Nowa hrajna doba je za dorost Viktorije Worklecy kaž mały nowozapočatk, dokelž dyrbjachu so hnydom třo nowi hrajerjo do mustwa integrować. Šulskich a hinašich přičin dla su třo młodźi blidotenisća mjenujcy bičk načasnje nabok połožili. Čim rjeńšo je widźeć, kak hižo nazhonjeni hrajerjo nowačkam pomhaja so w treningu a w hrě dale wukmanjeć.

Prěnjej hrě přećiwo TTV 97 Kamjenc a přećiwo druhemu zastupnistwu SZ Módro-běli Njeswačidło skónčištej so ze sprawnym 7:7. Nazhonjeni zajacy Benjamin Grutka, Jurij Čornak a Jerome Wićaz wudobychu sej kaž wočakowane dypki a zawěsćichu za Viktoriju porjadny start do noweje sezony. Za nowačkow Titusa Kubicu, Laurenca Wićaza a Mariju Rječkec, kotřiž hakle lěto trenuja, rěka w prěnich hrach wosebje wjeselo měć, so wuspytać a toho jednoho abo druheho přećiwnika prosće mjerzać. Dotal so hišće nikomu njeje poradźiło sej dypk za mustwo wudobyć, za to pak su prěnje sadźby za sebje rozsudźić móhli. Tež nazwučowarjo přećiwnikow su to hižo z chwalbu mytowali.

Rakečanske ST II

– SJ Chrósćicy II 2:1 (1:1)

Zestawa hosći: Cyž – Mark, Mohaupt (72. Pjetaš), Wowčer, Šiman, Liznar, Lešawa, Klimant (46. Dehn), Zahrodnik, Dórnik, Šmit (84. Förster)

Po wosom hrach steji rezerwa SJ Chrósćicy přeco hišće bjez dypka na poslednim městnje tabulki wokrjesneje ligi, stafle II. Z Rakečanskej rezerwu mějachu hosćo runohódneho přećiwnika. Jako postupnik pak je to wězo ćešo. Nimo toho zašłe tydźenje pokazachu, zo njeje so přeco hišće prawy system namakał. Z Michałom Wowčerjom, kiž po zranjenju zaso hraješe, běše so tež zaso lěpše sebjewědomje do Chróšćanskeho mustwa wróćiło.

Wuhódnoćenje a dostojne mytowanje prěnich třoch kóždeje starobneje skupiny Wopačanskeho cupa wotmě so minjeny kónc tydźenja. Wšitcy dóstachu pokal, po tradiciji zhotowjeny z wosebiteho kamjenja tudyšeho skałarstwa, wudźěłk hornčerstwa kaž tež wotpowědne wopismo.

Z cyłkownje 15 wubědźowanjow cupa po cyłej Hornjej Łužicy běchu dźesać najlěpšich zaso do kónčneho hódnoćenja zapřijeli. Tele wuměnjenje je dźesać serbskich lubowarjow běhanja tež lětsa spjelniło, a połojca z nich bu tež na doby­ćerskim podesće wuznamjenjena. Na dobyćerskim podesće steješe Leo Čórlich z Budyšina (starobna klasa U 18/13 běhow/294 dypkow) a na bronzowym schodźenku běchu to třo: Richard Paška z Kanec (sk 20/9/277), Silvio Schade z Budyšina (sk 45/9/284) a Jurij Nuk z Budyšina (sk 80/5/144). Corinnu Měrćinkowu z Chelna počesćichu za 3. městno we walkingu z dźesać wubědźowanjemi.

Awtor dźensa

Stefan Šmit

Hišće přeco słyšu tu a tam rozmołwy wo sportowym wjeršku w kopańcy njedawno w Chrósćicach. W třećim kole wo pokal sakskeho koparskeho zwjazka nastupi profijowe mustwo z třećeje najwyšeje ligi w małej serbskej wsy. Wjace hač 700 přiwisnikow přichwata wonu njedźelu do Chróšćanskeho stadiona, byrnjež wjedro runjewon najrjeńše njebyło. A tež hdyž je serbske mustwo na kóncu 0:5 podležało a bjez šansy na dobyće z pokalneho wubědźowanja zlećało, je hra přećiwo profijam tež hišće dwě njedźeli po tym přičina tójšto zajimawych rozmołwow. Z jedneje tajkeje sym prašenje wusłyšał, čehodla njebě kamery w stadionje, kotraž je hru nahrawała a čehodla so žane wobrazy wo hrě w telewiziji njepokazaja. Wotmołwa je cyle jednora. Jeli chce něchtó wurězki hry w telewiziji pokazać, dyrbja so prawa kóždeje jednotliweje hry wot koparskeho zwjazka kupić. Dokelž pak jednaše so wo hru třećeho koła wubědźowanja, kotrejež wuslědk bě měnje abo bóle wotwidźomny, njeje so žana redakcija za to rozsudźiła, prawa kupić.