Policija (01.10.19)

wutora, 01. oktobera 2019 spisane wot:

Darmotnje tankować chcył

Słona Boršć. Dosć wysoke płaćizny bencina chcyše zawčerawšim muž na awtodróhowym wotpočnišću pola Słoneje Boršće wobeńć a darmotnje tankować. Tónle pospyt pak na zbožo zwrěšći. Wodźer Citroëna drje swoje awto najprjedy za 60 eurow natankowa a z nim bjez płaćenja tež do směra na Zhorjelc wotjědźe. Alarmowani zastojnicy awtodróhoweje policije pak jeho na jednym z parkowanišćow zadźeržachu. 24lětny pólski staćan steješe pod wliwom drogow. Dalšu jězbu jemu policisća wězo zakazachu. Za swój njeskutk wšak změje so młody muž nětko na sudnistwje zamołwić.

Policija (30.09.19)

póndźela, 30. septembera 2019 spisane wot:

Přesćehnjenje sćěhi měło

Lěskej. Zranjenaj šoferaj běštaj wčera dopołdnja wuslědk njewuspěšneho přesćehnjenja na zwjazkowej dróze B 156 pola Lěskeje. 58lětny chcyše před nim jěduce jězdźidło přesćahnyć, njeje pak wobkedźbował, zo jeho hižo dalši 50lětny wodźer awta přesćehnje. Wobaj zajědźeštaj do přirowa a so zraništaj.

Policija (27.09.19)

pjatk, 27. septembera 2019 spisane wot:

Pódlanske twarjenje so paliło

Budyšin. Na kromje Budyskeje Stieberoweje a Dr. Jordanoweje je so wčera wječor pódlanske twarjenje bydlenskeho domu paliło. Kaž policija zdźěli, bu woheń po wšěm zdaću zamiškrjeny. Šěsć wobydlerjow dyrbjachu ewakuować. Woni a třo přiwołani policisća dyrbjachu na přepytowanje do chorownje, dokelž wobsteješe strach zajědojćenja kura dla. Wohnjowi wobornicy płomjenja zhašachu, wěcna škoda wučinja něhdźe 5 000 eurow.

Wulku sumu pjenjez pokradnyli

Malešecy. W nocy na srjedu su paduši w Malešecach z běrowa bydlenskeho domu při Lubijskej wodźe 3 500 eurow, bankowu kartu a kožanu tobołu z dokumentami spakosćili.

Policija (26.09.19)

štwórtk, 26. septembera 2019 spisane wot:

Wobaj paduchaj twochnyłoj

Zabrod. Štož su zastojnicy zwjazkoweje policije a cła wčera po połnocy w Zabrodźe dožiwili, móhło z krimija być. Hłownu rólu hrajachu awće a jeju šoferaj. Jako zastojnicy na Starej wjesnej dróze 29lětneho wodźerja Forda zadźeržachu a jeho dokumenty přepruwowachu, přijědźe transporter k tomu. Jako chcychu tež jeho šofera kontrolować, stupi tón na płun a ćekny. Byrnjež policija transporter nimale dosćahnyła, tón nadobo zasta, wodźer z njeho skoči a so w lěsu zhubi. Krótko po tym so tež šofer Forda policiji wuwiny a do lěsa twochny. Přepytujo wopušćenej awće ta wuslědźi, zo běštej wobě pokradnjenej.

Policija (25.09.19)

srjeda, 25. septembera 2019 spisane wot:

Ćežke wobchadne njezbožo

Haselbachtal. Na wokrjesnej dróze mjez Häslichom a Neukirchom, w Haselbachtalu, je póndźelu nawječor wodźer Opela Mokka w prawej křiwicy kontrolu nad wodźidłom zhubił a do štoma zrazył. 63lětny šofer bu w awće zatłusnjeny. Kameradojo dobrowólnych wohnjowych woborow z Häslicha, Neukircha a Sepic su sanitetetarjam a policistam pomhali ćežko zranjeneho wuchować, kotrehož z helikopterom do kliniki dowjezechu. Při njezbožu nastata wěcna škoda wučinja něhdźe na 25 000 eurow.

Čakaceho přebił

Wojerecy. Při Wojerowskim busowym zastanišću, na Łužiskim naměsće, je 30lětny njeznaty póndźelu popołdnju 35lětneho tam čakaceho přebił a ćeknył. Zawołani wuchowanscy sanitetarjo su so wo zra­njeneho, kiž na zemi ležeše, starali.

Policija (24.09.19)

wutora, 24. septembera 2019 spisane wot:

Manipulowane bankomaty

Budyšin/Zhorjelc. We wosom padach su njeznaći w Budyskim a Zhorjelskim wokrjesu­ bankomaty manipulowali, zo móhli­ ludźom pjenjezy rubić. Policija tuž před wobšudnikami warnuje a pyta swědkow. Njeznaći instalowachu na awtomatach připrawy, kotrež su wupłaćenju pjenjez zadźěwali. Awtomat drje je sumu wupłaćił, jeho wužiwarjo pak bankowki ženje widźeli njejsu, dokelž buchu dru­hdźe wotkładowane, hdźež móžachu sej je skućićeljo pozdźišo wotewzać. Štóž je něšto podhladneho w tym zwisku wobkedźbował, njech to policiji přizjewi.

Policija (23.09.19)

póndźela, 23. septembera 2019 spisane wot:

Dźěl rubizny stejo wostali

Bjezdowy. Njeznaći su w nocy na sobotu w twarskim zawodźe gmejny Halštrowska Hola wjacore drohe zahrodniske nastroje kaž tež jedyn traktor-trawusyčak pokradnyli. Nimo toho wobškodźichu wjacore jězdźidła gmejny. Wšitko sobu wzać pak so jim njeporadźi. Při wottransporće dalšeho traktora-trawusyčaka z pomocu gmejnskeho Multicarja wostachu z nim w dźiwiznowym płoće wisajo a na to tež hišće na čerstwje woranej roli tčacy, tak zo dyrbjachu dźěl rubizny stejo wostajić. Policija trochuje hódnotu rubizny na něhdźe 2 000 eurow.

Pod wliwom drogow po puću był

Kamjenc. Zastojnicy su njedźelu rano w Kamjencu zwěsćili, zo bě 21lětny šofer VWja drogi brał, a přikazachu test kreje. Šofer ma nětko z wysokej pokutu ličić.

Policija (20.09.19)

pjatk, 20. septembera 2019 spisane wot:

Ćežko zranjenej wosobje

Njebjelčicy. Při zražce wosoboweju awtow wčera popołdnju krótko po štyrjoch na S 94 pola Njebjelčic buštej dwě wosobje ćežko zranjenej. Policija dyrbješe dróhu dospołnje zaraćić.

Policija (19.09.19)

štwórtk, 19. septembera 2019 spisane wot:

Pozitiwne: Jenož štyri přeńdźenja

Zdźěr. Slědowacu powěsć policije móhli tež pod rubriku tež tole dawa wozjewić. Zastojnicy su póndźelu dopołdnja w Zdźěri spěšnosć awtow kontrolowali a chětro pozitiwny wuslědk dóstali. Z cyłkownje 1 425 kontrolowanych jězdźi­dłow w štyri a poł hodźinje, běchu jeničce štyri spěšniše hač dowolene 50 km/h.

Policija (18.09.19)

srjeda, 18. septembera 2019 spisane wot:

45lětny konop plahował

Hlina. Zastojnicy kriminalneje policije běchu minjeny kónc tydźenja w Hlinje (Gleina) pola Malešec konopjowu plantažu našli a ju znješkódnichu. Wobydler policiji anonymnje zdźěli, zo bě 45lětneho Dana­ při plahowanju w rostlinarni wobkedźbował. Při pytanju za drogami zasadźichu tež na to specializowane psy. Wone 24 rostlin wučušlichu.

Kóčce čwělnje zahinyłoj

Drječin. Hižo před něšto časom su nje­znaći w Drječinje (Dretschen) kóčce zajědojćili. Štyrinohačej grawoćiwje zahiny­štej. Skótny lěkar čwělowanje wobkrući, njemóže pak rjec, kotry jěd stej žrałoj. Zo njeby k tomu dóšło, chce policija dračowarja na kóždy pad wuslědźić.

Serbska debata

nowostki LND