Berlin (dpa/SN). Do dźensnišeho wuradźowanja wodźacych zastupnikow hospodarstwa z hospodarskim ministrom Peterom Altmaierom (CDU) je sej srjedźostawske hospodarstwo konkretny plan zběhnjenja naprawow koronakrizy dla žadało. Při tym dźe wo spěšnu pomoc nastupajo likwidnosć předewzaćow kaž tež wo konjunkturny program z dołhodobnym zniženjom dawkow. Hospodarstwo warnuje zdobom před njejasnymi a zamylacymi rjadowanjemi. W lisće ministerskim prezidentam zwjazkowych krajow žadaja sej zastupnicy hospodarstwa jasne rjadowanja a perspektiwy za wšitke předewzaća, kotrež su koronakrizy dla tuchwilu zawrjene. Hłowny jednaćel zwjazka srjedźostawskich předewzaćow Ludwig Veltmann w lisće mjez druhim kritizuje, zo nowe rjadowanje, po kotrymž smědźa přichodnje jenož wobchody hač do 800 kwadratnych metrow předawanskeje płoniny wotewrěć, wulku ličbu druhich fachowych wobchodow wuzamkuje. Tež dale trajace zawrjenje hosćencow a hotelow je jemu dospołnje njezrozumliwe, dokelž je eksistenca tójšto tutych firmow wohrožena.

Dohromady 97 pozicijow 2014 zahajena zwjazkowa lisćina imaterielneho kulturneho herbstwa Němskeje dotal ma. Serbske nałožki w běhu lěta su w tutym prěnim lěće – mjez dalšimi 34 najwšelakorišimi kulturnymi praktikami, tradicionelny- mi rjemjesłami a regionalnymi swjedźenjemi – přiwzali. Kóžde dwě lěće rozsudźi konferenca kulturnych ­ministrow krajow na zakładźe posudka ekspertow Němskeje komisije pola UNESCO znowa, što jako wobchowace hódne připóznaja. Napadnje, kelko tradicionelnych lokalnych swjedźenjow to dotal je – a dźiwaš so, što wšo hdźe maja: „Further Drachenstich“, „Spergauer Lichtmess“ abo tež „Eisenacher Sommergewinn“ na přikład. Hladajo na to šansy za Kamjensku Boršć snano tak špatne njejsu, so mjez 97 lětsa nominowanymi přesadźić. Štož swjedźenske tradicije nastupa, je Sakska w zapisu dotal jenož z Hórniskimi paradami zastupjena. Cordula Ratajczakowa

Drježdźany (dpa/SN). Pomocna organizacija Lěkarjo bjez mjezow boji so katastrofalnych wuskutkow koronapandemije w Africe. „Ćežke pady lěkować snadneje ličby intensiwnych stacijow dla scyła móžno njeje“, rjekny za organizaciju dźěłacy epidemiologa Maximilian Gertler Drježdźanskim nowinarjam.

Samo najjednoriše škitne naprawy njejsu žiwjenskich wuměnjenjow dla w afriskich statach móžne. „Štóž dyrbi z wjacorymi wosobami w małej chaće bjez wody žiworić, tón móže so jenož jara­ ćežko před infekciju škitać“, Gertler rjekny. Dalši problem su ćěkancy, kotřiž nimaja scyła ­žane bydlenje abo bydla w stanowych lěhwach pod špatnymi hygie­niskimi wobstejnosćemi.

„Lěkarjo bjez mjezow“ podpěruja tójšto afriskich statow, lěkarski personal wukubłać, izolaciske centrumy a desinfekciske stacije zarjadować kaž tež fachowe poradźowanje skićić, Gertler naliči. Kaž pobrachowace škitne srědki tež zawrje­ne mjezy afriskich statow organi­zaciju wužaduja. „Tak njesmědźa sobudźěłaćerjo přijěć, kotrychž nuznje trje­bamy.“

Wospjet zwonjenje cyrkwinskich zwonow přetorhnył je šup (Waschbär) w Löwenhagenje pola Göttingena. Zwěrjo, kotrež hižo dlěši čas na łubi ewangelskeho Božeho domu bydli, bě ručicu elektriskeho motora zwonow na druhi bok połožiło. Zamołwići wěsty čas trjebachu, zo bychu zwěsćili, zo šup trójne wšědne zwonjenje stajnje zaso přetorhnje. Šup smě dale na łubi wostać, ručicu chcedźa z groćanej konstrukciju wobdać, tak zo njemóže jón šup hižo dosahnyć.

Wjace hač 20 000 eurow namakała ­­a hnydom wotedała je 60lětna žona w poruhrskim Mühlheimje. Žona bě w předrumnosći banki na pjenježnym awtomaće čornu tobołu namakała. W njej běchu pjenjezy we wobalkach a dwaj klučej. Sprawna namakarka tobołu w susodnym nakupowanskim centrumje woteda. Policija nětko za wobsedźerku toše pyta.