Alarma dla ćeknyli
Słónkecy. Alarmowa připrawa je w Słónkecach (Schlungwitz) w gmejnje Dobruša-Huska tomu zadźěwała, zo je firmje wjetša škoda nastała. W nocy na póndźelu su so tam njeznaći na teren firmy zadobyli. Runje jako chcychu za hódnotnymi wěcami pytać započeć, alarmowa připrawa zaskoči. Njeznaći na to ćeknychu, kaž Zhorjelska policajska direkcija rozprawja. Přiwšěm načinichu skućićeljo něhdźe 200 eurow wěcneje škody. Dalše přepytowanja je kriminalna słužba policije přewzała.
Wopity z kolesom jěł
Kulow. Zo płaća tež za jězdźenje z kolesom předpisy, wě nětko młody muž, kotrehož je policija w njedźelnych rańšich hodźinach w Kulowje kontrolowała. 25lětny bě zastojnikam napadnył, dokelž na Budyskej dróze swoje koleso prawje w horšći njeměješe. Pola njeho naměrichu 1,72 promilow alkohola w kreji. Wón změje so nětko wopiłstwa w nadróžnym wobchadźe dla zamołwić.
Tójšto škody načinili
Wojerecy. Po wšěm zdaću přewjele mocy a přemało rozuma mějachu njeznaći, kotřiž su minjene dny na terenje při Wojerowskej Bonhoefferowej zachadźeli. Wandalojo skóncowachu tam wjacore nadróžne latarnje, wokno kaž tež blidotenisowu platu z betona. Nimo toho wjacore sćěny z barbu pomórachu. Wěcnu škodu trochuje policija na něhdźe 14 000 eurow. Dalše přepytowanja přewza kriminalna słužba Wojerowskeho rewěra.
72 km/h přespěšnje jěł
Połčnica. Zo dyrbiš stajnje a wšudźe z kontrolu spěšnosće ličić, je poprawom znate. Wodźer Audija w nocy na wutoru na awtodróze A 4 wo tym najskerje hišće ničo słyšał njeje. Wón bě jedyn z tych 447 šoferow, kotrychž při kontroli na A 4 pola Połčnic lepichu, dokelž běchu spěšnišo hač dowolenych 80 km/h jěli. Wony wodźer Audija docpě negatiwny rekord a jědźeše 72 km/h přespěšnje nimo błyskača. Na njeho čakaja nětko 700 eurow pokuty, dwaj dypkaj w Flensburgu a tři měsacy bjez jězbneje dowolnosće.
Ničo w awće njewostajić
Bjezdowy. Štóž w přichodnych lětnich tydźenjach k jednomu z łužiskich jězorow kupać jědźe abo chce so tam na druhe wašnje wočerstwjeć, njech na to kedźbuje, zo žane hódnotne wěcy w awće njewostaji. Předwčerawšim wječor su so mjenujcy njeznaći do třoch wosobowych awtow na parkowanišću při Bjezdowskim jězoru (Partwitzer See) zadobyli. Paduši wzachu šmóratka a pjenjezy sobu. Hódnotu rubizny trochuje policija na něhdźe 1 050 eurow.
Wobšudnistwo so njeporadźiło
Zemicy-Tumicy. We wotnožce Budyskeje wokrjesneje lutowarnje w Zemicach-Tumicach je minjeny pjatk formular za přepokazanku dóšoł, z kotrymž měješe so 39 000 eurow wot firmoweho konta přepokazać. Přistajenym bě to podhladne, tak zo woni firmu zazwonichu. Při tym so wukopa, zo bě mjenowany formular sfalšowany. Pjenježna škoda tuž na zbožo žana nastała njeje.
Z 3,76 promilemi Lkw wodźił
Słona Boršć. Dospołnje wopiteho wodźerja nakładneho awta je policija předwčerawšim na awtodróze A 4 lepiła. Zastojnicy kontrolowachu 39lětneho na wotpočnišću Hornja Łužica-juh pola Słoneje Boršće do směra na Zhorjelc. Pola njeho naměrichu 3,76 promilow alkohola w kreji. Jako sej policisća nakładne awto bliže wobhladachu, namakachu w kabinje šofera tójšto prózdnych piwowych tyzow we wačoku.
Wuměnkar awće wobškodźił
Wojerecy. Kedźbliwy swědk je předwčerawšim we Wojerecach wobkedźbował, kak je starši muž ze swojim Opelom při zaparkowanju dwě awće wobškodźił. Najprjedy sej wón škodu wobhlada, ale so na to w bydlenskim domje zhubi. Dźakowano wopisowanju swědka policisća skućićela wuslědźichu. W swojim bydlenju 79lětny njezbožo přizna a so swojeho zadźerženja dla mjerzaše. Přiwšěm dyrbi so wón njedowoleneho wotsalenja wot městna njezboža zamołwić. Wěcna škoda wučinja něhdźe 3 500 eurow.
Wopačny poradźowar po puću
Slepo. Hižo minjeny pjatk bě w Slepom pozdatnje wopačny energijowy poradźowar po puću. Wón klinkaše pola 69lětneho wobydlerja, předstaji so jako zastupjer energijoweho hospodarstwa a da sej milinowe zrěčenje kaž tež ec-kartku pokazać. Slepjan nimo toho wjacore podłožki podpisa, kotrež pak na kóncu njedósta.
Paduši w prózdnym domje
Radwor. W minjenych měsacach su so njeznaći w Radworju do njewobydleneho jednoswójbneho domu zadobyli. Po wšěm zdaću wotsrjedź měrca wobsedźerjo w domje njeběchu, tak zo su zadobywanje hakle předwčerawšim zwěsćili. Kaž policija dale rozprawja, łamachu so skućićeljo do pincy a pokradnychu z njeje wjacore kamery za wobkedźbowanje dźiwiny, rólu z kablom a tak mjenowane SD-karty. Rubizna je něhdźe 3 000 eurow hódna. Nimo toho nasta při zadobywanju 50 eurow wěcneje škody.