Bičwolejbul při Slěbornym jězoru

srjeda, 01. awgusta 2018 spisane wot:
Při Slěbornym jězoru pola Bjedrichec přewjedźechu minjeny kónc tydźenja mjeztym 26. bičwolejbulowy turněr. Něhdźe 60 mustwow je při najwjetšej horcoće na dźesać hrajnišćach wo dypki wojowało. Mjez sportowcami wuhladachmy znowa serbskich wolejbulistow ze Šunowa, z Koćiny, Hózka a Worklec. Z cyłkownym dobyćerjom sta so cyłk „Kedźbu, mały mjedwjedź přińdźe!“. Foto: Stefan Möller

Wuspěšna sezona lubi dobre wuwiće

wutora, 31. julija 2018 spisane wot:

Po zakónčenju sezony na 2. městnje we wokrjesnej klasy a jako wicemišter wokrjesa Budyšin su wolejbulisća z Pančic-Kukowa při grilowanju na hrajnu dobu wróćo zhladowali. Do spočatka dypkowych hrow běchu so na nowy system dojednali. Tak nastajichu stajnu šestku, kotraž ma so primarnje zasadźić. Njemóžeše-li so hrajer na hrě wobdźělić, měješe tón kruteho zastupjerja. Tak bě kóždemu wěsta pozicija na polu zawěsćena, a mužojo móžachu so na so nastajić. Tak nasta woprawdźite mustwo, wuprudźace suwerenosć a dobyćersku wolu. To pokaza tež fakt, zo su mužojo ST Marijineje hwězdy jako jeničcy pozdźišeho dobyćerja stafle ST Sokolnik dwójce porazyli. Powšitkownje system ze stajnej šestku přez cyłe lěto dosć derje fungowaše, štož zaleži tež na tym, zo je so wolejbulistam dale poradźiło dorost za mustwo zdobyć. Loni hrajachu wšak hišće z mysličku, druhe mužace mustwo wutworić. Aktualny puć klóšterskeho cyłka pak je definitiwnje lěpša warianta.

Wuběrny start do třećeje ligi

wutora, 31. julija 2018 spisane wot:

FC Energija Choćebuz – FC Hansa Rostock 3:0 (2:0)

Zestawa domjacych: Spahić – Starcew (70. Scheidhauer), Stein, Matuwila, Schlüter, Kruse, Weidlich, de Freitas, Zimmer (77. Geisler), Viteritti, Mamba (89. Knechtel)

Bičwolejbulowa tura Satkule

wutora, 31. julija 2018 spisane wot:
Do Pančic-Kukowa dojědźechu sej wčera wječor młodźi wolejbulisća z cyłeje Łužicy. Tu wotmě so 6. stacija Satkula-bičwolejbuloweje tury. 16 mustwow bě přichwatało a wubědźowaše so wo dobyće. Na dwěmaj hrajnišćomaj widźachu přihladowarjo horce boje při runje tak horcym wjedrje. Na kóncu přesadźichu so hrajerjo mustwa „Mixery“ w finalu přećiwo domjacemu zastupnistwu „Dwójna Nula“. ­Třeće městno wobsadźi cyłk Drježdźanskich studentow „Bjarnat Krawc“. Přichodny tydźeń dojědu sej Satkularjo do Nuknicy na dalše wudaće Satkula-bičtury. Foto: Darius Budar

Cil Pančičanskich koparjow, zamołwitych ST Marijineje hwězdy a trenarja Erwina Kleinmanna za sezonu 2017/2018 rěkaše, so na kóncu mjez prěnimi třomi w tabulce zaměstnić. Wulke předewzaće bu z wuběrnym druhim městnom w stafli dwaj Ewag-Kamjenc-ligi spjelnjeny. Tutón staw wjedźeše po 30. hrajnym dnju samo k hrě wo postup do wokrjesneje wyšeje ligi, a to přećiwo ST Porchowej, druhemu stafle jedyn. Pančičenjo duel njezbožownje přěhrachu. Po 30 partijach we wokrjesnej lize, bjez relegacije, steješe w protokolu 17 dobyćow, šěsć remisow a sydom poražkow. Z wrotowym poměrom 76:32 bě ST Marijina hwězda druhi najlěpši w stafli. Jenož načolnik ST Natwar Němske Pazlicy měješe z poměrom 98:31 lěpšu bilancu.

Tójšto změnow w Delanach

póndźela, 30. julija 2018 spisane wot:

Jako so w rjadach Sokoła Ralbicy/Hórki před měsacom trenar Jiří Krohmer rozžohnowa, pytachu w Delanach za nowym nazwučowarjom. Někotři kandidaća prezidentej Dierkej Šewcej wotprajichu, tamni chcychu přewjele pjenjez měć. Angažowaneho trenarja za niše koparske klasy namakać je dźeń a ćešo.

Dołho rozmyslować pak w Ralbicach ­po wotprajenjach njetrjebachu, wšako mě­jachu stajnje tak mjenowaneho jokera w pozadku. Wrotar Chrystof Gloxyn dyrbješe w minjenych lětach přeco zaso raz jako trenar zaskočić a swoju wěcku tež stajnje wulkotnje zmištrowa. Treningowe jednotki so mustwu přeco lubjachu a tež z kompetentnymi narěčemi do hrow sej rodźeny Ralbičan respekt mjez přećelemi nadźěła. Wot 1. julija steji tuž wón nětko při kromje a mustwo diriguje.

Na wjesnym swjedźenju težza bulom honili

póndźela, 30. julija 2018 spisane wot:

Na wjesnym swjedźenju w Serbskich Pazlicach su pjatk a sobotu tež kopańcu hrali. Pjatk su tam žony w dwěmaj měša­nymaj mustwomaj za bulom honili, a to z Radworja a Njebjelčic a k tomu hišće někotre hrajerki Serbskeje koparskeje wubranki holcow a žonow. Mustwo w běłych košlach duel 4:3 doby. Sobotu wotmě so turněr ze šěsć wjesnymi koparskimi cyłkami muži. Kóždy hraješe přećiwo kóždemu, a při kónčnym ličenju nasta zajimawa konstelacija. Worklečenjo a Pěskečenjo běchu mjenujcy wšitke swoje štyri hry dobyli, a partija mjez nimi bě so bjez wrotow 0:0 skónčiła. Tak měještej wobě mustwje jenak wjele dypkow, Pěskečenjo pak z 11:0 jedne wrota wjace. W poslednjej hrě dnja bě Filip Kral mjenujcy w poslednich sekundach rozsudne 3:0 přećiwo Wotrowčanam třělił. Třeće městno wobsadźichu Wotrowčenjo, štwórte Róžant, pjate stari knježa ze Serbskich Pazlic a šeste hosćićel.

Hry sudźiłoj staj Detlef Kral z Njebjelčicy a Filip Zimmer z Pančic-Kukowa. Wrotarjej, kotrajž njejstaj w Serbskich Pazlicach žadyn bul do wrotow pušćiłoj, běštaj Frank Měškank (Pěskecy) a Dawid Matik (Worklecy). Kilian Hrjehor

Koparski derby

póndźela, 30. julija 2018 spisane wot:
FC Energija Choćebuz a Budissa Budyšin stej hižo połnje w dypkowym modusu a přihotujetej so na druhi hrajny dźeń koparskeje sezony 2018/2019. Budissa změje šlagrowu hru, a to w Biskopicach pola postupnika. Derby Biskopicy – Budyšin budźe sobotu, 4. awgusta, wot napoł dwěmaj. FC Energija kopa potom njedźelu wot 13 hodź. we Wehen Wiesba­- denje. Jan Hrjehor

Awtor dźensa

Tadej Cyž

Sport (27.07.18)

pjatk, 27. julija 2018 spisane wot:

Start do noweje hrajneje doby

FC Energija Choćebuz, postupnik do třećeje koparskeje ligi Němskeje, a re­gionalny koparski ligist Budissa Budyšin startujetej jutře a njedźelu do hrajneje doby 2018/2019. Budissa wočakuje jutře, sobotu, wot 13.30 hodź. FC Vikto­riju 1889 Berlin a FC Energija Choćebuz njedźelu wot 13 hodź. FC Hansu ­Rostock.

Přihotowanske koparske hry

28.07. 11:00  SJ Chrósćicy –

  Jednota Kamjenc

28.07. 14:00  Rakečanske ST –

  Fortuna Trjebin

28.07. 15:00 Módro-běli Minakał –

  Módro-běli Kulow

29.07. 12:30 SJ Chrósćicy II –

  FSV Bretnig-Hauswalde

29.07. 14:00  FSV Wopaka –

  Sokoł Ralbicy/Hórki

03.08. 18:30  SJ Njebjelčicy –

  ST Großnaundorf

03.08. 19:00  Sokoł Ralbicy/Hórki –

  VfB Hellerau-Klotzsche

04.08. 14:00  SJ Njebjelčicy II –

  Módro-běli Kulow II

Wulki jěchanski turněr

W Bošecach pola Kubšic přewjedu Budyscy jěcharjo na tamnišim jěchanišću wot pjatka hač do njedźele 12. wulki Budyski jěchanski turněr. Nimo skakanja budu so jěcharki a jěcharjo tež w dresurje wubědźować. Pjatk a sobotu započnu so wurisanja rano we wosmich, njedźelu hodźinu pozdźišo.

Sport na wjesnym swjedźenju

nawěšk

nowostki LND