Tusk: Žadyn no-deal-brexit

wutora, 22. oktobera 2019 spisane wot:

Strasbourg/London (dpa/SN). Europska unija chce wšitko činić, zo by njerjadowanemu wustupej Wulkeje Britaniskeje z Europskeje unije zadźěwała. To je prezident Rady EU Donald Tusk připowědźił. „No-deal-brexit njebudźe nihdy naš rozsud“, rjekny Tusk w Europskim parlamnenće w Strasbourgu. Wuprajenja Tuska hódnoća jako pokazku na to, zo móhł wón podlěšenje termina brexita poručić, dyrbjało-li zrěčenje wo wustupje z EU w britiskim parlamenće znowa zwrěšćić.

Netanjahu zwrěšćił

Tel Aviv (dpa/SN). Israelski prawicarsko-konserwatiwny ministerski prezident Benja­min Netanjahu je po wólbach parlamenta w septembru z wutworjenjom noweho knježerstwa zwrěšćił. Wotpowědny mandat wróći wón prezidentej Reuvenej Rivlinej. Tón je připowědźił, nadawk­ k wutworjenju knježerstwa by­wšemu šefej wójska Bennyjej Gantzej přepodać. Gantz ma nětko štyri tydźenje chwile za chětro wobćežnu misiju.

Čitanju politikarja zadźěwali

Nowy wobchadny centrum před Choćebuskim Hłownym dwórnišćom su po tři lěta trajacych twarskich dźěłach wčera swjatočnje přepodali. Wot dźensnišeho je wón wužiwajomny. Z nim lutuja pasažěrojo čas, hdyž z ćaha do busa abo tramwajki přelězu a nawo­pa­k. Nimo toho maja prawidłowne zwiski do Berlina. Braniborska je 20 milionow eurow přinošowała. Foto: Michael Helbig

Wopominaja demonstraciju

wutora, 22. oktobera 2019 spisane wot:
Berlin (dpa/SN). Hnydom wjacori wuměłcy chcedźa na hobersku demonstraciju na Berlinskim Alexanderowym naměsće před 30 lětami dopominać. Sta­tysacy wobydlerjow Němskeje demokratiskeje republiki běchu tam 4. nowembra 1989 za demokratiju pro­testowali. K te­hdyšim rěčnikam słušachu spisowaćelka Christa Wolf, dźiwadźelnik Ulrich Mühe a dźiwadłowy awtow Heiner Müller. Nětko chce dźiwadłowy kolektiw „Tankowy křižak Čerwjenawka“ demonstraciju zaso wožiwić, kaž režiserka Susann Neuenfeldt wčera zdźěli. Něhdźe 60 wuměłcow a hudźbnicy punkband chcedźa při sławnym swětowym časniku wustupić. Dźiwadło Volksbühne planuje nimo toho insce­naciju „Wuchodny Berlin – rewija zapaseneje składnosće“. Po měnjenju spisowaćelki Marion Brasch rěča tuchwilu jenož wo 9. nowembru jako róčnicy powalenja murje. „Na 4. nowember rady zabywaja. To pak bě dźeń, na kotrymž su ludźo na dróhu šli, kotřiž chcychu w kraju něšto změnić.“

Žada sej wěstotne pasmo w Syriskej

wutora, 22. oktobera 2019 spisane wot:

Berlin (dpa/SN). Němska zakitowanska ministerka Annegret Kramp-Karrenbauer (CDU) je sej žadała, na sewjeru Syriskeje podłu mjezy Turkowskeje mjezynarodnje dohladowane wěstotne pasmo zarjadować. Wotpowědny, ze zwjazkowej kanclerku Angelu Merkel (CDU) dorěčany namjet je Kramp-Karrenbauer wčera zapadnym zwjazkarjam předpołožiła. Na zetkanju čłonskich krajow NATO štwórtk a pjatk w Brüsselu chce swój nastork­ před­stajić a rozjimać dać, kaž wona připowědźi. Wo móžnym zasadźenju Zwjazkoweje wobory dyrbjał zwjazkowy sejm rozsudźić. Zaměr měł tež program za ciwilny nowonatwar być. Turkowska bě 9. oktobra na sewjeru Syriskeje wojersku ofensiwu přećiwo kurdiskej milicy zahajiła. Zakitowanski politikar SPD Fritz Felgentreu kritizuje, zo njeje Kramp-Karrenbauer swój namjet nastupajo wěstotne pasmo w Syriskej z SPD dorěčała.

Dźensa chcyštaj so ruski prezident Wladimir Putin a turkowski prezident Recep Tayyip Erdoğan w Sočiju zetkać a wo połoženju w Syriskej wuradźować.

Koaliciske jednanja zahajene

wutora, 22. oktobera 2019 spisane wot:

CDU, SPD a Zeleni w Sakskej prěnje konkretne rozmołwy wjedli

Drježdźany (dpa/SN). Po puću do „Kenije“: CDU, SPD a Zeleni chcedźa w Sakskej zhromadnje knježić. Sydom tydźenjow po wólbach krajneho sejma su so strony wčera k prěnim koaliciskim jednanjam za tajki zwjazk třoch stron schadźowali. Ministerski prezident Michael Kretsch­mer (CDU) rěčeše wo „woprawdźe pozitiwnym signalu“. Zaměr je „wutworić knježerstwo, kotrež přichodne pjeć lět stabilnje a bjez njetrjebawšeje zwady krajej słuži“, wu­zběhny ministerski prezident po prěnich rozmołwach w Drježdźanach.

CDU, SPD a Zeleni běchu minjene tydźenje šansy za móžne zhromadne skutkowanje pruwowali. „Při tym smy pyt­nyli, zo je tež wosobinska dowěra data“, Michael Kretschmer podšmórny. Nětko dźe wo wobsahowje konkretne koaliciske zrěčenje, a tajke ma dokładnje rozjimane być. „Naš narok je sakska koalicija, kotraž so mudrje a zmužiće do dźěła da. Po dźensnišim dnju mam zaćišć, zo móže so to poradźić.“

NATO prawy gremij?

wutora, 22. oktobera 2019 spisane wot:
Namjet němskeje zakitowanskeje minis­terki Annegret Kramp-Karrenbauer (CDU), w Syriskej mjezynarodnje dohladowane wěstotne pasmo zarjadować, je kedźbyhódne. Wšako so Němska tak po dołhim mjelčenju scyła słowa jima. Wothladane wot toho, hač je namjet z koaliciskim partnerom SPD a wonkownym ministerstwom dorěčany, wón ničo na tym njezměni, zo njeje wojerska ofensiwa Turkowskeje w Syriskej ničo druhe hač mjezynarodne prawo ranjaca agresija. Što by było, by-li syriske wójsko do južneje Turkowskeje zaćah­nyło? Nětko chcyła němska zakitowanska ministerka z druhimi krajemi NATO­ kaž tež z Ruskej a Turkowskej rěčeć. Njemóžu pak sej při najlěpšej woli před­stajić, zo ruski prezident Putin abo turkowski prezident Erdoğan namjet Němskeje chutnje bjerjetaj. Lěpje by było, před UNO raznje přećiwo turkowskej inwaziji wustupować. To by prawy gremij był – nic NATO. Marko Wjeńka

Warnuje před AfD

wutora, 22. oktobera 2019 spisane wot:
Erfurt (dpa/SN). Něšto dnjow do wólbow krajneho sejma je Zwjazk hospodarstwa Durinskeje před tym warnował AfD wolić. Štóž woli stronu z Björnom Höcku na čole, kiž steji za rasizm a prawicarski ekstremizm, „dyrbjał wědźeć, zo tak mjenu Durinskeje zeškodźi“, zdźěla hłowny jednaćel zwjazka Stephan Fauth. Durinska trjeba swětej wotewrjenu klimu, štož so jeno z wotewrjenosću a tolerancu radźi, wón piše. W Durinskej wola njedźelu nowy krajny sejm. AfD móže so po naprašowanjach 20 do 24 procentow nadźijeć.

Tójšto pjenjez prawiznikam

wutora, 22. oktobera 2019 spisane wot:

Berlin (dpa/SN). Němske zwjazkowe mini­sterstwa su minjene lěta na wšě 200 000 eurow za prawiznikow wudali, zo bychu naprašowanja žurnalistow wotwobarali. To wuchadźa z wotmołwy zwjazkoweho knježerstwa na naprašowanje frakcije Lěwicy w zwjazkowym sejmje. Wot wšitkich ministerstwow a institucijow, kotrež běchu wotpowědne ličby za lěta 2013 do 2018 zapodali, tři ministerstwa wosebje napadnu: Zwjazkowy zarjad za wustawoškit je 74 000 eurow – a tak najwjace – za juristiske wotwoba­ranje nowinarskich naprašowanjow wudał. Zwjazkowy zarjad za imobilijowe nadaw­ki płaćeše prawiznikam 49 000 a wobchadne ministerstwo 35 000 eurow. Wonkowne ministerstwo je prawi­znikam nimale 20 000 eurow płaćiło.

Zwjazk žurnalistow Němskeje (DJV) kritizuje, zo so telko pjenjez z dawkowych srědkow prawizniskim kenclijam płaći. „Je skandalozne, zo zwjazkowe institucije z hodźinskimi sadźbami hač do 380 eurow k zbohatnjenju prawiznikow přinošuja, zo bychu njepřijomne prašenja žurnalistow wotwobarali“, rjekny zwjazkowy předsyda DJV Frank Überall.

To a tamne (22.10.19)

wutora, 22. oktobera 2019 spisane wot:

Nachribjetnik ze 14 000 eurami je předewzaćelka z Chiny w němskim spěšniku ICE ležo wostajiła – a dźakowano železnicarce zaso wróćo dóstała. We wačoku běchu dalše chinske pjenjezy a wjacore kreditne karty. 43lětna bě njedźelu z ćahom z Dortmunda do Würzburga jěła a na nachribjetnik zabyła. Na to informowaše policija železnicarku w ćahu, kotraž wačok nadeńdźe. Samsny wječor jón Chinjanka zaso měješe.

Chětro zwažliweho fota na luksusowej dowolowej łódźi wo sebi dla ma pasažěrka na čas žiwjenja zakazane z łódźu sobu jěć. Žona bě přez balkonowe wobhrodźenje swojeje kabiny zalězła, zo by z mobilnym telefonom „selfie“ zhotowiła. To bě „lochkomyslne a strašne“, zdźěla łódźernja Royal Caribbean. Pasažěr bě žonu při zwažliwym postupowanju wobkedźbował a wobsadku łódźe informował.

Ma zrozumjenje za frustraciju

póndźela, 21. oktobera 2019 spisane wot:

Freiburg (B/SN). Arcybiskop Freiburga Stephan Burger ma zrozumjenje za ža­danje, žónske na měšnicy wu­swjećić, njewidźi pak žanu móžnosć, cyrkwinskoprawniske předpisy změnić. Wón móže sej předstajić, zo „je frustrěrowace, hdyž je na zakładźe splaha přistup k tutomu powołanju zawrjeny“. Na wěcy samej njemóže arcybiskop ničo změnić, wón pak so za to zasadźuje, zo přińdźe wjace žónskich do nawjedowacych pozicijow.

Bamž dowola putnikowanja

Vatikan (B/SN). Bamž Franciskus dowola oficialne putniske jězby k marijanskemu hnadownemu městnu Medźugorje. Zdobom ma so tomu zadźěwać, zo so tole wułožuje jako připóznaće pozdatnych zjewjenjow, zdźěli Vatikan. Wo tutym městnje w Bosniskej-Hercegowinje bu prěni króć w lěće 1981 wo zjewjenjach rozprawjane. Hač do dźensnišeho so wizi­je wonych šěsć widźerjow dale po­srědkuja a mnozy putnicy su so hižo naka­zali. „Z Medźugorja wuchadźa wosebita hnada“, zdźěli Vatikan. Medźugorje je jedne z najwažnišich putniskich městnow swěta.

20 lět dušepastyr

nawěšk

SERBSKE NOWINY podpěruja:

Novi Sad – kulturna stolica Europy

nowostki LND