Policija (20.03.19)

srjeda, 20. měrca 2019 spisane wot:

Z pokradnjenej kokošu zahinył

Weigsdorf-Köblitz. Wodźer Hyundaija je zawčerawšim rano we Weigsdorfje-Köblitzu w Kumwałdskej gmejnje ze swojim awtom do wjelka zajěł. Štyrinohaty rubježnik bě krótko do toho kokoš po­padnył a měješe ju hišće w klamje, jako awto na Hłownej dróze přijědźe a hižo borzdźić njemóžeše. Wjelk při zražce zahi­ny. Popadnjenej kokoši tohorunja hižo­ pomhać njemóžachu. Na awće nasta 2 500 eurow škody.

Policija (19.03.19)

wutora, 19. měrca 2019 spisane wot:

Třěšny kófer so wočinił

Wóspork. Njeplanowany mjezystop na swojej domojězbje do směra na Drježdźany dyrbješe 61lětny wodźer wosoboweho awta typa Subaru minjenu sobotu rano na awtodróze A 4 pola Wósporka zapołožić. Najskerje njebě wón wěko swojeho třěšneho kófra prawje začinił, přetož wokoło sedmich so wone wosrjedź jězby wočini a wšón wobsah kófra spada na awtodróhu. Na zbožo so při tym žane wobchadne njezbožo njesta. Awtodró­howa policija jězdnju na to zawrě, tak zo móžachu­ rozbrojene wěcy zezběrać. Za poł hodźiny běchu stróžele přetrate, a muž móžeše dale jěć.

Policija (18.03.19)

póndźela, 18. měrca 2019 spisane wot:

Třo zranjeni po njezbožu

Njebjelčicy. Najskerje bě sylny wichor wina na wobchadnym njezbožu minjeny pjatk něhdźe w 22.30 hodź. na statnej dróze S 94 mjez Miłočanskej a Njebjelčanskej wotbóčku. 41lětny wodźer Passata zajědźe tam na prawy bok jězdnje a suny so po skłoninje do štoma. Wón kaž tež dźěsći w starobje třoch a sydom lět stej so snadnje zraniłoj.

Policija (15.03.19)

pjatk, 15. měrca 2019 spisane wot:

Ćeknjenje zwrěšćiło

Běła Woda. Jako zastojnicy zawčerawšim připołdnju młodeho muža w Běłej Wodźe kontrolowachu, namakachu pola njeho titku, w kotrejž bě najskerje konop. 14lětny dyrbješe ju policistam přepodać, ale so wobaraše a so jim wutorhny, byrnjež woni popjerjowy spray zasadźili. Bórze na to pak zastojnicy młodostneho tola dosahnychu.

Policija (14.03.19)

štwórtk, 14. měrca 2019 spisane wot:

Paduchaj w kupnicy

Pančicy-Kukow. Mužej w starobje 36 a 37 lět składźeštaj sej zawčerawšim připołdnju w Pančičansko-Kukowskej kupnicy wšelake twory do toboły a chcyštaj wobchod bjez płaćenja wopušćić. Kedźbliwy swědk to wobkedźbowaše a jeju zadźerža. Georgičanomaj pak so poradźi twochnyć a do Peugeota z pólskim čisłom zalězć. Runje w tym wokomiku přijědźechu mjeztym alarmowani policisća a podhladneju nachwilnje zajachu. W jeju awće namakachu dalšu rubiznu, mjez druhim palenc a słódčizny. Nětko dyrbja zwěsćić, z kotrych padustwow wěcy pochadźeja a hač staj podhladnaj dalše delikty­ skućiłoj.

Policija (13.03.19)

srjeda, 13. měrca 2019 spisane wot:

Tójšto rubizny namakali

Mały Wjelkow. W nadawku Zhorjelskeho statneho rěčnistwa je policija zawčerawšim w Małym Wjelkowje ležownosć při Hłownej dróze kaž tež tamniše twarjenja přepytała. Pozadk bě aktualny pad wšelakich wobsydstwowych deliktow dla. Přepytowanje měri so přećiwo pjeć podhladnym w starobje 18 do 30 lět. Štyrjo­ mužojo a jedna žona pochadźeja z regiona a bydla blisko Budyšina. Přepytujo ležownosć namakachu zastojnicy najwšelakorišu rubiznu, mjez druhim VW Golf, wosom mopedow kaž tež dalše rozebrane mopedy. Dale zwěsćichu drogi a utensilije za jich wužiwanje. Sobudźěłaćerjow kriminalneje słužby Budyskeho policajskeho rewěra podpěrachu na drogi specializowany pos, wjacore wobsadki policajskich awtow kaž tež kriminalni technikarjo.

670 eurow za wočinjenje duri

Policija (12.03.19)

wutora, 12. měrca 2019 spisane wot:

Štó je něšto wobkedźbował?

Radwor. Hladajo na njelubozny podawk, kiž je so popjelnu srjedu krótko po 10 hodź. na Radworskej nawsy stał, pyta policija swědkow. Tam je dotal njeznaty muž nakładne awto wobškodźił. Šofer Mitsubishija ze swojeho awta wuskoči a spěchaše k Lkw-jej, kiž runje na dwór hosćenca „Meja“ wróćo storkaše. Wón wodźerja nakładneho awta narjeji a bi­ješe tak do wokna jeho kabiny kaž tež do wonkowneho­ špihela, zo jězdźidło wobškodźi. Po informacijach policije bě w tym wokomiku slěbrobarbny Škoda Octavia z Budyskim čisłom před Lkw-jom. Jeho šofera a sobujěducych kaž tež móžnych dalšich wobkedźbowarjow policija prosy so jako swědcy přizjewić, a to pod telefonowym čisłom 03591/ 35 60.

Připowěšak so zesamostatnił

Policija (11.03.19)

póndźela, 11. měrca 2019 spisane wot:

Do štoma zajěł a so zhubił

Mučow. Z njewšědnym wobchadnym njezbožom dyrbješe so policija w nocy na njedźelu na zwjazkowej dróze B 96 mjez Mučowom a Wulkimi Ždźarami zaběrać. Tam bě Opel po wšěm zdaću do wjacorych štomow zrazył. Jako chcychu prěni swědcy pomhać, pak bě so šofer hižo zminył. Alarmowani wohnjowi wobornicy w bliskim lěsu z ćopłotnej kameru po­darmo za nim pytachu. Na to zasadźichu policajskeho psa, kotryž je slědy šofera něhdźe kilometer přez lěs hač do Mu­čowa wučuchał. Tam so slědy zhubichu. Čehodla bě so šofer z městna njezboža zhubił, hač bě wón sam w awće a hač je wón zranjeny, njeje dotal znate. Zwjazkowa dróha bě tři hodźiny zawrjena.

Policija (08.03.19)

pjatk, 08. měrca 2019 spisane wot:

Paduši w garaži byli

Wětrow. Njelubu překwapjenku dožiwi wobsedźer garaže wčera dopołdnja we Wětrowje. Tam dyrbješe zwěsćić, zo bě so něchtó do njeje zadobył. Skućićeljo pokradnychu wšitke štyri lětnje wobruče kaž tež wozydłowy zběhak. Rubizna bě cyłkownje 1 300 eurow hódna. Nimo toho načinichu paduši 200 eurow wěcneje škody.

Pokutu tola hišće zapłaćił

Kamjenc. Najskerje je zawčerawšim wječor 27lětneho w Kamjencu swědomje hrjebało. Wón wědźeše, zo na njeho wulke wušparanja čakaja, hdyž nabrěmjenjenu pokutu 300 eurow njezapłaći. Zo by wjacednjowskemu přebytkej w jastwje zadźěwał, so wón na policajskim rewěrje přizjewi a wotewrjenu zličbowanku radšo zapłaći. Naležnosć je za njeho tuž nětko wotbyta.

Policija (07.03.19)

štwórtk, 07. měrca 2019 spisane wot:

Drohe awto zaso maja

Zhorjelc. Nimale 70 000 eurow drohi BMW-kabrio je policija zawčerawšim popołdnju w Kodersdorfje pola Zhorjelca zadźeržała. Jeho 24lětneho wodźerja nachwilnje zajachu. Mjeztym je wón w přepytowanskej jatbje. Wulce motorizowany BMW M 4 je policistam na awtodróze A 4 napadnył, dokelž běštej přičinjenej čisle wot hinašeho awta. Jako chcychu ćmowe jězdźidło pola Budyšina zadźeržeć, stupi šofer na płun. Wón smaleše do směra na Zhorjelc, policisća za nim. Helikopter z powětra akciju přewodźeše. W Kodersdorfje 24lětny A 4 wopušći. We wsy BMW wuhladachu a šofera zajachu. Wón bě jězdźidło w nocy do toho w Badensko-Württembergskej pokradnył. Awto fungowaše bjez kluča. Skućićel bě po wšěm zdaću w běhu sekundow z techniskej pomocu­ škričkowy signal wotpopadnył, awto wočinił a z nim wotjěł.

nawěšk

nowostki LND