Policija (24.05.19)

pjatk, 24. meje 2019 spisane wot:
Niska. Na křižowanišću Mužakowska dróha Pestalozzijowa w Niskej je wčera k ćežkemu njezbožu dóšło. Po informacijach swědkow bě motorske z wulkej spěšnosću na lěwej jězdni dlěšu kolonu wosobowych awtow přesćahnyło. Jako chcyše prědku Renault nalěwo wotbočić, prasny motorske do njeho. Wulkeje mocy,­ nastateje při zražce dla, zleća wodźer motorskeho ze swojeje mašiny. Přiwołani sa­nitetarjo a nuzowy lěkar so wo znjezboženeho starachu a dowjezechu jeho do bliskeje chorownje. Dokelž je policija městnosć njezboža zaraćiła, dóńdźe tam wěsty čas k wobmjezowanjam wobchada.

Policija (23.05.19)

štwórtk, 23. meje 2019 spisane wot:

Dwě njezboži na jednym městnje

Budyšin. Policija dyrbješe wutoru awtodróhu mjez wotjězdomaj Budyšin-wuchod a Wóspork dlěje zašlahać. Tam bě so BMW na mokrej jězdni suwał, do betonoweho wobłoženja prasnył a wo­srjedź jězdnje stejo wostał. 40lětny šofer so při tym zrani. Njezboža dla so wobchad kopješe, a tak dóńdźe k dalšemu njezbožu. 27lětny wodźer Renaulta bě rynk čakacych awtow přepozdźe widźał, zrazy do nakładneho awta a so zatłusny. Wohnjowa wobora dyrbješe jeho z jězdźidła wuswobodźić. Z helikopterom dowjezechu muža do chorownje. Techniski pomocny skutk je městnosć nje­zboža sobu zawěsćił.

Policija (22.05.19)

srjeda, 22. meje 2019 spisane wot:

Motorskeho přewidźał

Janecy. Jako chcyše so wodźer Suzukija wčera popołdnju za Haslowom do směra na Słonu Boršć zawróćić, přewidźa wón z pódlanskeje dróhi přijěduceho motorskeho. Tón njezamó hižo spinać, zajědźe do zadnjeho kolesa awta a padny. Jeho dyrbjachu do chorownje dowjezć.

Wólbne plakaty pomórane

Kulow. Na Dwórnišćowej dróze w Kulowje je swědk w nocy na wutoru podhladnej maskěrowanej wosobje wobkedźbował a policiju zawołał. Zastojnicy drje nikoho wot njeho wopisowaneho njewuhladachu, za to pak wosom pomóranych wólbnych plakatow. Pozdatnaj wuměłcaj běštaj z čornej barbu wšelake napisy popryskałoj a na to ćeknyłoj.

Policija (21.05.19)

wutora, 21. meje 2019 spisane wot:

Peugeot so wupalił

Budyšin. W Budyskej Strowotnej studni je so wčera něhdźe w 23 hodź. awto paliło. Na parkowanišću blisko kupnicy steješe Peugeot z dotal njeznatych přičin w płomjenjach. Najebać spěšne hašenje měšćanskeje wohnjoweje wobory so awto dospołnje wupali.

Žona w awće zatłusnjena

Kamjenej. Na B 96 je wčera popołdnju wodźer VWja T-Roca w Kamjenej pola Rakec blisko wotbóčki K měznikej do napřećo přijěduceho nakładneho awta zajěł. Při tym zatłusny so we wosobowym awće sobujěduca, kotruž móžachu hakle wohnjowi wobornicy wuswobodźić. Žonu su z helikopterom do chorownje dowjezli. Šofer awta so lochko zrani, wodźer Lkw-ja wosta njezranjeny.

Ćežko zranjenaj

Chróstawa. 22lětny šofer Audija zrazy wčera připołdnju pola Chróstawy frontalnje do napřećo přijěduceho Citroëna 74lětneho. Wobaj so tak ćežko zraništaj, zo dyrbjachu jeju wuchowanske mocy do chorownje dowjezć. Sobujěduca Citroëna so lochko zrani.

Policija (20.05.19)

póndźela, 20. meje 2019 spisane wot:

Pjeć ćežko zranjenych

Fischbach. Sobotu wo połnocy bě 29lětny wodźer VW Pasasta na zwjazkowej dróze B 6 z Biskopic do Fisch­bacha po puću. Za Großharthauwom zajědźe wón z dotal njeznateje přičiny na hórce naraz na lěwu stronu jězdnje a zrazy do jemu napřećopřijěduceho Audija A 6. Jeho 40lětny šofer, 40lětna sobujěduca a dwě dźěsći w starobje dweju a dźewjeć lět so při tym ćežko zranichu. Wšitkich na nje­zbožu wobdźělenych, tež zawinowarja, dowjezechu do bliskich chorownjow.

Policija (17.05.19)

pjatk, 17. meje 2019 spisane wot:

Do wobchoda so zadobyli

Židźino. W nocy na srjedu su so njeznaći do wobchoda za twaršćizny w Židźinom (Seidewinkel) zadobyli. Tam přepytachu wšitke běrowy, spakosćichu pjenježnu kasetu z něhdźe 2 200 eurami a načinichu wěcnu škodu něhdźe tysac eurow.

Wobruč prasnyła

Wóspork. Z dotal njeznateje přičiny je srjedu na awtodróze A 4 mjez Budyšinom a Wósporkom wobruč Lkw-ja prasnyła. Šofer móžeše runje tak na kromje jězdnje zastać. Zranił so nichtó njeje.

Policija (16.05.19)

štwórtk, 16. meje 2019 spisane wot:

Cigarety kradnyli

Rakecy. Zadobywarjo su w nocy na wu­toru w Rakečanskim nakupowanišću na Dwórnišćowej­ 70 cigaretowych tyzkow w hódnoće 450 eurow pokradnyli.

Pjany z kolesom jěł

Wjazońca. Patrulja Budyskeho policajskeho rewěra je wutoru wječor we Wjazońcy 38lětneho kolesowarja kontrolowała, a tón měješe 3,26 promilow alkohola w kreji. Na muža, kotremuž dalejězbu zakazachu, čaka nětko chłostanje.

Policija (15.05.19)

srjeda, 15. meje 2019 spisane wot:

Paduch so chětro wobarał

Wojerecy. We Wojerowskim nakupowanišću blisko Kamjenskeho wobłuka je přistajeny póndźelu wječor paducha lepił. Jako jeho při kasy narěča, spyta pakostnik ćeknyć. Tež druzy jeho zadźeržachu, na čož pak poča tón popjerjowy spray wokoło so pryskać. Hakle zawołana policajska patrulja 42lětneho změrowa a jeho nachwilnje zaja.

Policija (14.05.19)

wutora, 14. meje 2019 spisane wot:

Pytaja swědkow

Słona Boršć. Wčera rano něhdźe w třoch stej njeznatej maskěrowanej wosobje na wotpočnišću Hornja Łužica při awtodróze A 4 tankownju nadpadnyłoj (SN wčera rozprawjachu). Přepytujo pad pospytaneho rubježniskeho wudrěwanja dla pyta policija swědkow. Štóž je něšto wobkedźbował a ma informacije wo njeskutku abo awće, z kotrymž stej wosebje ćeknyłoj, njech so w Zhorjelskej policajskej direkciji pod 03581/468-100 přizjewi.

Škoda přećiwo Mitsubishijej

Brětnja-Michałki. Na Nowej dróze w Brětni-Michałkach stej předwčerawšim dwě awće do so zrazyłoj. Jako chcyše 47lětny šofer Škody z parkowanišća wujěć, njewobkedźbowaše wón z Brětnje přijěducy Mitsubishi 30lětneho a njemóžeše zražce hižo zadźěwać. Škoda na woběmaj jězdźidłomaj wučinja něhdźe 3 000 eurow. Zranił so na zbožo nichtó njeje, kaž policija dźensa zdźěli.

Policija (13.05.19)

póndźela, 13. meje 2019 spisane wot:

Wopity z traktorom jěł

Kašecy. Na polu mjez Kašecami a Žuricami je sobotu 32lětny traktorist do dalšeho traktora zrazył. Při tym nasta wěcna škoda něhdźe 30 000 eurow. Po dróze so zawinowar njezboža ze swojim traktorom do Kašec wróći. Policisća zwěsćichu, zo měješe něhdźe 1,48 promilow alkohola w kreji, a tak dyrbješe w chorowni krej wotedać. Přećiwo traktoristej přepytuja nětko alkohola we wobchadźe dla.

Z „chorhojčku“ po puću był

Malešecy. Kedźbliwi wobydlerjo informowachu sobotu policistow wo wopitym šoferu awta w Malešanskej gmejnje. Zastojnicy z Budyskeho policajskeho rewěra prošachu 55lětneho w Hućinje wo dobrowólny test alkohola, tón wujewi 1,66 promilow. Wodźer awta dyrbješe w chorowni krej wotedać. Nimo jězdźenja pod alkoholom přepytuja přećiwo njemu jězdźenja bjez dowolnosće dla, dokelž muž tajku scyła nima.

Motorski so ćežko zranił

Serbska debata

nowostki LND