Policija (13.07.18)

pjatk, 13. julija 2018 spisane wot:

Přez telefon wobšudźili

Bretnig. Z woporom wobšudnikow sta so tele dny žona w Bretnigu. Při wjacorych telefonatach wudawachu so njeznaći skućićeljo jako sobudźěłaćerjo Microsofta a 58lětnej napowědachu, zo je jeje kompjuter połny wirusow. Po přikazu cuzych sćahny sej žona wjacore programy na swój ličak, přeradźi čisło swojeho handyja a zapoda připósłane TANy. Z nimi wotzběhnychu wobšudnicy 850 eurow z jeje konta.

Policija (12.07.18)

štwórtk, 12. julija 2018 spisane wot:

Znowa bjez papjerow jěł

Zubornička. W Malešecach wuhladachu zawčerawšim muža za wodźidłom Renaulta, kotrehož běchu w zašłosći hižo wospjet bjez jězbneje dowolnosće lepili. Tónraz wón před policistami ćěkaše ­a smaleše zdźěla hač do 200 km/h spěšnje do směra na Zuborničku. Tam pak zhubi kontrolu nad wodźidłom, šmórny so wobhrodźenja mosta a zajědźe skónčnje do rěčki. 51lětny změje so nětko znowa na sudnistwje zamołwić.

Policija (11.07.18)

srjeda, 11. julija 2018 spisane wot:

Podhladnaj hižo raz napadnyłoj

Wojerecy. Wobsadka policajskeho awta je wčera rano we Wojerecach padustwu zadźěwała. Zastojnicy wuhladachu dweju muži w starobje 24 lět při wobchodźe na Dillingenskej. Jako wonaj policistow widźeštaj, spytaštaj ćeknyć, policistaj pak běštaj spěšnišej a jeju nachwilnje zaještaj. Přepytujo jeju awto z pólskim čisłom namakaštaj wulki hamor a mjezwočowej masce. Z tajkimi utensilijemi běštaj 24lětnaj w juniju hižo w Budyšinje napadnyłoj. Nimo toho staj wobaj tež w Pólskej zadobywanskich deliktow dla znataj. Policija nětko pruwuje, hač du dalše padustwa na jeju konto.

Policija (10.07.18)

wutora, 10. julija 2018 spisane wot:

Čisle a antena fuk

Salow. Diskoteka kuntworow minjeny kónc tydźenja w Salowje njeje jenož mnohich wopytowarjow přiwabiła, ale samo paduchow. Mjeztym zo je so tam 23lětny z přećelemi zabawjał, so druzy z jeho Seatom zaběrachu. Wot­šrubowa­chu wobě značce jězdźidła a pokradnychu třěšnu antenu. Nimo toho awto młodeho muža rozdrapachu. Dohromady načinichu wjace hač tysac eurow škody, kaž policija rozprawja.

Policija (09.07.18)

póndźela, 09. julija 2018 spisane wot:

Paduši bjez swědomja

Zhorjelc. 91lětnej žonje su njeznaći minjeny pjatk na Zhorjelskim pohrjebnišću nakupowansku tobołu pokradnyli. W njej bě mjez druhim kluč jeje bydlenja. Do njeho sej skućićeljo dóńdźechu a so z klučom zadobychu. Přepytujo tam wšitke stwy pokradnychu woni 150 eurow kaž tež bankowu kartku staruški. A kaž njeby to hišće dosahało, dyrbješe žona pozdźišo zwěsćić, zo bě něchtó ­z jeje konta tysac eurow wotzběhnył. ­Kriminalna policija tónle njehańbićiwy pad nětko přepytuje.

Policija (06.07.18)

pjatk, 06. julija 2018 spisane wot:

Konjenc přepytali

Kamjenc. Na přikaz statneho rěčnistwa je policija zawčerawšim konjenc w Kamjencu přepytała. Kontrola měrješe so přećiwo mužomaj w starobje 68 a 49 lět. Wonaj staj podhladnaj, zo běštaj při wikowanju z konjemi falšowane papjery wužiwałoj. Mjez druhim wobhladachu sej zastojnicy papjery 150 koni. Jako je jednotliwym skoćatam přirjadowachu, zwěsćichu wšelake njedostatki. Kriminalna policija pad nětko dale přepytuje.

Policija (05.07.18)

štwórtk, 05. julija 2018 spisane wot:

Podhladneho lepili

Kulow. Zastojnicy Wojerowskeho policajskeho rewěra su zawčerawšim w rańšich hodźinach podhladneho paducha awta zajeli. Wobsedźer Audija A6 bě do toho pytnył, zo bě so na Bebelowej něchtó do jeho jězdźidła zadobył a wokna dele pušćił. Jako policisća přijědźechu, jim Kulowčan zdźěli, zo bě někoho podhladneho widźał. Pytajo w bliskosći lepichu zastojnicy 32lětneho muža, kiž so chowaše. Pola njeho namakachu někotre wěcy, kotrež bě z Audija spakosćił. Podhladneho dowjezechu na policajski rewěr. Nětko kriminalna policija přepytuje, hač steji tónle pospyt padustwa w zwisku z dal­šimi jězdźidłowymi deliktami minjene dny w Kulowje.

Policija (04.07.18)

srjeda, 04. julija 2018 spisane wot:

Z alkoholom a bjez dowolnosće

Biskopicy. Wobsadce policajskeho awta napadny wčera rano w Biskopicach na Budyskej dróze Opel Astra, kotryž bě ­tam přespěšnje po puću. Zastojnicy jězdźidło zadźeržachu a kontrolowachu jeho wodźerja. Při tym so wukopa, zo bě 35lětny šofer do toho alkohol pił. Wotpowědny test pola njeho 1,12 promilow wunjese. Nimo toho policisća zwěsćichu, zo muž scyła žanu płaćiwu jězbnu dowolnosć njewobsedźi. Za wobaj deliktaj změje ­so wón nětko před sudnistwom zamołwić.

Policija (03.07.18)

wutora, 03. julija 2018 spisane wot:

Lěs so palił

Hórnikecy. Wobstajneje suchoty dla dochadźa nětko časćišo k lěsnym wohenjam. Tak bě zawčerawšim rano w lěsu pola Hórnikec woheń wudyrił. Płomjenja rozpřestrěchu so po něhdźe 5 000 kwadratnych metrach a tam wobstatk štomow zdźěla zničichu. K hašenju wołachu powołanskich wobornikow z Wojerec a jich dobrowólnych kolegow z Hórnikec, Běłeho Chołmca a Kulowa. Kelko škody je nastało, njeje hišće znate. Kri­minalna policija přepytuje podhlada ­zamiškrjenja wohenja dla.

Policija (02.07.18)

póndźela, 02. julija 2018 spisane wot:

Grat a mašiny kradnyli

Rachlow. W nocy na sobotu běchu paduši w Rachlowje pod Čornobohom aktiwni. Tam zadobychu so do dweju transporterow a pokradnychu z njeju grat a mašiny w hódnoće něhdźe 7 500 eurow. Nimo toho načinichu na awtomaj 200 eurow wěcneje škody.

Swědk wšitko wobkedźbował

Chrósćicy. 39lětny wodźer Audija je sobotu wječor na Chróšćanskej Cyrkwinskej horje do płota zajěł a prosće dale jěł. Swědk pak to wobkedźbowaše, napisa sej čisło awta a zazwoni policiju. Zastojnicy skućićela doma wopytachu a naměrichu pola njeho 1,52 promilow alkohola w kreji. Škoda wučinja 500 eurow.

nawěšk

nowostki LND