi wčera 157 infekcijow a dweju zemrěteju. Incidenca po RKI je tam 208,5.
Tež lětsa žane chodojtypalenje
Budyšin. Chodojtypalenje je „ludowy nałožk“, kotryž so – hinak hač křižerske procesiony, kotrež přirjaduja wobłukej nabožnych tradicijow – pod wuměnjenjemi runje podlěšeneho lockdowna wotměć njesmě. To wuchadźa z wčerawšeje zdźělenki Budyskeho krajnoradneho zarjada. Zymu zhromadnje z wulkim wohenjom rozžohnować tuž druhi raz za sobu wupadnje.
Sypaja wapno do wody
