Wjele starterow, tójšto přihladowarjow, rjane wjedro: MC Jawora je zašły kónc tydźenja lětušu motocrossowu sezonu z krajnymi mišterstwami wuspěšnje zakónčiła. Najlěpšich motocrossowych pilotow Sakskeje zwjeselichu předewšěm wuměnjenja na Kaponicy, kotrež runaja so niwowej swětowych mišterstwow. Foto: Jonny Linke

Serbski derby rezerwow

wutora, 13. oktobera 2015 spisane wot:

ST Marijina Hwězda II

– SJ Chrósćicy II 2:1 (0:1) 

Zestawa domjacych: Mattick – Šołta (24. Hawš), Pakoßnick (77. Jurk), Pěčka, Wróbl, Sćapan (30. Bejmak), Jurš, Hübner, Bětnar, Šmit, Korjeńk

Z někotrymi hrajerjemi prěnjeho mustwa­ poradźi so koparskej rezerwje ST Marijineje hwězdy derby přećiwo dru­hemu mustwu SJ Chrósćicy z 2:1 za sebje rozsudźić. W prěnim połčasu pak scyła za tym njewupadaše. W 34. min. bě­chu hosćo z 0:1 wuspěšni, z čimž nichtó tak prawje ličił njebě. Wrotar Mattick bě bul­ wopak wobličił, a Dridiger-Šołta trjechi za Chróšćanow.

Po přestawce skićeše so přihladowarjam cyle hinaši wobraz. Nětko domjacy permanentnje nadběhowachu. W 67. min. móžachu wurunać. Pakoßnick bě Wróbla z rjanym pasom na puć pósłał. Tón přewiny z niskej třělwu wrotarja Wjeselu, kiž njeměješe žanu šansu, bul wotwobarać. Jenož dwě mjeńšinje pozdźišo poradźi so hosćićelej 2:1. Flanka Bětnarja přizemi na chribjeće Chróšćanskeho wrotarja w klětce. T. Nowak

Tež pokalnu hru přěhrali

wutora, 13. oktobera 2015 spisane wot:

SJ Njebjelčicy

– SV Arnsdorf 0:1 (0:1)

Zestawa domjacych: D. Ričel – C. Ričel (39. Hoelzel), Kral, Haška, Hrjehor, Šołta, Hanuza (60. Cyž), Hommel, Dubaw, F. Ričel (60. Čornak), Lejnart

Po šěsć dypkowych partijach slědowaše nětko pokalny koparski bój Njebjelčanskeje SJ na domjacym trawniku. Tež tu pak podleža wona 0:1. Wrota padnychu hižo w 10. min. po trochu kurioznej situaciji a naslědnym njedorozumjenju před klětku Daniela Ričela.

Njebjelčanska trenarska dwójka Panic/Krawčik zasa­dźi wot spočatka někotrych młódšich koparjow. Lěwy škitar Clemens Ričel zrani so při noze, tak zo přińdźe Hoelzel za njeho na trawnik. Hra bě w prěnim połčasu wurunana. Wobě stronje měještej lědma šansy. Wrotar Ričel po poł ho­dźinje wuběrnje zakroči a tak dalšemu zastatkej zadźěwa.

Syriski kopar debitował

wutora, 13. oktobera 2015 spisane wot:

ST Radwor

– ST Hnašecy/Dobruša II 1:1 (1:0)

Zestawa domjacych: Wróbl – Henke, Buša, Hänsel, Šram (62. Omran), von Karwin, Bauer, Nuk, Zähr, Schulze, Mark

Po krótkim wobčuchanju docpěchu domjacy koparjo z Radworja nawjedowanje. Mark bě bul wótrje do šěsnatki přinjesł, hdźež jón Schulzy před noze połoži. Tón trjechi bjez wjetšich problemow 1:0 (18.). Na to startowaše Hänsel sylne solo, jeho třělwa pak jenož łatu šmórny (22.). W 33. min. mějachu nadobo hosćo wulku móžnosć. Buša běše bul při srjedźnej liniji zhubił, přećiwnik spěšnje reagowaše a prěni, derje wuhraty nadběh hosći běžeše na klětku Wróbla, kiž pak bě na městnje. Krótko na to dósta Schulze woprawnjenu jědnatku po foulu. Buša pak bul njepreciznje na wrotarja třěli, a tón hrajny nastroj popadny.

Kopańca ze serbskimi hrajerkami

wutora, 13. oktobera 2015 spisane wot:
Nadja Brězanec (naprawo) z Kopšina hraje nětko w nowowutworjenym žónskim koparski­m mustwje Sportoweho zjednoćenstwa Hnašecy/Dobruša. Minjenu sobotu podleža jeje cyłk Biskopičanskej rezerwje 1:4. Nimo Nadje Brězanec běštej za Hnašecy/Dobrušu hišće dalšej serbskej koparce zasadźenej, Alena Šołćic a Bernadet Brězan­ec. Foto: Jörg Stephan

Doma mjerzacu poražku poćerpjeli

wutora, 13. oktobera 2015 spisane wot:

Sokoł Ralbicy/Hórki II

– Módro-běli Njeswačidło 2:3 (1:3)

Zestawa domjacych: Měškank – M. Matka (59. Bogusz), Kř. Matka, Zynda, Róbl, Rawš (32. Bejmak), Wałda, Šołta, Šmit, Kobalc (73. Šěn), Bejma

Kak je druhe mustwo Sokoła Ralbicy/Hórki hru přěhrało, wone same tak prawje njewě. Z Bosćijom Bejmu, Antoniusom Wałdu, Křesćanom Matku a Křesćanom Bejmakom wupomhachu hnydom štyrjo potencielni koparjo prěnjeho zastupnistwa Sokoła. Zažne nawjedowanje Módro-běłych w 15. min. hosćom jara tyješe. Woni stupichu so hłuboko do swójskeho pola a spytachu přez kontery wuspěch žnjeć. Tale taktika so tež połnje wudani. Po poł hodźinje foulowaše sokołski kapitan Heiko Zynda hóstneho nadběhowarja w šěsnatce, štož wjedźeše k jědnatce. Denis Meier ju wěsće přetwori a hižo steješe 0:2. Sokoł pak dale wojowaše a docpě hnydom na to přez Matku 1:2. Při tym so Tomaš Rawš njezbožownje zrani. Za njeho zaskoči hižo mjenowany Bejmak, kiž postara so wo sylne nadběhi na Njeswačanske wrota. Faktisce z wothwizdanjom pak ležeše bul znowa w Měškankowej klětce, a hosćo dźěchu z wěstym předskokom 1:3 do kabiny.

Hišće dosć chwile hač k europeadźe

wutora, 13. oktobera 2015 spisane wot:

Přihoty na 3. koparske mišterstwa awtochtony­ch narodnych mjeń­šin Europy su dźeń a kon­kretniše. Europeada wotměje so klětu wot 18. do 26. junija pola dobyćerja zašłych mišterstwow w Južnym Tirolu.

Flensburg/Bozen/Budyšin (SN/JaW). Na 3. koparske mišterstwa europskich narodnych mjeńšin Europeada 2016 wo­čakuja cyłkownje 32 mustwow. To zdźělištej wuhotowarjej turněra Fe­deralistiska unija europskich narodnych skupin (FUEN) a Zwjazk južnotirolskich sportowych towarstwow (VSS) w medijowym wozjewjenju. Nimo 24 muskich cyłkow chce so tam klětu tež hač do wosom žónskich mustwow wobdźělić.

Sprawny remis

póndźela, 12. oktobera 2015 spisane wot:

Sokoł Ralbicy/Hórki

– ST Hnašecy/Dobruša 1:1 (0:0)

Zestawa domjacych: Gloxyn – Matka, B. Bjeńš, Schultz, Lulak, S. Bjeńš, Korjeńk (90. Bejmak), Šołta, Nuk (65. Bejma), Kurjat, Domaška

W Ralbicach bě njedźelu sylny přećiwnik z Hnašec/Dobruše z hosćom koparjow Sokoła. Wot wšeho spočatka wuwiwaše so intensiwna hra z bojowniskimi dwubojemi. Wobě stronje pak šansy lědma wuhrawaštej. Najlěpša bě za Sokoł po zmylku hóstneho wrotarja, kiž bul njepopadny. A Domašce falowaše jenički krok, zo by nawjedowanje docpěł. Škit domjacych steješe wěsće, tak zo tež Hnašečenjo žanu prawu składnosć njemějachu, wrota docpěć.

Načolnika třećeje ligi porazyli

póndźela, 12. oktobera 2015 spisane wot:

Budissa Budyšin

– Dynamo Drježdźany 2:0 (1:0)

Zestawa domjacych: Große – Heppner, Patka (80. Hausdorf), Pfanne (46. Hoßmang), Čermák, Fröhlich, Hansch, Rosendo (60. Kral), Hausdorf (70. Kolan), Salweski (46. Reher), Walther (76. Barni­ckel)

Sobotu su koparjo Budissy Budyšin w Humboldtowym haju přećiwo třećemu ligistej testowu hru přewjedli. Dynamo Drježdźany nastupi w sprjewinym měsće z wjacorymi dorostowymi hrajerjemi. 650 ludźi chcyše partiju widźeć. Prěni połčas hry postajowachu domjacy. Wrotar Marek Große měješe mało dźěła, dokelž dźesaćo před nim nimale žane třělwy na Budyske wrota njedowolichu. Nadźěłane šansy na tamnej stronje pak najprjedy tež ničo ličomneho njewunjesechu. Hakle Hansch móžeše jednu móžnosć za 1:0 wužić (38.).

Po přestawce wotměchu so wjacore wuměny na woběmaj stronomaj, štož hrě runjewon njepolěkowaše. Dynamowcy namakachu so nětko lěpje do partije a wro­tar Große měješe wjace dźěła. 1:1, so hosćej přiwšěm njeporadźi. Za to pak postara so Hansch krótko do kónca wo rozsudne 2:0 (86.). Bohužel dyrbješe Patka w kónčnej fazy zranjeny kopanišćo wopušćić.

Marijine hwězdźički w dole sylzow

póndźela, 12. oktobera 2015 spisane wot:

Na papjerje ma třeće zastupnistwo volleyballistkow Marijineje hwězdy pjatnaće hrajerkow k dispoziciji. K dypkowym hram we Wojerecach pak nastupi jenož pjeć. Tamne běchu zamołwjene.

Trójka přitomnych hrajerkow běchu k tomu hišće nowačk­ we wubědźowanju. Wo znajmjeńša kusk nazhonjenja postaraštej so kapitanka Weronika Bartowa a Katarina Kuringowa. Njehladajo hubjeneho wuchadźišća běchu Pančičanske volleyballistki dobreje nalady a stopnjowachu so. Prěnje rozestajenje přećiwo Módro-běłym z Wojerec přěhrachu hišće z 2:25 a 4:25. Přećiwo SC Wojerecam nahromadźichu w prěnjej sadźbje 13 dypkow a w druhej jědnaće. W třećej partiji dnja měrjachu wospjet mocy z Módro-běłymi Wojerowčankami. A nětko wjele lěpje wotrěznychu. Tónraz rěkaštej wuslědkaj 14:25 a 12:25. Podachu drje so bjez dobyća na dompuć, ale z dobrym začućom.

ST Marijina hwězda – OSC Lubij 0:3 (22:25, 17:25, 21:25)

nawěšk

SERBSKE NOWINY podpěruja:

Novi Sad – kulturna stolica Europy

nowostki LND