Rozšěrjene wiki k jubilejomaj
Spěchowanski kruh za serbsku ludowu kulturu wuhotuje tež lětsa znowa „wubědźowani wo najrjeńše serbske jutrowne jejko“, a to hižo 70. raz. Zdobom hotuja so na tohorunja jubilejne 30. serbske jutrowne wiki. Bosćan Nawka je so z předsydku towarstwa Francisku Grajcarekec rozmołwjał.
Knjeni Grajcarekec, maće hladajo na jubilej jutrownych wikow wosebitu narodninsku překwapjenku planowanu?
F. Grajcarekec: Haj. Chcemy wiki tónraz 4. a 5. měrca takrjec po cyłym Budyskim Serbskim domje wuhotować, rozšěrjejo je na štwórtu etažu. Nimo toho budu dohromady 30 hněžkow po twarjenju schowanych, za kotrymiž hodźi so po wašnju jutrownych jejkow pytać. Tradicionalnych poskitkow pak njetrjebaja so wopytowarjo wzdać. Tak móža zajimcy ludowym wuměłcam při debjenju jejkow přez ramjo hladać, so sami we wóskowanju wuspytać a hižo wupyšene owalne drohoćinki kupić. Nimo toho budu dalše wudźěłki na přikład škleńcoweho wuměłstwa a keramiki kaž tež Ludoweho nakładnistwa Domowina na předań.
Wobnowjena normalita
Silwester so wšudźe a druhdźe zaso mjetajo tolerje za krošikami praskaše, zo so někotremužkuli mjezwoči zaswěći. Ptači kwas wotmě so w Serbach znowa na połnych žurlach, a tele dny wjercholi „pjaty počas“ při Čornym Halštrowje runje tak kaž podłu Ryna po zwučenym wašnju jako masowy spektakl ze zjawnej žlokańcu inkluziwnje zdźěla komatoznych konsekwencow. „Normalita“ je so potajkim po wšěm zdaću nawróćiła. Charakteristisce za tajkule „normalitu“, to knježi wědomostny konsens mjez sociologami, etnologami a (kulturnymi) antropologami, su rituale. Tele wopřijeće njewoznamjenja jenož z nažel nadal přewšo prezentneho, hdyž nic samo přiběrajcy rozšěrjaceho so eurocentristiskeho wida „obskurne“ praktikowanje tradicijow někajkich prawobydlerjow Awstralskeje, Brazilskeje abo Namibije, ale wopisuje powšitkownje rutiny wšěch móžnych towaršnostnych worštow, skupinow kaž tež jednotliwcow po cyłym swěće.
Dwójne měritko humanitarnosće
Dominowaca powěsć w tutych dnjach je katastrofa zemjerženja w turkowsko-syriskej pomjeznej kónčinje. Ličba smjertnych woporow z kóždym dnjom stupa – tuchwilu je jich 21 000. Horjo ludźi, kotřiž su přežiwili – a kiž nětko w rozpadankach za swojimi lubymi pytaja –, je za nas njepředstajomne. Tući nadźiju, zo je pod rozwalinami zaryty lubowany čłowjek tola hišće žiwy, spušćić nochcedźa. Čim wažniša je spěšna pomoc – kóžda hodźina je rozsudna.
Dohromady 45 statow so na najwšelakoriše wašnje na humanitarnej pomocy wobdźěluje. Tuta pak ćeče wosebje na jednu stronu wot katastrofy potrjecheneje kónčiny – na turkowsku. Tež němske knježerstwo je hnydom po zemjerženju turkowskemu statej bjezposrědnju pomoc přilubiło a je wuchowanske jednotki do kraja pósłało. Nastupajo hnydomnu pomoc za Syrisku pak rěkaše w knježerstwowej zdźělence, „zo je z Organizaciju zjednoćenych narodow (UNO) w kontakće...“ Němska pozicija je symptomatiska w skupinje pomhacych krajow. Po zdaću eksistuje dwójne měritko, kotrež rozsud za spěšnu humanitarnu pomoc wowliwuje. Čehodla?
„Naiwnje do napjatosćow“
„Es kommt darauf an das Hoffen zu lernen“, łužiski brunicowy rewěr wobswětlacy dokumentaciski film Annetty Dorotheje Weber změje 19. februara w Mannheimje premjeru. Wot 23. februara do 4. měrca pokazaja pask we wobłuku turneje ducy po Łužicy mjez druhim w Choćebuzu, Běłej Wodźe, Slepom a we Wojerecach. Bosćan Nawka je so z režiserku rozmołwjał.
Knjeni Weber, što je Was pohnuło, z dosć dalokeho Mannheima film wo hórnistwje we Łužicy a sćěhach toho produkować?
Druha stafla rjadu čitanjow
Žitawa (AB/SN). Wobydlerske Radio Zett ze Žitawy zahaji njedźelu, 12. februara, w 16 hodź. swoju druhu staflu čitanjow serbskeho basnistwa. Literarna hodźinka wusyła so kaž wšě dalše pjeć w nowym rjedźe internetnje pod www.radio-zett.org, z čimž su po wšěm swěće přistupne. Hižo wot pjatka hodźi so najnowše wusyłanje wotwołać, samsne płaći za wšitke šěsć čitanja z prěnjeje stafle.
Najnowša mjezynarodna a wjacerěčna hodźinka je Milanej Hrabalej wěnowana, čěskemu basnikej a wurjadnemu přełožowarjej serbskeje literatury do rěče našich bliskich susodow. Literat z Varnsdorfa čita swoje basnje čěsce a Benedikt Dyrlich, znowa hłowny organizator a redaktor rjadu čitanjow, je w serbskich a zdźěla němskich přełožkach z pjera wosebje Róže Domašcyneje přednjese.
Na digitalny staršiski wječork
Tydźeń digitalnych staršiskich wječorkow zarjaduje Zwjazkowa agentura za dźěło wot dźensnišeho hač do 11. februara. Što za tym tči, rozłožuje nowinska rěčnica Budyskeje agentury za dźěło Corina Franke w rozmołwje z Axelom Arltom.
Knjeni Franke, čemu słuži nowy poskitk Zwjazkoweje agentury za dźěło?
C. Franke: Digitalne staršiske wječorki su nowa forma powołanskeho poradźowanja. Wone wudospołnjeja dotal znate poskitki, kaž su to direktne powołanske poradźowanje w šulach, indiwidualna rozmołwa, telefoniske poradźowanje abo tajke jako widejokonferencu.
Kotre nazhonjenja na tymle polu su?
C. Franke: Za čas korony je digitalna wuměna start do powołanskeho žiwjenja nastupajo wažny grat była. Jednotliwe tajke staršiske wječorki su so jako spomóžne wopokazali. Nimo toho mamy trend k digitalnym formam. Tuž je Zwjazkowa agentura za dźěło prěni raz cyły tajki tydźeń organizowała.
Što tam na wobdźělnikow čaka?
„Njemóže ženje zamołwite być“
Policajska kriminalna statistika wujewja za lěto 2021 w Budyskim wokrjesu 58 padow seksualneho znjewužiwanja dźěći. Kwota wujasnjenja wučinješe 91,4 procenty. Tak mjenowana njewotkryta ličba (Dunkelziffer) je njeznata. Silke Richter je so z rěčnikom Zhorjelskeje policajskeje direkcije Marcelom Malchowom rozmołwjała.
Knježe Malchowo, što je po słowach zakonja seksualne znjewužiwanje dźěći?
Wopominać, zo njebychmy zabyli
Dźensa wopominamy wuswobodźenje koncentraciskeho a zaničowanskeho lěhwa Auschwitz před 78 lětami kaž tež wšitke wopory nacionalsocialistiskeho namócneho knjejstwa. 27. januar je naš narodny wopomnjenski dźeń. Składnosć to, zjawnje, ale tež wosobinsce zhladować na młódše stawizny, na jednanja, kotrež přeco hišće wšu našu zamóžnosć předstajenja překročeja. Runje tohodla je njeparujomne, zo we wopominanju zdobom na nadawki přitomnosće a přichoda dźiwamy.
Prěni nadawk kubłanja je tón, so wo to starać, zo so Auschwitz ženje njewospjetuje. Tele znate zwěsćenje Theodora W. Adorna měri so we wobydlerskej towaršnosći na kóždu jednotliwču a kóždeho jednotliwca z nas. Z teje přičiny je tutón pomjatny dźeń dorazne žadanje, być a wostać stražliwi. Wopomnjeće na ludomordarstwo na europskich Židach, horjo milionow ludźi, kotrež je nacionalsocialistiske namócne knjejstwo ze swojim čłowjekow hidźacym rasowym błudom na Europu a tamniše dźěle swěta přinjesło, sej pomina, hižo spočatkam kóždehožkuli tajkeho stracha rozsudnje znapřećiwić.
Fascinowace hrodźišćo z inspiraciju
Spočatk februara wuńdźe pod titulom „Die Krone des Schlangenkönigs“ prěni zwjazk noweho rjadu ilustrowanych dźěćacych knihow „Merles mystische Abenteuer“. Mjenowane dyrdomdeje wotměwaja so we Łužicy, swět serbskich bajow a powěsćow ze znatymi mytiskimi figurami je z jednanje rozsudnje pohonjowacym faktorom. Bosćan Nawka je so z awtorku Stefanie Domašcynej rozmołwjał.
Knjeni Domašcyna, přeradźće nam prošu cyle skrótka, snano z třomi abo štyrjomi sadami, wo čo w knize dźe.
S. Domašcyna: Wuchadźišćo je přećah młodeje, 13lětneje holcy z wulkoměsta do Wotrowa. Na tamnišim hrodźišću zetka dźiwneho muža, kotryž chce ju z bywšeho słowjanskeho wobtwjerdźenja wuhnać. Jej nimo toho napadnje, zo so tam z hadami jenož tak mjerwi. Tejle dožiwjeni stej jej z přičinu wuslědźić, što so za nimaj chowa.
Što je Was pohnuło, so runje za Wotrow – na knižnej wobalce dźě je wo „hroznym hnězdźe“ rěč – jako městnosć jednanja rozsudźić?
Ma mjeztym dobre začuće
Wot spočatka awgusta 2022 je André Bulank Njebjelčanski wjesnjanosta a tuž nimale poł lěta w zastojnstwje. Wo nazhonjenjach w jeho dotalnym dźěle je so z nim Marian Wjeńka rozmołwjał.
Knježe Bulanko, kak so Wam po poł lěće jako wjesnjanosta wjedźe?
A. Bulank: Čuju so na kóždy pad wužadany. Je to zajimawy a mnohostronski nadawk. Dyrbjach so wězo najprjedy do wšitkich temow zadźěłać, štož přeco hišće činju.
Sće wy dźěło, kajkež nětko jako wjesnjanosta wukonjeće, takle wočakował?
A. Bulank: Mějach wo dźěle wjesnjanosty takrjec zakładne předstawy, što na mnje čaka. Z kóždej nowej temu pak zběram nowe nazhonjenja w dźěle wjesnjanosty. Wěda potajkim dźeń a dale rosće.
Kajki bě přechod wot Wašeho předchadnika k Wam?
