Turněr na nowym sportnišću
Snadna poražka pola faworita
SV Frankenthal
– ST Marijina hwězda 3:2 (1:1)
Zestawa hosći: O. Schmidt – Wróbl, Škoda, Łušćanski, R. Hawš, Njek, T. Jurš, O. Hawš, P. Schmidt (63. Lipič), Pakoßnick, D. Jurš
Prěnju dypkowu hru w nowej sezonje mějachu koparjo ST Marijineje hwězdy hnydom pola jednoho z faworitow w Frankenthalu. Přećiwnik bě w minjenej hrajnej dobje postup do wokrjesneje wyšeje ligi snadnje misnył.
Hosćo započachu sylnje a dachu bul najprjedy raz wěsće w swojskich rjadach běžeć. Wosebje přez prawy bok a agilneho Wróbla spytachu k wuspěchej dóńć, štož so w 12. min. tež poradźi. Wróbl bě dweju přećiwnikow wottřasł a Dawida Jurša posłužił. Wotrowčan přihra bul na to Pakoßnickej, kiž suwerenje přetwori. Hra wosta wurunana, při čimž mějachu Pančičenjo snano małe lěpšiny. Po poł hodźinje hosćićeljo wurunachu. Hosćo pak njeběchu šokowani a chcychu hišće do přestawki zaso nawjedować. Najprjedy zwrěšći Hawš z třělwu na žerdź, po tym startowaše Jurš solo. Město toho pak, zo by bul wothrał, so wón wopak rozsudźi.
Facit k połčasej olympiskich hrow njespokojacy
Rio de Janeiro. Hišće tydźeń wojuja sportowcy z cyłeho swěta w brazilskim Rio de Janeiru wo olympiske medalje. Rezimej Alfonsa Hörmanna, prezidenta Němskeho olympiskeho sportoweho zwjazka, k dotalnym wukonam němskich atletow njebě runjewon pozitiwny. Hörmann kritizowaše wosebje němskich płuwarjow a tesakowarjow, kotřiž wostachu bjez jeničkeje medalje. Připowědźi tuž konsekwentne reformy w mjenowanymaj sportowymaj zwjazkomaj. Wulku medialnu kedźbnosć žnějachu tež słowa němskeho ekspłuwarja Markusa Deiblera. Wón je jara wobrazliwje a doraznje pobrachowacu pjenježnu podpěru němskich olympionikow kritizował.
Narodne mustwo třělcow porno tomu žněje dale wjele wuspěcha. Hnydom dwójce móžeše so nad złotej medalju wjeselić. Nimo Henrija Junghänela móže so tež Christian Reitz z Lubija na čas žiwjenja olympiski dobyćer mjenować.
Widźał, słyšał, napisał (15.08.16)
Awtorka dźensa
Halena Jancyna
Olympija 2012 – njezapomnite to lěto za fanow beachvolleybala. Prěni raz je tehdy němske mustwo złotu medalju dobyło. Běštaj to Julius Brink a Jonas Reckermann. Wonaj běštaj team z Brazilskeje přewinyłoj. A kak wupada to 2016? Brink a Reckermann njejstaj wjac pódla. Wobaj staj strowotnych přičin dla přestałoj beachvolleyball hrać. Tón abo tamny je Brinka snadź minjeny čas we wšelkich telewizijnych wusyłanjach dožiwił. Reckermann njeje w medijach hižo tak prezentny.
Wuslědki (15.08.16)
Krajna koparska klasa
Zschachwitz – Biskopicy II 3:2 (0:1)
Nowe Město – Radebeul 0:2 (0:1)
Chrósćicy – Horni kraj Sprjewja 1:3 (0:1)
Laubegast – Weixdorf 3:0 (2:0)
1. Laubegast 1 3 : 0 3
2. Horni kraj Sprjewja 1 3 : 1 3
3. Radebeul 1 2 : 0 3
4. Zschachwitz 1 3 : 2 3
5. Drježdźanski SC 0 0 : 0 0
5. Neugersdorf II 0 0 : 0 0
5. Nowosólc Hrodk 0 0 : 0 0
5. Trjebin 0 0 : 0 0
5. Mužakow 0 0 : 0 0
10. Biskopicy II 1 2 : 3 0
11. Chrósćicy 1 1 : 3 0
12. Nowe Město 1 0 : 2 0
13. Weixdorf 1 0 : 3 0
Złoty štwórtk za Němsku
Rio de Janeiro. Na šestym dnju olympiskich hrow je wčera hnydom trójce při dobyćerskej ceremoniji němska hymna zaklinčała. Jako prěni smědźachu ju mužojo němskeje dwójneje štyrki wjesłowanja z hordosću zaspěwać. Cyłk wokoło hłowneho taktowarja Hansa Gruhny zakitowaše ze sylnej moralku titul z Londona. Tež němske wjesłowarki w samsnej klasy dobychu. Před krasnej kulisu laguny Rodrigo de Freitas přesadźichu so wone w fulminantnym kónčnym spurće před mustwomaj z Nižozemskeje a Pólskeje.
Wo cyle njewočakowane olympiske złoto postara so třělča Barbara Engleder. 32lětna Bayerka docpě při třělenju z małym kalibrom w hnydom třoch wšelakorych pozicijach najlěpši wukon a bě tak prěnja němska olympiska dobyćerka třělenja po 28 lětach.
Sport (12.08.16)
Pytaja koparskich sudnikow
Nowy wukubłanski kurs za sudnikow na teritoriju Zapadołužiskeho koparskeho zwjazka (WFV) započnje so 3. septembra w Němskich Pazlicach. Trěbne přizjewjenske formality dóstanjeće wot zamołwitych w sportowych zjednoćenstwach abo na internetnej stronje WFV.
Wotewru nowu sezonu
Zapadołužiski koparski zwjazk (WFV) chce pjatk, 19. awgusta, hrajnu dobu 2016/2017 oficialnje wotewrěć, a to wot 18.30 hodź. w Hušćanskej sportowej hali. Zastup budźe hižo wot 17.45 hodź. móžny. Nimo wuhódnoćenja minjeneje sezony předstaja zamołwići WFV wosebitosće noweje hrajneje doby.
Kónčny spurt za blackbird-run
Njedźelu, 4. septembra, wotměja w Hózku druhi přezpólny běh z mjenom Blackbird-run. Po dwanaće kilometrach natwarja tam do toho 15 wosebitych zadźěwkow. Přizjewjenja njejsu hižo móžne. Startowy pjenjez wučinja 20 eurow. Na dnju wubědźowanja smědźa so běharki a běharjo wot 11 hodź. registrować dać. Běh přez zadźěwki započnje so w 14 hodź. Na předwječoru swjeća w Hózku tak mjenowanu prerun-party. Dalše informacije pod www.facebook.com/blackbirdrunhoske abo http://hoske.net
Wjesłowarjo złoto zdobyli
Gries hosćom wupomhał
SV Wesenitztal
– SJ Chrósćicy 2:2 (1:1)
Zestawa hosći: Matješk – Bětnar, Sentivan, Šafář, Gries, Młynk (69. Dehn), Zahrodnik, Runt, Šmit, Žur, Věchet
Hižo w 11 hodź. su koparsku hru we Wesenitztalu při přijomnych temperaturach a rjanym wjedrje zahwizdali. Tamniše prěnje mustwo hraje hižo někotre lěta w krajnej klasy, nic pak kaž nowačk z Chrósćic we wuchodnej stafli, ale w srjedźnej. Wone tež impulsiwnje započa, Chróšćenjo pak dołho njetrjebachu, zo bychu so na to nastajili. Po 20 mjeńšinach dósta Věchet wot defensiwy přećiwnika darik w formje špatneje přihrawki, kotruž k 1:0 přetwori. Hišće do přestawki Wesenitztal wuruna.
Test přěhrali
HZ Hórnikecy – SJ Njebjelčicy 2:1 (0:0)
Za hosći zasadźeni: Wićaz – Pawlik, Reinecke, Hübenthal (G. Čornak), Haška, Šołta, Janca, Kubaš, Hrjehor, Ričel, Šram.
Swój posledni test do spočatka hrajneje doby 2016/2017 wotměchu koparjo Njebjelčanskeje SJ we Wulkich Ždźarach. Trenarjej Panic a Krawčik žadaštaj sej koncentrowane a koordinowane wustupowanje swojich chowancow. W prěnim połčasu je škit wokoło Reinecki derje a měrnje hru natwarjał. Tak dóńdźe k móžnosćam přez Hrjehorja a Ričela, wšitke pak wostachu bjez wrotow. Přećiwnik so hrě Njebjelčanow podrjadowaše a zamó jenož někotre akcenty přez boki sadźeć. Hakle po přestawce wuwi so bojowniski charakter hry, cyłkowny porjadk hosći pak woteběraše. To je defensiwny hrajer přećiwnika z wušiknym solom přez centrum hnydom dwójce wužił a hru na kóncu tež rozsudźił. Tež hdyž so Hrjehorjej po róžku nachwilne wurunanje poradźi, Njebjelčenjo 1:2 přěhrachu. Wot přichodneho tydźenja wojuja potom zaso wo dypki. Jurij Haška
