Drježdźany (dpa/SN). Wjace hač tysac žurnalistow chce wo wólbach Sakskeho krajneho sejma rozprawjeć. Kaž krajny sejm wčera zdźěli, su so zastupnicy medijow z Němskeje, ale tež z Čěskeje, Danskeje,­ Italskeje, Ruskeje, Japanskeje a Turkowskeje za wólbny dźeń přichodnu njedźelu,­ 1. septembra, w twarjenju parlamenta w Drježdźanach přizjewili. Ně­hdźe 50 wusyłanskich wozow chcedźa nastajić a wjacore tysacy metrow kabla skłasć. Přistup k twarjenju krajneho sejma a wokolnych płonin změja z wě­stotnych přičin jeno přizjewjeni zastupnicy medijow, politiki a zarjadnistwa. Najwjetši nawal wočakuja we 18 hodź., hdyž budźe „slědźenska skupina wólby“ po zawrjenju wólbnych lokalow prěnje wólbne wuslědki zjawnosći prezentować.

Berlin (dpa/SN). Něšto dnjow do wólbow krajneju sejmow w Sakskej a Braniborskej je zwjazkowe knježerstwo dźensa naćisk zakonja schwaliło, z kotrymž chcedźa strukturnu změnu we wuhlowych kónčinach z miliardami eurow podpěrać. Hač do lěta 2038 chce Němska klimje škodźace zmilinjenje brunicy skónčić, kaž bě wot zwjazkoweho knježerstwa zasadźena wuhlowa komisija w januaru wobzamknyła. Koncept chcedźa nětko zwoprawdźić.

We wuhlowych kónčinach Sewjerorynsko-Westfalskeje, Braniborskeje a Sakskeje hišće tysacy dźěłowych městnow wot wuhla wotwisuje a njedźelu wola nowy krajny sejm w Sakskej a Braniborskej.

W naćisku zakonja dźe mjez druhim wo to, rozdźělić 14 miliardow eurow „za wosebje wuznamne inwesticije w brunicowych kónčinach“. Zo njetrjebali při druhich předewzaćach Zwjazka brunicowych kónčin dla lutować, předwidźi plan přidatne „zesylnjowace srědki“ za mi­nisterstwa. Cyłkownje planuja 40 miliardow eurow za strukturnu změnu.

Sakska podpěruje natwar wodźikoweho slědźenskeho centruma w Zhorjelcu

Drježdźany/Zhorjelc (SN). Sakske statne knježerstwo je wčera planowanske srědki za nowy wodźikowy slědźenski centrum w Zhorjelcu přizwoliło. W Zhorjelskim Fraunhoferskim wodźikowym laborje na planowanym inowaciskim campusu chcetej předewzaće Siemens a Fraunhoferska towaršnosć wudobywanje, skła­dowanje a wužiwanje wodźika přeslědźić. Zhorjelc chcedźa tak dołhodobnje na kompetencny centrum za wodźikowu technologiju wuwiwać.

„Inowatiwne wodźikowe technologije skića Zhorjelcej a Łužicy wulke šansy, zo nastanu tam nowe industrijne dźěłowe městna. Siemens, Fraunhofer, wysoke šule a předewzaća regiona chcedźa tutón puć do směra na energijowu techniku přichoda zhromadnje kročić. Před měsacom smy wotpowědnu deklaraciju podpisali. Nětko swobodny stat kaž přilubjene swój podźěl přinošuje“, rjekny ministerski prezident Michael Kretschmer (CDU).

Wuraz „Malle“ za španisku dowolowu kupu Mallorca wužiwać móže so z drohej naležnosću stać. To dyrbjachu tež zamołwići internetneho pućowanskeho předewzaća „Reisetiger“ nazhonić. Přede­wzaćel z Hildena pola Düsseldorfa bě sej wobchadnorěčne zapřijeće „Malle“ wot europskeho markoweho zarjada škitać dał a žada sej nětko wotpowědne popłatki. Prawiznik pućowanskeho portala je mjeztym skóržbu zapodał. Z wobchadnorěčnym „Malle“ wabja za hudźbu a partyje na dowolowej kupje.

Symbol wikinga na ampli pěškow je wot najnowšeho w danskim měsće Aarhus widźeć. Ideju, čerwjeny signal z ilustraciju historiskich předchadnikow Skandinawičanow narunać, měješe měšćanski radźićel. Wón pokazuje na to, zo měješe Aarhus za čas wikingow w 10. lětstotku wulki wuznam.