Policija (03.09.15)

štwórtk, 03. septembera 2015 spisane wot:

Połčnica. Na awtodróze A 4 pola Połčnicy je policija zawčerawšim wopiteho ­wodźerja nakładneho awta lepiła. 56lětny bě z małym transporterom do Wul­keje Britaniskeje po puću. Jako jeho zastojnicy něhdźe w 11.30 hodź. zadźeržachu, pytnychu hižo jeho „chorhojčku“. Test z alkomatom wunjese pola muža 2,2 promilej alkohola w kreji, na čož jemu dalšu jězbu zakazachu. Na to bu muž namócny­ a nadawaše zastojnikam najwšelakoriše wudma. Pomhało pak to njeje,­ přetož policisća­ jemu awtowe papjery a kluč wotewzachu. Před sudnistwom njezměje so šofer nětko jenož wopiłstwa w nadróžnym wobchadźe dla ­zamołwić, ale tež spřećiwjenja přećiwo policajskim zastojnikam dla. So wě, zo njebě pólska spedicija wo pjanosći swo­jeho přistajeneho runjewon zwjeselena. Firma pak ­spěšnje reagowaše a pósła dweju šoferow, kotrajž transporter na městnje přewzaštaj. Tak móžachu nakładowane twory­ tola hišće sčasom do Wulkeje Brita­niskeje dowjezć.

Policija (02.09.15)

srjeda, 02. septembera 2015 spisane wot:

Budyšin. Wohnjowych wobornikow Budyšina wołachu wčera připołdnju k wuchowanju wosebiteho razu. Wobydlerjo zdźělichu, zo běchu w zahrodnišću „Stare Třělany“ krokodila abo podobny reptil na pućiku widźeli. Wobornicy sej skoćo bliže wobhladachu a móžachu spěšnje wotkiwnyć. Jednaše so jeničce wo naduty gumijowy krokodil. Tón pak bě po wšěm zdaću tak derje napodobnjeny, zo so ludźo wustróžichu.

Policija (01.09.15)

wutora, 01. septembera 2015 spisane wot:

Kulow. Dohromady štyri kolesa zhubichu so minjeny kónc tydźenja w Kulowje a w Niskej. Při tym njetrjebachu paduši ani žane wulke zadźěwki přewinyć. Groćane haple w cyłkownej hódnoće 7 000 eurow stejachu na třěšnym resp. na zadnim nošaku na awtomaj. Kaž policija zdźěla, to wězo žane wěste městno za koleso njeje. Wšako jednore zamki za paduchow žadyn wulki problem njewoznamjenjeja. Je tuž lěpje při dlěšich přestawkach abo přez nóc koleso z awta wzać a je porjadnje zamknyć.

Policija (31.08.15)

póndźela, 31. awgusta 2015 spisane wot:

Wallroda. Mjez Biskopicami a Radebergom je po wšěm zdaću zapaler po puću. W prěnich hodźinach soboty su wohnjowych wobornikow na łuku mjez Wall­rodu a Kleinröhrsdorfom wołali. Tam paleše­ so něhdźe sto wulkich kulojtych walčkow słomy. Na zbožo so nichtó nje­zrani, tež twarjenja žane potrjechene njeběchu.­ Štyri wohnjowe wobory wokolnych wsow běchu zasadźene. Wo­bornicy mějachu hač do 9 hodź. z hašenjom ruce połnej dźěła. Hižo srjedu wječor bě so minjeny tydźeń wulki skład słomy mjez Großröhrsdorfom a Połčnicu wotpalił.

Policija (28.08.15)

pjatk, 28. awgusta 2015 spisane wot:

Kamjenc. Tragiske njezbožo při kupanju je so zawčerawšim popołdnju w skale pola Steiny blisko Kamjenca stało. Kupacej so žonje w starobje 49 a 55 lět pytnyštej, zo bě so jeju 58lětny přewodźer pod­nu­rił. Młodostnaj w starobje 19 a 20 lět na to­ za mužom nurještaj, wućahnyštaj jeho z wody a zawołaštaj wuchowanskich pomocnikow. 58lětny muž z Drježdźan bě wědomje zhubił, tak zo dowjezechu jeho z helikopterom do chorownje. Tam wón samsny wječor zemrě. Policija nětko za přičinami njezboža slědźi.

Policija (27.08.15)

štwórtk, 27. awgusta 2015 spisane wot:

Budyšin. Wokomik njekedźbnosće je njeznaty muž w Budyšinje wužił a drohotnej časnikaj pokradnył. W juwelěrowym wobchodźe na Serbskich hrjebjach běchu durje wočinjene, w předawanskej rumnosći pak ani předawar ani kupcy njeběchu. Muž sahny za keramikowymaj časnikomaj w cyłkownej hódnoće 5 600 eurow a ćekny. Samsny wokomik mějićel ze zadnjeje rumnosće do wobchoda stupi, wuhlada paducha a spěchaše za nim hač na Garbarsku. Tam zalěze njeznaty do ćmoweho wosoboweho awta z Hamburgskim čisłom a so zhubi. Najskerje jedna so wo VW Golf Variant. Za nim policija­ nětko slědźi a prosy tež woby­dlerjow wo pomoc­, hač su něšto wobkedźbowali.

Policija (26.08.15)

srjeda, 26. awgusta 2015 spisane wot:

Němcy. Runje před Němčanskej wohnjowobornej gratownju je so zawčerawšim nakładne awto wupaliło. Šofer a sobujěducy chcyštaj tam blida a ławki wotkładować, jako krótko do toho smjerd čuje­štaj. Přiwšěm hišće ke gratowni dojědźeštaj, hdźež so awto palić započa. Dźěl blidow a ławkow hišće wuchowachu. Jedna­ wosoba so zrani.

Policija (25.08.15)

wutora, 25. awgusta 2015 spisane wot:

Horni Wujězd. Wobsadka policajskeho jězdźidła je wčera dopołdnja na awtodróze A 4 pola Hornjeho Wujězda 30lětnemu mužej wobradźiła kónc dowoloweje jězby a wopyt w awtowej zamkarni. Jeho Audi S 6 ležeše jara hłuboko na jězdni a bě po wšěm zdaću přetwarjeny, štož zastojnikow wězo zajimowaše. Při kontroli so wukopa, zo bě Audi hłubšo połoženy, wotpowědne wopismo pak młody muž předpołožić njemóžeše. Nimo toho jědźeše awto z kolesami, kotrež za S 6 scyła dowolene jejsu. Wobruče so zdźěla samo karoserije dótkachu, kaž policija zdźěli. Tuž bě jězba 30lětneho najprjedy raz nimo­. Přiwołany zamkarski fachowc zastopnjowaše awto jako za wobchad njewěste, tak zo njesmě so z nim hižo dale­ jězdźić. Wobsedźer dyrbi je nětko normje wotpowědnje přetwarić dać a na to fachowcej znowa předstajić. Hakle potom móže so ze swojim Audijom zaso na puć zwěrić.

Policija (24.08.15)

póndźela, 24. awgusta 2015 spisane wot:

Pančicy-Kukow. Na statnej dróze S 94 je so­ sobotu nawječor blisko Krěpjec ži­wjenje młodeho muža tragisce skónčiło. 19lětny bě ze swojim motorskim ­do směra na Pančicy-Kukow po puću, ­jako z dotal njeznateje přičiny kontrolu nad mašinu zhubi a do napřećo přijě­duceho wosoboweho awta typa VW zrazy. Zražka bě tak ćežka, zo młodostny hišće­ na městnje njezboža zemrě. Wobdźěłanja njezboža a rumowanja dla bě S 94 štyri hodźiny zawrjena. To bě to­horunja za wohnjowych wobornikow z Pančic-Kukowa ćežki čas, kotřiž běchu sobu jako prěni na městnje a młodeho muža zdźěla znajachu. Wosebje tragiske je, zo bě znjezboženy nazhonity motocrossowy jězdźer, kiž je w rjadach Jaworskeho motocrossoweho kluba trenował. W motorsportowym towarstwje móža lědma zapřimnyć, zo je k tajkemu tra­giskemu njezbožu dóńć móhło.

Policija (21.08.15)

pjatk, 21. awgusta 2015 spisane wot:

Ramnow. Mjez Biskopicami a Ramnowom je so dźensa rano šofer při njezbožu na B 98 ćežko zranił. Z chorobnym awtom jeho do bliskeje chorownje dowjezechu. Kaž policija zdźěli, je wodźer Renaulta w dołhej lěwej křiwicy z jězdnje zjěł a so přećisny. 25 wohnjowych wobornikow z Biskopic, Geißmannsdorfa a Ramnowa městnosć njezboža zawěsći a kontrolowaše, hač je z awta škódna kapalina wuběžała. Kaž šofer praji, dyrbješe so lišce wuwinyć, při čimž kontrolu nad Renaultom zhubi.

Malešecy. W zašłych tydźenjach su nje­znaći w Malešanskej a Wulkodubrawskej gmejnje w jednoswójbnych domach kradnyli. Při tym podachu so cuze wosoby na wšelake ležownosće a wužichu wobstejnosć, zo njemějachu wobydlerjo domu chěžne durje zamknjene. Paduši swoje jězdźidła z cuzymi znamješkami blisko městna njeskutka wotstajichu. Tak bě to 29. julija, jako pakosćerjo w Malešanskim wjesnym dźělu Brězynje 65lětnemu z domu móšeń pokradnychu. Tole činjachu tohorunja w Dubrawce. Policija namołwja susodow sobu stražować a „za prawym hladać“.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND