Policija (13.04.18)

pjatk, 13. apryla 2018 spisane wot:

Ćežka zražka na křižowanišću

Budyšin. Na křižowanišću Budyskeje Lubijskeje dróhi a Thomasa Münzeroweje (B 156), je wčera wječor Opel Corsa nimale frontalnje do Citroëna zrazył. Jako prěni pomocnicy k městnu njezboža přijědźechu, nańdźechu w awtowymaj wrakomaj štyrjoch zranjenych. Wjacore wuchowanske wozy z nuzowym lěkarjom, nimo policije a wohnjowych wobornikow, so wo znjezboženych starachu. Wodźerka Opela so ćežko zrani, tamnych třoch mjenje zranjenych dyrbjachu tohorunja do chorownje dowjezć. Přičiny njezboža policija přepytuje.

Bjez „papjerow“ po puću był

Chrósćicy. Patrulja Kamjenskeho policajskeho rewěra je srjedu nawječor w Chrósćicach na Cyrkwinskej horje 64lětneho wodźerja Renaulta lepiła, kiž njeměješe žanu jězbnu dowolnosć při sebi. To wón tež njemóžeše, dokelž scyła žane „pa­pjery“ nima. Te běchu „čornojězdźerjej“ hižo před měsacami wzali.

Policija (12.04.18)

štwórtk, 12. apryla 2018 spisane wot:

Do awta nadróžneje mištrownje zrazył

Wóspork. Zo maja sobudźěłaćerjo na­dróžnych mištrownjow chětro strašne dźěłowe městno, wšědnje znowa widźimy a słyšimy. Dopokaz za to je tež nje­zbožo, kotrež sta so předwčerawšim, wutoru, na awtodróze A 4 pola Wósporka. Tam bě 28lětny šofer nakładneho awta do směra na Zhorjelc po puću a zrazy ­do jězdźidła nadróžneje mištrownje. Zranił so na zbožo nichtó njeje, kaž policija zdźěla. K přičinje njezboža pak žane informacije njepodawa. Škoda wučinja ně­hdźe 4 000 ­eurow.

Policija (11.04.18)

srjeda, 11. apryla 2018 spisane wot:

Spěšnosć měrili a smalakow lepili

Porchow. 81 přespěšnych šoferow je policija předwčerawšim na awtodróze A 4 lepiła. Tam je 100 kilometrow na hodźinu dowolene. 56 króć mějachu šoferojo chłostanje płaćić, w 25 padach přepo­dachu zastojnicy naležnosć statnemu rěčnistwu. Šesćoch su nimo toho z handyjom při wuchu lepili. Najnuznišo měješe wodźer BMWja, kiž bě ze 150 km/h po puću. Wón ma so nastajić na 160 eurow chłostanja, na dypkaj w Flensburgu a na měsac nóžkowanja. Měrili běchu spěšnosć wjac hač 3 600 awtow.

Policija (10.04.18)

wutora, 10. apryla 2018 spisane wot:

Awće so paliłoj

Biskopicy. Wohnjowa wobora dyrbješe dźensa w nocy w Biskopicach hnydom dwójce woheń hašeć. Krótko po jednej wołachu wobornikow na Cyrkwinsku hasu, hdźež steješe Renault cyle blisko domskeho w płomjenjach. Hodźinje pozdźišo Biskopičanskich kameradow znowa alarmowachu. Jenož něšto stow metrow wot prěnjeho městna zasadźenja zdaleny paleše so tam wotstajeny Opel. We woběmaj padomaj běchu wobydlerjo woheń pytnyli a woboru wołali. Policija trochuje cyłkownu škodu na 30 000 ­eurow. Zastojnicy nětko móžneho zamiškrjenja wohenja dla přepytuja.

Policija (09.04.18)

póndźela, 09. apryla 2018 spisane wot:

Drogi připadnje namakali

Ottendorf-Okrilla. Druhdy policiji tež komisar připad pomha, kriminelne delikty zwěsćić. Tak wołachu zastojnikow sobotu rano do Ottendorfa-Okrille. Tam chcyše 20lětny muž swoju 21lětnu partnerku ze zhromadneho bydlenja wuzamknyć a ju při tym zrani. Mjeztym zo spytachu policisća situaciju změrować, napadny jim nachribjetnik muža. W nim bě 60 gramow marihuany we wjacorych małych titkach zapakowane.

Policija (06.04.18)

pjatk, 06. apryla 2018 spisane wot:

Njeměr na Žitnych wikach

Budyšin. K rozestajenju mjez wjacorymi wosobami je zawčerawšim wječor na Budyskich Žitnych wikach dóšło. 20lětny bě tam alkohol pił, hačrunjež je to na tym městnje zakazane. 52lětny stražnik jeho na to skedźbni. Nadobo započa 20lětny prózdne bleše na njeho mjetać. Pěškej, kiž chcyše mjez woběmaj wujednać, pryskaše komplica nadpadnika popjerjowy spray mjezwoči a jeho zrani. Hromadźe z dalšim komplicu hrabny sej 20lětny njezamknjene koleso, kotrež tam steješe, a so zhubi. Mjeztym je policija identitu třoch Tunezičanow zwěsćiła a za nimi pyta.

Policija (05.04.18)

štwórtk, 05. apryla 2018 spisane wot:

Rozestajenje po diskotece

Šunow. Njelubje skónčił je so za 19lětneho wopyt diskoteki jutrownu póndźelu w Šunowje. Młody muž bě po swójskim wuprajenju po puću na parkowanišćo, jako z jednoho awta njejapcy njeznaty wulěze a jeho bić započa. 19lětny so při tym mjezwoči zrani a dyrbješe so lěkarsce zastarać dać. Nadpadnik, kiž bě do toho tež druhim wopytowarjam diskoteki swojich skřiwdźacych wuprajenjow dla napadnył, je něhdźe 1,85 metrow wulki, sylneje sportowskeje postawy a ma ćmowe, krótke włosy. K podawkej w Šunowje pyta policija swědkow. Štóž je něšto wobkedźbował, njech přizjewi so pod tele­fonowym čisłom 03571/ 46 50.

Policija (04.04.18)

srjeda, 04. apryla 2018 spisane wot:

Bjez dowolnosće z awtom jěł

Kamjenc. 26lětny muž bě zawčerawšim wječor na Kamjenskej Wuchodnej ze swojim VWjom po puću, jako jeho wobsadka policajskeho awta zadźerža. Při kontroli zastojnicy zwěsćichu, zo młody muž scyła žanu płaćiwu jězbnu dowolnosć njewobsedźi. Nimo toho předležeše přećiwo njemu wukaz zajeća, dokelž pjenježnu pokutu 50 eurow zapłaćił njebě. Sumu drje wón pak nablaku zapłaći, jězdźenja bjez dowolnosće dla pak změje so před sudnistwom zamołwić.

Policija (03.04.18)

wutora, 03. apryla 2018 spisane wot:

Diesel kradnyli

Budyšin. Jutrowny kónc tydźenja zadobychu so njeznaći na teren firmy na Delnjokinjanskej dróze w Budyšinje. Tam přerězachu rołku bagra a pokradnychu njeznate mnóstwo diesela. Zbywace ćěriwo dachu prosće wuběžeć, tak zo dósta so wone přez kanalizaciju do Albrechtowki. Dohromady nasta něhdźe 1 300 eurow škody.

Policija (29.03.18)

štwórtk, 29. měrca 2018 spisane wot:

Tank prózdny – wodźer „połny“

Miłoćicy. Na statnej dróze S 94 blisko Miłoćic je policija zawčerawšim popołdnju jězbu tankoweho nakładneho awta skónčiła. Jězdźidło bě po puću do Nossena, hdźež měješe so napjelnić. Při kontroli Lkw-ja zastojnicy zwěsćichu, zo bě wulki tank woprawdźe prózdny, šofer pak za to „ćim połniši“. Kaž test wunjese, měješe 45lětny wodźer 1,16 promilow alkohola w kreji. Dalšu jězbu jemu zastojnicy zakazachu a sej jeho jězbnu dowolnosć hnydom wobchowachu.

Ćěriwo wotklumpali

Mučow. 350 litrow diesela su njeznaći w nocy na wutoru z twarnišća na zwjazkowej dróze B 96 w Mučowje pokradnyli. Ćěriwo wotklumpachu z bagra a z milinoweho agregata.

nawěšk

nowostki LND